4
Jɔɔ lomm yaŋ
1 N yɔɔk, a mantik fan bonchiann.
A ninbina nba ki saarik dɔɔk na nyirii nan lomm,
ki a yut na lian ki tee nan buunii nba tuu yab
ki nyi Gilead kunkonn paak ki siik biaŋinba na.
2 A nyana peen nan baa tuu koor pei ki wurib biaŋinba na,
ki nan nyan-yenn na ki fokiti, ki li kur tɔɔ leer paak.
3 A mɔgbana mɔne nan kpinkpamɔnn na.
Fi-i piak yoo nba, ki li mɔk fant.
A tankpina nba ki saarik dɔɔk nan nyiriie.
4 A turu tee nan Defid difoouk nba ki bi maar ki li fan nae,
ki mɔk tuliat nba tee nan naagbankɔŋa tusire jɔɔn
ki lint li kur po na.
5 A biaa na tee nan piarii banlee di tutubira ni na.
6 N sii be bonnunubit nba ki bi yir mir na kunkonn paake,
ki li-i taŋi yentir ki bunbɔnn na n bot.
7 N yɔɔk, a fan bonchiann, ki a siar po ki gbeen.
8 N pooyookir, a lakin tɔk nanin, ki tin nyi Lebanonn kunkona ni,
a tɔk nyi nanin Lebanonn.
A nyi Amana kunkonn paak ki sik baar,
ki bia nyi Senir kunkonn nan Hermonn kunkonn paak,
ki li tee siaminba ki yanbɔra nan naamuut be na.
9 N pooloŋir, n pooyookir, a ninbina nan tuliat
nba ki a lia na yent n dudukita.
10 N pooloŋir, n pooyookir, a lomm na manin,
a lomm na ŋan gar daama,
a tulaarii na nubiru man ki gar bonnunubit nba bewa.
11 N yɔɔk, siat manu na be a mɔgbana paak;
a lamm na tee naabiin nan siate n boor.
A liant na nubir nan bonnunubit kur nba be Lebanonn nae.
12 N pooloŋir, n pooyookir, a tee nan kpaab nba bɔr nae,
ki tee nan kpaab nba ki bi maa joonn ki lintir,
ki tee nan nyuntonn nba tee niyenɔkɔɔ yar na.
13 Leŋe ki bonbuburit bintir,
ki kpaatir nan tilontii nba loon lɔɔnŋana,
nan bonnunubit nba kur be.
14 Ki kadaak nan jangbadui nyɔr leŋ,
nan kamantos tiinii nan kinkakimana nan poru
nan bonnunubit booru kur nba be nyɔr leŋ,
ki bonnunubit nba tee mir nan alos
nan bonnunubit kur nba nubiru man be leŋ.
15 Ki nyuntona maant kpaab na,
ki bunii nyun nyi Lebanonn kunkona ni
ki puub nan paŋ ki kɔɔ kpaab na ni.
Poo lomm yaŋ
16 Niigaŋ po wouŋ, fiit.
Niidiitu po wouŋ, damin n kpaab paak,
ki te wamaasin n da nan nubiru nba man.
Ŋaant ki n yɔɔk n saan u kpaab ni ki saa di tilɔɔna nba man.
Jɔɔ lomm yaŋ