138
Ki jiin niipoturu Yenmiaru po
1 Yennu, n teena niipoouk nan n par kur;
n yiin ki dontira malakanba kur boor.
2 N gbaan ki took a kasii ŋasaakak na,
ki dont a sann, kimaan a lomm nba kaa gbennu,
nan a mamɔmm na paak,
kimaan a wann nan a sann nan a sennii mɔk yiikoo
ki gar bont kur.
3 Mi-i yiina yoo nba, a teenin gatu,
a jikit a paŋ nae ki kɔɔntin paŋ.
4 Yennu, durinya kpanbara kur saa kpakita,
kimaan bi gbat a mɔsona nawa.
5 Bi saa yin yanii ki jiin linba ki a tun na po
nan a baakchiɔŋ na po.
6 Faa lek be sanpaapowa na, ŋaan a baka be tarii po,
karinbaandamm na kan fit bɔr ki a daa laatibi.
7 Daamii-i lintin yoo nba, a tuu fatime,
a tuu biir n datawutodamm nae, ŋaan jii a paŋ ki tinnin.
8 A saa tun linba kur ki a senn mɔsonn nan a saa tun nawa.
Yennu, a lomm kaa gbennu, gbent toonn nba ki a piin na.