3
1 Ki n dɔɔ gado paak nyɔtunmunn,
ki kpaan daanɔ nba ki n par lakib u paak;
ki lin lommɔ ŋaan ki lau.
2 N ji saa fiire ki lin doo ni, ki got li sɔnjot ni nan dai ni.
N saa kpaan daanɔ nba ki n par lakib u paak nae.
Ŋanne ki n lin kpaanɔ, ŋaan ki ki lau.
3 Ki nyiɔk guuteeb tan lan, yoo nba ki bi lin gɔnt doo na na.
Ki n boib a, “I la n yɔɔk-ii?”
4 Maa gar guuteeb na yoo nba, ki n ji la n yɔɔk.
Ki n kubɔ, ki ji kan ŋaan ki wun yaat,
see ki n tan jiiu ki saan nanɔ n naa ŋaak,
ki kɔɔ nanɔ diiuk nba ki bi din marin na ni.
5 Jerusalem poob, satir mɔb nanin,
ii sat mɔb nan piarɔ koo kɔɔk nba tiin bonchiann na sann ni
nan i kan te lomm n baar, ŋaan ki li yoo daa ki baari.
Yaŋ nba pukin muntaa
Poo lomm yaŋ
6 Wunba nyii kunkoouk po ki tee nan munyutootir,
ki puk tulaarii nan bonnunubit nba tee mir,
ki tee tulaarii nba kur ki kpinkpenta kɔi na tee ŋmee?
7 Solomonn-e baat, ki kar u naan kok paak, ki bi jiiu,
ki Israel teeb kunkɔnkɔnjaana piinloob be u boor.
8 Ki bi kur dia jukbanjai, ki mi kɔnn fanu.
Ki sɔɔ kur dia u jukbanjiak,
ki teen siir ki guu kpikpiruk nba tan saa mann baar nyiɔk.
9 Kpanbar Solomonn din jii daŋant nba nyii Lebanonn-e,
ki ŋamm naan kok na.
10 U din jii salimpeenae ki pɔr li dasenta,
ki pɔr li musura po nan salimmɔna,
ki jii chab mɔnwuwur nba ki Jerusalem poob nyar nan burchint na,
ki paan u kok na paak.
11 Sayɔnn poob, baat ki tan barii kpanbar Solomonn.
U yir naan fokirik nba ki u naa din yirimɔ, u pookɔɔnt daar nae,
ki li tee u parpeenn nan kpinkpammuk daar na.