106
Yennu ŋamm ki jiin u niib po
1 Pakin Yennu man.
Ii tur Yennu niipoouk, kimaan u ŋan,
ki u lomm kaa gbennu.
2 Ŋmee saa fit wann toonjaana nba kur ki u tumi?
Ŋmee saa fit dontɔ ki lin jaŋi? Sɔɔ kaa.
3 Parmaasir be daansiab nba saak u mɔb,
binba yɔɔ tuun linba ŋan na paak.
4 Yennu, tiat n po yoo nba ki a sommit a niib na;
fi-i yaa a tinnib yoo nba, fan pukinin leŋ.
5 Ŋaant ki man la ki a niib mɔkitir, ki biit namm bi parpeenn,
ki bia biit nan a niib maŋ parpeenn kpinkpammuk.
6 Ti tun ki biir, nan ti yeejamm nba din tun biir nawa,
ti tee biit nan yanbɔndamme.
7 Ti yeejamm nba din be Ijipt na
din ki bann Yennu bakitnauŋ toona paak;
bi din tamm bona bonchiann nba ki u tun
ki wannib u lomm nawa,
ki yêt Yabint Yennu mɔb, Mɔkmuŋ na boor,
8 ŋaan u din tinnibe nan waa senn mɔsonn na,
a lin wann u panchiɔŋ.
9 U din yet Mɔkmuŋ na, ki li fɔɔr;
ki u poon u niib tinkooŋ paak.
10 U din nyinnib binba ki loomm na nuu nie,
ki fatib bi datai maŋ nuu ni.
11 Ki nyun dii bi datai na, nan bi yenɔkɔɔwa din ki biari.
12 Ŋanne ki u niib teen u mɔsonn na yada,
ki yin yanii ki dontɔ.
13 Li poorpo ki bi tamm waa tun linba na yiama,
ki ki guur u kpaanii ŋaan tuun bi toona.
14 Bi din gbee nan nianbiiuko kunkoouk na paak
ki bikin ŋɔɔ Yennu.
15 Li paak ki u turib baa loon linba maŋ,
ŋaan bia te ki yiarbiiuk baa bi paak.
16 Bi din fumm nan Moses nan Aarɔnn
nba tee Yennu kasii toontunna nae, kunkoouk na paak.
17 Ŋanne ki tingbouŋ bɔkit ki nak Datann nan Abiram
nan bi ŋaateeb;
18 ki muu nyii sanpaapo ki baa bi poorpojɔɔmu paak,
ki dii biit damm maŋ.
19 Bi din maa salima naabike, Sainai jɔɔr paak,
ki li tee tingbann ki bi jiantir.
20 Bi din nyik yabint Yennu jiantue
ŋaan jiantir bonkobuk nba ŋman mɔɔt ninnauŋ.
21 Bi din tamm Yennu nba din jii u panchiɔŋ toona
ki nyinnib Ijipt na poe.
22 U tun bakitnauŋ toona bonchiann leŋ,
ki bia tun yaarlituk toona bonchiann Mɔkmuŋ na boor.
23 Yennu nba yet a u saa biir u niib na,
ki u niganntɔɔ Moses fiir set tokinɔ,
ki gɔɔr u wutoor na, ki li ji ki biirib.
24 Li poorpo, ki bi yêt tinŋaŋ na,
kimaan bi ki teen Yennu mɔsonn na yada.
25 Ki bi be bi lanbont ni ki burin,
ki yêt bin gbiint Yennu maan.
26 Ŋanne ki u turib ninmɔnn kpayakit
nan u saa te ki bi kur n kpo kunkoouk na paak,
27 ki yat bi yaaboona ki kɔɔmm binba ki mi Yennu na doi ni,
ki bin kpo digbangana ni.
28 Ki Yennu niib na taan Peor teeb,
ki bi jiantir tingbann nba ki bi yi Baal na, Peor doo ni,
ki dii jeet nba ki bi mann maruŋ ki tur tingbann
nba kaa manfoor maŋ.
29 Bi toonbiit din donn Yennu wutoore,
ki u te ki yiarbiiuk baa bi paak.
30 Ki Finehas set leŋ ki dat biitdamm na tuba,
ki yiarbiiuk na ji gbenn.
31 Ki bi yɔɔ tian linba na po u sann ni,
ki bia sii yɔɔ tian li po, yoo nba baat kur.
32 Niib na din donn Yennu wutoor, Meriba nyuntona boor nie,
ki Moses kɔɔ daamii ni bi paak.
33 Bi din te ki Moses wutoor dooe ki saa gar,
ki u pak mɔbonkaat.
34 Bi din ki kpii binba ki waa Yennu na
nan ŋɔɔ Yennu nba wannib a bin kpib na.
35 Bi din kɔɔnt niib maŋ waase
ki gaar bi patmannu marima.
36 Yennu niib na din jiant yenbise, ki li baar nan bi biiru.
37 Bi din jikit bi bonjai nan bi bonpoie ki mann maruŋ
ki teen Keenann tingbana.
38 Bi din kpii waas nba kaa biit,
ki bi tiŋ na biir, kimaan waas na kpinu paak.
39 Bi ji din ki waa Yennu,
bi toonbiit na din te ki bi ji ki be kasii.
40 Li paak ki Yennu wutoor doo u niib na paak,
ki u yan yêtib.
41 Ki u nyik ki chabib nan binba ki jiantir Yennu,
ki bi datai maŋ ji diab.
42 Bi datai din dintib biak, ki bi jiantirib.
43 Yennu din yɔɔ nyint u niib daamii nie,
ŋaan bi din gann mɔyêtuko ki sik kpii biit ni.
44 Baa bia fabin yoo nba,
ki Yennu gbat bi fabinii na ki gbiint bi daamii maŋ.
45 Bi paake ki u tiar u mɔlor na po, ki lebit u dudukit,
kimaan u lonchiɔŋ na paak.
46 U din te binba dintib biak na mɔ kɔɔ
nan baa dinnib biak na paak.
47 Ti Yomdaanɔ Yennu, tintit, ki nyinnit digbana na ni,
ki tii mɔk niipoturu ki dont a kasii sann.
48 Ii dont Yennu, wunba tee Israel teeb Yomdaanɔ na;
ii dontɔ mɔtana nan yoo nba waa kur.
Ŋaant sɔɔ kur n yet a, “Lii tee nna.”
Pakin Yennu man.