144
Kpanbar nba teen Yennu niipoouk ki jiin nyannu po
1 Pakin Yennu nba tee n guutɔɔ na.
Ŋɔɔe tumiin tɔb faanu, ki te ki n teen siir ki guu kɔnn.
2 Ŋɔɔe tee n gaartɔɔ nan n guutɔɔ,
ŋɔɔe tee n sindandiiuk nan n tinntɔɔ;
n tinnu dindann be u nie,
ŋɔɔe sikin digbana tiŋ ni ki turin.
3 Yennu, nisaarik tee bee ki a fiin u po,
nisaarik mun ki a baka be u ni?
4 Nisaarik tee nan foon nae,
ki u daa gaar nan yinyuŋ nba gaar na.
5 Yennu, bɔkitir sanpagbouŋ ki sik;
a sii jɔjaana na ki munyuut n nyi bi ni.
6 Tumin sanyikintii ki lin yat a datai.
A tɔ a peenii na ki a datai n chiar.
7 Tantir a nuu ki sikin tiŋ ni,
ki datin ki nyinnin nyunsunsuŋ ni ki fatin,
ki nyinnin boorganu nuu ni,
8 boorganu nba ki piak barmɔnii,
ŋaan fa faak kuukɔɔ nan bi mɔpora niwa na.
9 Yennu, n saa yin yanpaaŋ ki tura,
n saa faa kɔnn ki yin yaŋ ki tura.
10 Fine tur kpanbara nyannu,
ki tinn a toontunnɔ Defid, ki u nyii takoobporimii ni.
11 Nyintin n databiit nuu ni, nyintin boorganu yiikoo ni;
boorganu nba ki piak barmɔnii,
ŋaan fa faak kuukɔɔ nan bi mɔpora niwa na.
12 Ŋaant ki ti bonjai nba be bi paauŋ ni na n kpaat
nan bonbuburit nba kpaatir nan paŋ biaŋinba na.
Ŋaant ki ti bonpoi-ii tee nan kpanbar ŋaadachaata
nba be lɔtii ni ki faŋit kpanbar ŋaak biaŋinba na.
13 Ŋaant ki ti boa n gbee nan jebooru kur,
ŋaant ki ti pei n mar pebis tusaa piik piik.
14 Ŋaant ki ti bonkobit n pɔt bonchiann,
ki daa miin, koo ki kpenni.
A daa te ki parbiir mɔŋ be ti doo sɔnii ni.
15 Parpeenn be digbann nba ki maan na tee mɔnii
ki turib na paak;
parpeenn be niib nba ki bi Yomdaanɔ tee Yennu na paak.