102
Naasimɔ fabinii ki jiin u daamii po
1 Yennu, gbiintir n fabinii,
ki gbat n mɔnii nba jiin sommir po.
2 Mi-i be daamii ni, a daa lekin a numm ŋaan nyikitimi.
Gbiintir, ki turin gatu yiama, yoo nba ki n yiina.
3 N manfoor yate yian yian nan munyuut na,
ki n gbanant di nan muu na.
4 Bi faa birin nan mɔkoont nae, ki n ji ki loon jeet.
5 Maa kurii sanpaapowa na, ki n ji waab,
ki tee gbouŋ nan kpaba.
6 N tee nan kunkoouk paak fiiuk nae,
ki bia tee nan langbent ni fiiuk na.
7 N dɔɔ ki ki gɔɔnti;
n tee nan nɔɔn-yemmir nae, ki lin jak mɔpina paak.
8 N datai sukiime daar kur,
ki binba laan na dia n sann ki poor mɔporbiit.
9-10 A wutoor nan a parbeenn paak,
ki n mɔɔ tanpent ki li tee n jeet,
ki n ninnyuut tuu ŋmat nan n bonnyukar;
ki a tɔkirin ki lun.
11 N manfoor tee nan daajoouk yinyuŋ nae;
ki n tee nan mɔkoont na.
12 Ŋaan fin Yennu-e yɔɔ tee kpanbar,
ki maarpaanu kur sii yɔɔ tian a po.
13 A saa fiir ki tin Sayɔnn doo ninbaauk,
kimaan yoo baar nan fan tinir ninbaauka;
yoo nba nae jaŋ.
14 Laa lek biir na, ŋaan timm a toontunna loonir,
laa lek tee langbent na, ŋaan ti tiinir ninbaauk.
15 Nisaarii saa tin Yennu,
tingbouŋ na kpanbara kur saa tin u paŋ na jaŋmaanii.
16 Yoo nba ki Yennu saa ŋamm maa Sayɔnn na
u saa fiit u yabint ki wann.
17 U saa gbat u niib nba ki u yêtib na, ki gbiint bi fabinii.
18 Sɔbin linba ki Yennu tun na,
ki guun maarpaanu nba waa na,
ki niib nba ki bi daa ki marib na n tan dontɔ.
19 Yennu be u kasii boor sanpaapoewa ŋaan got sikin,
u be sanpaapoe ŋaan diit tingbouŋ na.
20 U gbat dansarkɔɔra kukura,
ki nyinn binba ki bi bu biirib ki yaa bin kpib na yann.
21 Ki li paak bi saa dont u sann, Sayɔnn kunkonn na paak,
ki u saa la dontir Jerusalem,
22 yoo nba ki digbana niib nan yent nba ni niib
saa taan leeb ki jiantɔ na.
23 Yennu-e teenin nichɔkuŋ
yoo nba ki n daa tee nipaaŋ na;
u jiŋ n manfoore.
24 Li paak ki n yet a, “Yennu, a daa jikitin
ki saa nanin mɔtana, maa daa ki kpet na.”
Yennu, a yɔɔ be-e.
25 Sian yooewa ki a din nan tingbouŋ na,
ki jii a tiɔŋ nii ki nan sanpaak.
26 Bi tan saa bota, ŋaan fin sii yɔɔ be-e;
bi tan saa kpiar nan kparchant nae.
A saa lub nan kparchant nae ki bin bot.
27 Ŋaan fin ŋarin tee yomme yoo kur, ki a manfoor kaa gbennu.
28 Ti waas sii be bi yamanie,
ki a fatu nie ki ti yaaboona sii be fanu.