111
Yaŋ nba jiin Yennu dontir po
1 Pakin Yennu man.
N saa jii n par kure ki tur Yennu niipoouk, nibur boor.
2 Yennu toona mɔk bakitnauŋ bonchiann.
Binba kur para mei nan u toona maŋ loon bin bann li paake.
3 U toona kur gbee nan baakir nan yiikooe;
ki u ŋamm kaa gbennu.
4 Yennu ki te ki ti tammit u yaarlituk toona po;
u mɔk burchint nan ninbatinu.
5 Ŋɔɔe teen binba baakitɔ na jeet; u ki tammit u mɔlor na po.
6 U jii boorganu tiŋe ki tur u niib
a lin wann u niib maŋ u yiikoo nba yab biaŋinba.
7 U ŋane toona nba kur ki u tuun ni, ki dia mamɔmm,
ki u sennii tee senn chinchiba.
8 U sennii yɔɔ be-e,
kimaan u din tur sennii maŋ mamɔmm nan kasii niŋe.
9 Ŋɔɔe fat u niib ki ŋaab yann,
ki lor namm mɔlor nba sii be yaayoo siiyoo.
U tee kasii nan yabint daanɔe.
10 Yentinue tee yanfoon pinpiik,
ki binba kur waa u sennii na mɔk bannu.
Dontir-ii tee u yar yoo kur.