145
Dontir yaŋ
1 Yennu nba tee n kpanbar, n saa mɔɔnt a yabint;
n saa tura niipoouk mɔkmɔk nan mɔkmɔk.
2 N sii teena niipoouk daar kur, n saa donta yaayoo siiyoo.
3 Yennu tee Yenjaanne, li ŋan ki tin donnɔ sanpaapo.
U yabint na gar nisaarik bannuwa.
4 Maaryenn tuu saa wann maarleer na
fin Yennu nba tun linba, ki donta,
bi saa mɔɔnt a toonjaana,
5 ki pak a baakir nan a yabint po,
ki n sii dukii a bakitnauŋ toona po.
6 Niib saa pak a toonjaana po, ki man mɔɔnt a yabint po.
7 Bi saa pak a ŋamm kur po,
ki yin yanii ki jiin a popeensin po.
8 Yennu mɔk lomm nan ninbatinu,
u wutoor ki do yian, ki u lomm bia kaa gbennu.
9 U ŋane ki tur sɔɔ kur,
ki mɔk ninkpabauŋ u naamii kur paak.
10 Yennu, a naamii kur saa dont a sann,
ki a niib kur saa tura niipoouk.
11 Bi saa pak a naan baakir paŋ po, ki wann a yabint po,
12 ki lin te sɔɔ kur n bann a paŋ toona,
nan a naangbouŋ baakir nan yiikoo po.
13 A naan kaa gbennu, ki a sii yɔɔ dia a niib.
Yennu see u mɔsona paake,
ki mɔk ninbatinu u toona kur ni.
14 U sommit binba be daamii nie, ki fiint binba baa na.
15 Bonfoor kur dindann maa a paake,
ki a teemm jeet yoo nba kur ki bi loon.
16 A tuu tur ki lin jaŋibe, ki gboont sɔɔ kur.
17 Yennu toona kur ŋane,
ki u bia mɔk ninbatinu, u toona kur ni.
18 Yennu ki fɔk nan binba kur yiu na,
binba yiu nan bi para kur na.
19 Ŋɔɔe teen binba teenɔ baakir na bi bonloŋa,
u gbia bi fabinii ki tuu tinnib.
20 Ŋɔɔe guu binba loonɔ na kur,
ŋaan u saa biir biit damm nawa.
21 N sii yɔɔ piak Yennu-e;
ŋaant ki u naamii kur n pak dont u kasii sann
yaayoo nan yaayoo.