104
Ki jiin naamii daanɔ dontir po
1 N seek, pakin Yennu.
N Yomdaanɔ Yennu, a yab bonchiann.
2 A gbee nan yabinte nan baakir,
ki gbab yentu, ki li linta nan chinchenn na.
A tant sanpagbouŋ nan nyungbouŋ nae,
3 ki senn a doo, nyun nba be sanpaapo na paak.
A jii sanpagbante ki teen a taantorit,
ki jak wouŋ kpinkpant paak.
4 A jii wouŋo ki teen a toomiinba,
ki tuu yent sanyikintii, ki li tee a toontunna.
5 Fine senn tingbouŋ na li fiakir paak,
ki li set fanu ki kan ban chat,
6 ki jii mɔkgbeŋa ki bakin li paak nan liant na,
ki nyun dɔkin jɔjaana na.
7 Yoo nba ki a yakii nan nyun na, ki li chiar;
laa gbat a satianii fuur yoo nba, ki li chiar yaat,
8 ki pubir gar jɔjaana yura paak ki sik baat ni,
ki saan faa ŋamm sian ki turir na.
9 Ki a kɔr kɔru nba ki li kan ban yakir,
a lin guurir, ki li ji daa piint tingbouŋ na.
10 Fine te ki nyun nyi nyuntona ni ki puub siik baat ni,
ki mɔka puub ki gaar kunkona sinsuuk ni.
11 Ŋanne teen muuk ni bonkobit kur nyun,
leŋe ki bɔnii kpeent bi nyunnyukuru.
12 Nɔɔnii tia bi tiat leŋ tiinii na paake ki mɔ.
13 Fine te saak nyi sanpaapo ki baa ki maant kunkona,
ki tingbouŋ na gbee nan a piisin.
14 Fine te mɔɔt pia, ki bonkobit ŋman,
ki jeet naan, ki nisaarii di, ki buur bi bonbuburit,
15 ki ŋaa tilɔɔna daan, ki li teemm parpeenn,
ki tee kpan, ki li teemm parcheenn,
nan jeet, ki li teemm paŋ.
16 Lebanonn kpekii na laat saak bonchiann;
tiinii maŋ tee Yennu tiɔŋ tiinii nba ki u bure.
17 Leŋe ki nɔɔnii tia bi tiat, ki janbɔɔnlot tia tiinii maŋ paak;
18 ki piarii be jɔjaana na paak, ki sina kɔɔ tanfiat na ni.
19 Fine nan ŋmaarik a wuu dakin ŋmaarii kann,
ki yonnu mi u binbaayoo.
20 Fine nan nyiɔk,
ki li-i bɔnn, muuk ni bonfoa n nyi ki somm.
21 Yanbɔrpaanii na tuu kpaan bi jeet ŋaan gaan jate,
ki kpaan jeet nba ki Yennu saa turib.
22 Yonnu-i taŋi do yoo nba, bin ŋmat bi dɔɔnii ni.
23 Li yoo na ki nisaarii n nyi ki tun bi toona
ki saa tuu daajoouk.
24 Yennu, a nan bona bonchiann.
A nan li kur nan subinchiɔŋo;
tingbouŋ na gbee nan a naamiie.
25 A nan mɔkgbeŋir, ki li yarin ki bia fɔk,
ki bonfoa nba be leŋ kaa kann,
bongbeŋa nan bonbis kur be leŋ.
26 Ki ŋarint somm li paak,
ki nyun ni bonfogbeŋir nba ki a nan na lin leŋ.
27 Bi kura gaa a paake, a fan turib jeet yoo nba ki bi loon.
28 Ki a teemm jeet ki bi di, ki teemm jeŋant ki bi di gboot.
29 Li-i tee ki a lek a numm, jaŋmaanii tuu sooribe,
ki fi-i jii be foon,
bi tuu kpoe ki ŋmat sik tant nba ki bi bo nyii na ni.
30 Ŋaan fi-i turib foon, bi tuu teen bonfoae;
a teen tiŋ na bonfoa manfoor.
31 Yennu yiikochiɔŋ-ii yɔɔ kii be.
Yennu-ii yɔɔ kii mɔk parpeenn linba kur ki u nan na paak.
32 Wuu got tingbouŋ, li jekire, wuu sii jɔjaana ki li nyi munyuut.
33 N sii yiin ki teen Yennu-e, n manfoor kur ni;
n manfoor fɔkint ni kur, n sii yiin dontir yaniie ki teen Yennu.
34 U par-ii mei n yaŋ maŋ paak,
kimaan n parpeenn nyi u boore.
35 Wun boon toonbiit damm na tingbouŋ na ni,
ki daa te nibiit na ji be.
N seek, pakin Yennu.
Pakin Yennu.