109
Daanɔ nba be daamii ni fabinii
1 Yennu, n dontira; a daa ŋmini.
2 Biit damm nan fai damm lekima. Bi fa faake ki paan,
3 ki piak bonbiir ki jiint n po, ki lekinin ki li kaa gbinni.
4 Bi biirime, ŋaan ki n lek loomm, ki miar fin Yennu bi paak.
5 Bi jikit biite ki pa n ŋamm paak, ki jikit naŋ ki pan lomm paak.
6 Gant barbuurɔ nba tee tondaanɔ ki wun bu n dataak buut,
ki ŋaan ki u datai na yenɔ n biirɔ.
7 Bin bu u buut ki turɔ kaat, ki u Yenmiaru sii tee biit.
8 Ŋaant ki u manfoor n gbenn yiama,
ki sɔɔ n gaar u toonn yiar na.
9 Ŋaant ki u waas n teen kpeebii,
ki u ŋaapoo n teen pakɔɔk.
10 Ŋaant ki u waas n teen miata nba ki mɔk ŋaaki,
ki bi-i kɔɔ langbent nba ni, nisiab n berib ki nyinnib.
11 Ŋaant ki u pandamm n jii u faar kur ki yaat,
ki saamm n jii mɔkint nba kur ki u tun la,
12 ki daa te sɔɔ man nanɔ,
koo ki tin kpeebii nba ki u nyikib na ninbaauku.
13 Ŋaant ki u yaaboona kur n kpo,
ki u sann n bot maarpaanu nba baat na ni.
14 Yennu n tiar u yeejamm biit,
ki daa nyikin chabit u naa biiti.
15 Yennu-ii yɔɔ kii tian bi biit po,
ŋaan ki niib daa tian bi po tiŋ na paak.
16 Jɔɔ maŋ ki ban dukin wun tun ŋanti.
U kpii tarii nan nandamm nan talas damm.
17 U porintir niib mɔi;
ŋaant u mɔpor n ŋmat u paak.
U ki tee piisin niib paaki;
sɔɔ mun daa tee piisin u paak.
18 U poor mɔpora ki li tee nan liant nae;
ŋaant ki u mɔpora na n ŋmat kɔɔ saat
u gbanant ni nan nyun na,
ki mann kɔɔ u kpaba ni nan kpan na.
19 Ŋaant ki lin pinɔ nan chinchenn na,
ki biaki tun kii boobɔ nan gbann na.
20 Yennu, datir n datai tuba biaŋinba na,
binba piak mabiit ki teenin na.
21 Ŋaan fin Yabint Yennu,
a sommin nan faa senn mɔsonn biaŋinba na,
ki fatin, kimaan a lomm nba ŋan na paak.
22 N tee talas nan nandaanɔe, ki n par la daŋ ki li gbatin,
23 N saa bot nan yinyuŋ nba tuu bot daajoouk nae;
wouŋ saa pebirin nan naayinyoorik nae.
24 Kon te ki n duna baŋe,
ki n ji ki tee siar see gbouŋ nan kpaba kɔɔ.
25 Niib-i lan yoo nba, bi laame,
ki pakin bi yura, ki sarikitin.
26 N Yomdaanɔ Yennu, sommitin;
a tinnin, kimaan a lomm nba kaa gbennu na paak.
27 A te ki n datai n bann nan fine tee wunba tintin.
28 Bi-i porintin mɔi, ŋaan a saa teen piisime n paak.
Ŋaant ki man nyann binba biirin na,
ki min nba tee a daabir na n la parpeenn.
29 Ŋaant ki n datai n di fei, ki lia bi fei maŋ nan liatir na.
30 N saa tur Yennu niiposaakauko, ki dontɔ niburchiɔŋ boor,
31 kimaan ŋɔɔe see tarik siak po,
ki nyintɔ binba yaa bin kpiu na nuu ni.