GBOUŊ ŊANŊMU
107
(Yanii 107 -- 150)
Dontir nba jiin Yennu ŋamm po
1 “Turin Yennu niipoouk,
kimaan u ŋan, ki u lomm kaa gbennu.”
2 Ii yeen mɔbona na kii lei kii dont Yennu man,
yimm nba kur ki u tinni, ki nyinni i datai nuu ni,
3 ki nyinni tingaŋ ni, li yondo po nan yonbaa po,
niigaŋ po nan niidiitu po, ki jen nani na.
4 Siab din yirib kunkoouk na paake, ki sɔnu kaa,
ki bi ki mi baa saa tɔkin siaminba ki baar doo ki kɔɔ.
5 Kon nan nyunnyukuru din soorib,
ki bi poŋ ji ki mɔk dindanni.
6 Bi daamii maŋ nie ki bi yiin Yennu,
ki u nyinnib bi fara maŋ ni.
7 U din tɔkin namm sɔnsunsonne,
ki saan namm doo nba ni ki bi sii be.
8 Bin tur Yennu niipoouk, kimaan u lonchiɔŋ
nan u yaarlituk toona nba ki u tun ki turib na paak.
9 Ŋɔɔe gboont binba ki nyunnyukuru mɔkib na,
ki bia gboont komma nan jeŋant.
10 Siab din be bunbɔnn nba sumii nie,
ki tee dansarii, ki bant baab ki bi di fara,
11 kimaan bi din yêt Yabint Yennu sennue,
ki bia ki gaar u kpaanii.
12 Bi din tun toonpaarae ki tan baŋ,
ki tuu baa tiŋ ni, ŋaan sɔɔ kaa ki saa sommib.
13 Bi daamii maŋ nie ki bi yiin Yennu,
ki u nyinnib bi fara ni.
14 Ŋɔɔe nyinnib bunbɔnchiɔŋ na ni,
ki cheer bi bant na ki yɔniir.
15 Bin tur Yennu niipoouk, kimaan u lonchiɔŋ
nan u yaarlituk toona nba ki u tun ki turib na paak.
16 Ŋɔɔe jintir kutmɔnt gana, ki bia jintir kutlaana.
17 Siab din tee bonliiniie ki di fara
bi biit nan bi yanbɔmm paak.
18 Bi din ki mɔk jeet niɔŋu, ki poŋ ji kɔr kuun tammɔb.
19 Bi daamii maŋ nie ki bi yiin Yennu,
ki u nyinnib bi fara ni,
20 ki jii u mɔbona ki turib laafia, ki nyinnib kuun ni.
21 Bin tur Yennu niipoouk, kimaan u lonchiɔŋ
nan u yaarlituk toona nba ki u tun ki turib na paak.
22 Bin jii maruŋ ki turɔ niipoouk nan yanii
nba tee parpeenn yanii, ki lin wann waa tun linba kur.
23 Siab din somm mɔkgbeŋa paake nan ŋarint,
ki kpaan bi daar diitir mɔkgbeŋa na ni.
24 Bi din la Yennu toona, u bakitnauŋ toona, nyun na paak.
25 U din pak maame, ki wonpaaruk piin ki da
ki fiin nyunpana na,
26 ki nyunpana na wokitir ŋaruŋ na, ki dont ki bia sikint.
Ninmɔnboorik na ni, niib na din ki mɔk dindann nan waama.
27 Bi din ŋat baantire, ki ŋmaan nɔrii nan dayibira na;
bi bannu na kur ji din ki mɔk nyɔɔti.
28 Bi daamii maŋ nie ki bi yiin Yennu,
ki u nyinnib bi fara ni.
29 U din te ki wonpaaruk na maak, ki nyunpana na dɔɔr.
30 Li din turib parpeenn, kimaan wonpaaruk na nba maak na,
ki u jiib ki donnib gbingbann nba ki bi loon paak.
31 Bin tur Yennu niipoouk, kimaan u lonchiɔŋ
nan u yaarlituk toona nba ki u tun ki turib na paak.
32 Bin mɔɔnt nibur ni ki wann u yabint nba tee,
ki dont u sann, tɔɔndamm boor.
33 Yennu-e din te ki mɔka fɔɔr,
ki nyuntona jit, ki nyun ji ki nyi.
34 Ki u te ki koorin tiŋ kpant tinkokirik,
kimaan binba kɔɔ leŋ na toonbiit paak.
35 U din te ki kunkoot kpant nyundɔɔna,
ki tinkooŋ kpant jinjabii.
36 Ki u te komma kɔɔ leŋ, ki teenir doo ki be li ni,
37 ki buur bonbuburit nan tilontii, tiŋ na ni,
ki tuu tan jaan jeet bonchiann.
38 U din teen piisin u niib paak, ki bi mar waas bonchiann;
u din ki te ki bi bonkobit waabiti.
39 Yoo nba ki siab din nyann ŋɔɔ Yennu niib
ki diab nan tonu ki dintib fara, ki teemm butimm na,
40 u din sarik binba dintib fara na,
ki te ki bi yirik kunkoouk nba ki sɔnu kaa na paak,
41 ŋaan nyinn talas damm na bi daamii na ni,
ki te ki bi pɔt nan bonkobit na.
42 Niŋamm laat na, ki mɔk parpeenn,
ŋaan ki biit damm na kur muu bi mɔi.
43 Binba mɔk subinii kur n dukin linba na po;
bin dukin Yennu lonchiɔŋ nba kaa gbennu na po.