4 Wayah itu, urang bajurut-jurut matan banyak kuta mancariꞌi Nabi Isa. Imbah saling banyakan urangnya, lalu Sidin bamula bakisah. 5 “Nah, ada satu kisah” ujar Nabi Isa. “Saikung patani mahambur banih di ladangnya. Sapalih gugur di jalanan, lalu tajajak urang, wan dipatuk burung sampai lingis. 6 Sapalih gugur di babatuan. Banih nang itu tumbuh. Lalu layu lantaran tanahnya kadada banyunya. 7 Sapalih gugur di kumpai baduri. Tapi kumpainya nang manang. 8 Sisanya gugur di tanah subur. Tumbuh ai lalu babuah, saratus kali lipat pada nang dihamburakan” ujar Nabi Isa. “Ingatakan ja pandiranku tadi” ujar Nabi Isa manambahi.

11 “Ini nah arti kisah tadi” ujar Nabi Isa manjalasakan. “Banih nang itu tadi, Pirman Allah. 12 Banih nang tagugur di jalanan tadi, urang nang mandangarakan Pirman Allah. Tapi lantaran Iblis datang wan marampas Pirman tadi matan hati urang tu, urang tadi kada parcaya wan kada disalamatakan matan hukuman dusanya. 13 Banih nang tagugur di babatuan tu, urang nang mandangar Pirman tadi wan himung manarimanya. Tapi nang kaya banih nang akarnya kada kawa tumbuh lagi, inya parcaya satumat haja. Lantaran hidupnya magin ngalih, inya kada parcaya lagi. 14 Banih nang tagugur di kumpai baduri tu, urang nang mandangar haja. Lalu nang kaya banih kalah wan kumpai tadi, inya kalah lantaran inya mamantingakan hal hal duniawi haja lalu inya kada taat lagi wan Pirman Allah. 15 Banih nang tagugur di tanah subur tu, urang nang mandangar Pirman tadi lalu maingatakannya tarus sampai bujur bujur taat. Lalu nang kaya banih nang babuah, inya cangkal babuat baik.”