140
Yenmiaru nba saa gɔɔr bonbiir
1 Yennu, fatirin biitdamm nuu ni.
A nyinnin kpikpirukdamm boor ni.
2 Yoo kur bi lorin biite, ki baat nan kɔna yoo kur.
3 Bi mɔi ton nan waalabirii yara nae,
ki bi maan ton nan waajiɔŋ lɔbit na.
4 Yennu, nyintin biit damm paŋ ni,
ki bia gɔɔrin nikpiirit boor, binba lorin n baak po na.
5 Karinbaandamm pii baruko ki guunin;
bi pii tanbarae ki birin barit sɔnjouk ni, a bin soorin.
6 N yeen Yennu a, “Fine tee n Yennu.”
Yennu, gbiintir mɔnii nba ki n mɔ ki loon sommir na.
7 N Yomdaanɔ Yennu nba tee n fat-tɔɔ na,
fine nyinnin tɔb ni.
8 Yennu, a daa teen biitdamm na baa loon linba;
a daa te ki bi laat nyannu bi lorbiit ni.
9 A daa te ki n datai na laat nyannu;
a te ki bi lorbiit nba ki bi lor n paak na n ŋmat baa bi paak.
10 Ŋaant ki musankɔɔna n baa bi paak;
ŋaant ki bin baa bootuk ni ki ji daa mi do.
11 Daa te ki binba fa faak ki paa leeb na laat nyannu;
ŋaant ki biit n nyann kpikpirukdamm ki biirib.
12 Yennu, n mi nan fine taant tarii po,
ki sommit binba be daamii ni.
13 Popeendamm na set saa dontawa, bi sii be a boore.