112
Ki jiin niŋanɔ parpeenn po
1 Pakin Yennu man.
Parpeenn be daanɔ nba baakit Yennu paak,
wunba kpamm nan Yennu sennii dianu.
2 Niŋanɔ waas sii mɔk yiikooe tiŋ na ni;
ki piisin be u yaaboona paak.
3 U ŋaateeb sii tee gordamme ki mɔk mɔkint,
ki mɔkitir yoo kur.
4 Yentu tuu yent bunbɔnn nie ki tur niŋamm,
nan binba tee ninbatinna, nan burchimm,
nan popeendamm na.
5 Parpeenn be daanɔ nba nuu yaa
ki u kpentir bona ki teen niib,
ki bia dia barmɔnii ki tuun u toona na paak.
6 Niŋanɔ kan ban baa, bi sii yɔɔ tian u poe.
7 U ki tiin jaŋmaanii nan lababiiuk gbatu;
u yada mɔk paŋ, ki u dindann be Yennu boor.
8 U ki be parbiir ni koo ki mɔk jaŋmaanii;
ki li joontu, u mi nan u saa nyann u dataiwa.
9 U nuu yaa, ki u piin tarii piinii;
ki u burchint na kan ban gbenn,
ki u mɔk yiikoo ki laat chɔruŋ.
10 Nibiit na tuu la nnae ki bi wutoor n do;
ki bi liatir nan naŋ ki saa kpo;
ki bi dindann kur n bot tarrr.