105
Yennu nan u niib
(1 Barkperii 16.8-22)
1 Turin Yennu niipoouk, ki mɔɔnt u yabint po;
ki pak nisaarii waa tun linba.
2 Yinin dontir yaŋ ki tur Yennu,
ki pak wann waa tun bakitnauŋ toona nba.
3 Ii mɔk parpeenn, kimaan taa tee u niib na paak,
ŋaant ki wunba kur jiantirɔ-ii kpamm.
4 Saant Yennu boor ki boi sommir po, kii jiantirɔ yoo kur.
5-6 Yimm nba tee u toontunnɔ Abraham yaaboona na,
yimm nba tee Jakɔb nba ki u din gannɔ na yaaboona na,
ii tian yaarlituk toona nba ki Yennu tun na,
nan buut nba ki u bu na.
7 Ti Yomdaanɔe tee Yennu,
u sennu na tee tingbouŋ na kur yare.
8 U sii yɔɔ dia u mɔlor nae, ki u mɔsonn na sii yɔɔ be,
ki tur maarpaanu nba kur saa baar.
9 U sii dia mɔlor nba ki u din lor nan Abraham na,
nan mɔsonn nba ki u din senn ki tur Aisak na.
10 Yennu din lor mɔlore ki tur Jakɔb,
ki li tee mɔlor nba sii yɔɔ be.
11 U din yet a, “N saa tura Keenann tiŋ. Li sii tee a tiɔŋ faare.”
12 Yennu niib din ki yabi, ki tee saamm Keenann tiŋ ni.
13 Bi din yeeke ki lɔɔn digbana, ki nyi yent ni ki saan leer ni.
14 Ŋaan Yennu din ki saak sɔɔ dintib biaki,
waa loon ki wuu guub na, ki u yakii nan kpanbara na a,
15 “I daa paa n nigannkab na daŋi, i daa siit n sɔkiniinba na.”
16 Yennu-e din te ki kon baa tiŋ na paak, ki biir bi jeet kur,
17 ŋaan u din tun sɔɔe ki u gar bi tɔɔnn,
ŋɔɔe tee Joosef, wunba ki bi din kɔɔtɔ ki bi teenɔ daabir na.
18 Bi din jii jaruko ki baan u taa, ki jii kut ki lor u turu ni,
19 nan yoo nba ki u buntir na tan teen mɔnii.
Yennu mɔmaame din pak kat nan u mɔk mɔnii.
20 Li yoo na ki Ijipt kpanbar na ji ŋaau,
ki doo diatɔɔ maŋ nyikɔ,
21 ki jiiu ki te ki u tee u toontunna saakɔɔ,
ki teenɔ tiŋ na kur ŋmakit-tɔɔ,
22 ki te ki u mɔk yiikoo nba gar kpanbar na ŋaasaakab kur,
nan yaak nba ki u saa fit kpaan kpanbar na tɔɔndamm.
23 Ŋanne ki Jakɔb saan Ijipt ki saa kar doo maŋ ni.
24 Yennu din jii matik bonchiann ki tur u nigannkab,
ki te ki bi mɔk paŋ ki gar bi datai,
25 ki te ki Ijipt teeb na ki loon u niib na, ki diab nan mɔleemii.
26 Ŋanne ki u tun u toontunna Moses nan Aarɔnn
ki bi tee binba ki u gannib.
27 Ki bi tun Yennu maŋ toonjaana nan bakitnauŋ toona
Ijipt tiŋ ni.
28 Yennu din te ki bunbɔnn baar Ijipt tiŋ ni,
ŋaan Ijipt teeb na din ki sak Yennu mɔbi.
29 U din te ki bi nyun kpant sɔn, ki bi janii kur kpo.
30 Bi doo din gbee nan pɔntae,
bi kpanbar ŋaak gbaa, pɔnta din gbee leŋa.
31 Yennu din te ki kpajui nan naayinyoorii baar
ki gbee digbann na kur po.
32 U din nyik saake, ŋaan tun sakaana nan sanyikintii, tiŋ maŋ ni,
33 ki biir bi daan tiinii nan bi sinsabii, ki daa tiinii maŋ kur.
34 U din te ki naasuut baar, ki ki mɔk kann,
35 ki ŋman bonbuburit nba kur be tiŋ na paak,
ki bia ŋman bi jeet kur.
36 U din kpii Ijipt teeb ŋaak kur ni, bonjak nba tee bikperik.
37 Li poor po ki u nyinn Israel teeb na,
ki bi jii salimpeena nan salimmɔna,
bi kura din mɔk paŋ nan laafia.
38 Ijipt teeb na din tiimm jaŋmaaniie;
baa ji din tan nyii na, ki Ijipt teeb para ji maŋ bonchiann.
39 Yennu din te sanpagbouŋo jɔɔn u niib na yur paak,
ki teemm muu nyiɔk, ki wantib sɔnu.
40 Bi din boie, ki u turib pinpara,
u din turib jeet nba nyii yendɔuŋ nie, ki gboomm.
41 U din loot tanne, ki nyun nyii leŋ,
ki pubir kunkoouk na paak nan mɔkir na.
42 U din tiar u kasii mɔsonn nba ki u din senn
ki tur u toontunnɔ Abraham na,
43 ki nyinn u nigannkab maŋ,
ki bi yiin yanii ki hoot nan parpeenn.
44 U din jii nisiab tiniie ki turib,
ki te ki bi gaar bi sarwaat,
45 a lin te ki u niib n sak u sennii,
ki bia dia u wannu na kur.
Pakin Yennu man.