139
Ki jiin Yennu yanchiɔŋ nan gotŋanu po
1 Yennu, a fiitirime ki mi maa tee biaŋinba.
2 A mi linba kur ki n tuun;
fi-i lekii be banfɔkira, ŋaan a bant n dudukit.
3 Maa tuun toonni, maa foi-i, ŋaan a laatime, a mi n toona kur.
4 N tuu tan piak na ki poŋ sɔɔ ki a mi maa saa pak linba.
5 A ŋaa lint n munn poe; ki tuu jii a paŋ ki nyinnin daamii ni.
6 Faa min biaŋinba, li sumii bonchiann, ki gar n bannuwa.
7 N saa saan lee ki a kan lami? N saa tɔkin lee ki bot a boori?
8 Mi-i doo sanpanaagbeŋ, a poŋ be leŋe,
mi-i sik kpeentiŋ, ki a be leŋ.
9 Mi-i yukir nan nɔɔŋ na ki saan yondopo,
koo ki be yonbaapo banfɔkira,
10 a poŋ be-e ki saa gar n tɔɔnn ki sommin.
11 N bo saa yet bunbɔnne ki wun bɔrin,
koo yentu ki wun kpant nyiɔk,
12 ŋaan bunbɔnn ki bɔn a boori,
nyiɔk yeen nan yonnu ni nae ki tura.
Bunbɔnn nan yentu tee yomme a boor.
13 Fine nan n gbanant kur;
fine taan n gbanant, n naa poor ni.
14 N dontira, kimaan faa namin biaŋinba,
li mɔk bakitnauŋ nan yaarlituk,
linba ki a tuun kur tee bonsaanne, ki bia tee bakitnauŋ.
N mir nan n par kur.
15 Yoo nba ki a din nan n kpaba ki taanir
ki dekin birir soon nna, n naa poor ni,
siaminba ki n bɔr ki kpaatir na,
a poŋ din mi nan n be leŋ.
16 A din lamewa ki bi tan marin.
Daa nba ki n sii be n manfoor ni,
li poŋ sɔbe ki dɔɔ a gbouŋ niewa,
ki n tan baar durinya na ni.
17 Yennu, n la nan a dudukit ŋan bonchiann ki turin,
ki bia yab bonchiann.
18 Mi-i kan a dudukit, li sii yab ki gar tanbiinii.
Mi-i fiir gɔɔn ni, n be a boore.
19 Yennu, n sunman ki a kpii biitdamm nawa.
N sunman ki nikpiirit na yaat n boora.
20 Bi piak biite ki jiin a po, ki piak biir a sann.
21 Yennu, n ki loon binba ki loona na,
ki bia yisin binba yêen a mɔb na bonchiann.
22 N namm nanmɔŋe, ki jikitib ki bi tee n datai.
23 Yennu, fiitirin ki bann n yan ni,
bikintin ki bann n dudukit nba tee.
24 Gotir ki laan biit be nni-i,
ki fan ŋmakitin manfokangbennuk sɔnu ni.