113
Dontir nba jiin Yennu ŋant po
1 Pakin Yennu man.
Yimm nba tee Yennu toontunna kur n pak dont u sann man.
2 Ti pak dont u sann mɔtana nan yoo nba kur waa.
3 Laa nyii yonput po ki saan tuu yonbaa po,
ii pak dont Yennu sann man.
4 Yennu-e dia digbana kur, u baakir doo gar sanpaaka.
5 Sɔɔ kaa ki tee nan ti Yomdaanɔ Yennu na,
u be Yendɔuŋ niewa,
6 ŋaan tuu tibin ki la sanpaak nan tiŋ.
7 U tuu fiin talas damm tanbiinii nie,
ki nyinn nandamm na bi ninbaatir ni,
8 ki te ŋamm nan yudamm lakin be,
binba tee u niib yudamm na.
9 U te ki pookanmatir mar waase,
ki be u ŋaak ni ki mɔk parpeenn.
Pakin Yennu man.