116
Wunba ki Yennu nyinnɔ kuun ni na Yenpaku
1 N loon Yennu, kimaan u gbia n fabinii,
u gbiintir n miaru.
2 Yoo kur mi-i yiin, u tuu gbiint ki turime.
3 Kuun bo lintime, ki kaauk ni tonu baarin,
ki jaŋmaanii nan dudukit kɔɔn.
4 Ŋanne ki n yiin Yennu ki yet a,
“Yennu, n barimae ki a tinnin.”
5 Yennu tee ninbatinnɔe ki bia ŋan.
Ti Yennu tee ninkpabauŋ Yennu-e.
6 Yennu-e guu binba kaa guuteeb na;
maa bo be daŋ ni, u tinnime.
7 N par, ii ji kii foi, kimaan Yennu ŋan turin.
8 Yennu nyinnin kuun ni,
ki fiar n ninnyuut, ki bia te ki bi ki nyannimi.
9 Li paak ki n somm Yennu tɔɔnn, footib boor ni.
10 N mɔk yadae yoo kur, halii yoo nba ki n lek yet a,
“N poŋ kpo gbenna.”
11 Halii yoo nba ki jaŋmaanii soorin ki n yet a,
“Sɔɔ kaa ki jaŋ nan bin teenɔ yada.”
12 N saa tur Yennu bee
u ŋamm nba kur ki u tun ki turin na paaki?
13 N saa baar nan daame ki tan pi Yennu piinii,
ki turɔ niipoouk, waa tinnin na paak.
14 U niburchiɔŋ na sinsuuk nie ki n saa turɔ
maa senn mɔsonn nan n saa turɔ linba na.
15 Yennu nirɔ yenɔkɔɔ-i kpo, li tuu yiar Yennu bonchiann.
16 Yennu, n tee a toontunnɔe;
n tuun a toonn nan n naa nba din tuun biaŋinba nae.
Fine nyinnin kuun ni.
17 N saa tura niipoouk maruŋo ki jii n miaru ki tura.
18-19 A niib sinsuuk ni, a kasii ŋasaakak ni, Jerusalem-e,
ki n saa tura linba ki n senn mɔsonn nan n saa tura na.
Pakin Yennu man.