110
Ki jiin Yennu nan u kpanbargaŋir po
1 Yennu din yet n Yomdaanɔ a,
“Karin n niidiitu po mɔkmɔk nan maa tan saa jii a datai
ki teemm a taakpakita.”
2 Yennu sii be Sayɔnn nie ki tant a naangbouŋ.
U yeen a, “Ii dia a datai.”
3 Daar nba ki a saa kɔn nan a datai na, a niib saa somma.
A naasimm saa nyi ki baar a boor, kasii kunkona na paak
nan marin nba tuu baa sanyiɔk ni na.
4 Yennu senn mɔsonjaanne, ki kan ban yakir mɔsonn maŋ paak.
U yet a, “A sii yɔɔ tee manntɔɔe, Melkisedek paabu ni.”
5 Yennu see a diitu po;
u wutoor-i doo yoo nba, u saa nyann kpanbara.
6 U saa bu digbana buut, ki te ki nikpeena lar tɔb ni;
u saa nyann kpanbara tingbouŋ na kur po.
7 Kpanbar na saa nyu kpenu nba be sɔnjokpiŋ na ni,
ki la paŋ ki set ki nyann u datai.