115
Ki jiin Yen-yemmir nba tee barmɔnii Yennu na po
1 Yennu, fin kuukɔɔe, ki baakir saa baar a boor,
ŋaan li kan baar ti boor kaa,
kimaan a lomm nba kaa gbennu nan a barmɔnii na paak.
2 Bee ki digbana sii boit a, “I Yennu na be lee?”
3 Ti Yennu be yendɔuŋ ni; u tuun linba kur ki u loone.
4 Digbana na yenbis na ŋarin,
bi jii salimmɔna nan salimpeenae ki namm,
niibe jii bi nii ki namm.
5 Bi yenbis maŋ mɔk mɔi, ŋaan kan fit pak,
ki bia mɔk ninbina, ŋaan ki laati.
6 Bi mɔk tuba, ŋaan kan fit gbat,
ki mɔk miana, ŋaan kan fit gbat nubiru.
7 Bi mɔk nii, ŋaan kan fit soor siar,
ki bia mɔk taa, ŋaan kan fit sommi,
bi ki mɔk manfoori.
8 Binba maa yenbis maŋ nan binba teen yenbis maŋ yada,
bi mɔŋ sii tee nan yenbis maŋ nae.
9 Yimm Israel teeb, ii teen Yennu yada,
ŋɔɔe sommiti ki guui.
10 Yimm Yennu mannteeb, ii teen Yennu yada,
ŋɔɔe sommiti ki guui.
11 Yimm nba kur jiantir Yennu na, ii teenɔ yada man,
ŋɔɔe sommiti ki guui.
12 Yennu tian ti po ki saa teen piisin ti paak;
u saa teen piisin Israel teeb kur,
nan ŋɔɔ Yennu mannteeb kur paak.
13 U saa teen piisin binba kur baakitɔ na paak,
li paarib nan tarii kur paak yomm.
14 Yennu n turi waas, yimm nan i yaaboona.
15 Yennu nba nan sanpaak nan tiŋ na n teen piisin i paak.
16 Sanpaak tee Yennu kuukɔɔ yare,
ŋaan u jii tingbouŋo ki tur nisaarik.
17 Kpeemm kan fit pak dont Yennu;
wunba sik kpeentiŋ kan fit pak dont Yennu,
18 ŋaan timm nba fo nae saa tur Yennu niipoouk
mɔtana nan yoo nba kur waa.
Pakin Yennu man.