137
Israel teeb yommisin ni fabinii
1 Babilonn mɔka boore ki ti kar tiŋ ni,
leŋe ki ti tiar Sayɔnn po, ki bui,
2 ki lakin ti bonfifaat tiinii nba be leŋ na paak.
3 Ki binba kɔn ki nyannit na betit a tii yiin yanii;
bi loon tii maŋit bi para, ki yetit a,
“Ii yiin yanii nba jiin Sayɔnn po.”
4 Ti saa teen nlee ki yin yanii ki tur Yennu, boorganu tiŋ ni?
5 Mi-i tamm Jerusalem po, n ji daa fit faa kɔnn.
6 Mi-i kii tiar a po,
li-i tee ki n ki tiar nan fine tee n parpeenn nba gbeŋ,
n ji daa fit yiin yanii.
7 Yennu, tiat Edom teeb nba din tun linba,
daar nba ki ti datai nyann Jerusalem na.
Tiat baa din yeen a, “Yeetir ki sikinir tiŋ ni.”
8 Babilonn doo, bi saa biirawa.
Parpeenn sii be daansɔɔ nba pa-a
faa daan tun linba ki turit na paak,
9 wunba saa jii a sanpantii ki jaatib tana paake.