18 Wayah Nabi Isa lagi badoa saurangan, bubuhan pangikut Sidin baparak. “Ujar urang, Aku ni siapa?” ujar Nabi Isa batakun lawan bubuhannya. 19 “Ada nang manyambat Pian Nabi Yahya, nang lain manyambat Pian Nabi Ilyas. Ada jua nang manyambat Pian salah saurang nabi, nang hidup pulang” ujar bubuhannya manyahut. 20 “Tapi amun bubuhan ikam pang, Aku ni siapa?” ujar Nabi Isa batakun pulang.

“Pian ni Al Masih nang dijanjiakan Allah!” ujar Petrus manyahut.*9:20 Dalam kitab Taurat, Al Masih adalah urang nang hidupnya samata-mata manjalankan palayanan suci gasan Allah. Sidin dibari kuasa ulih Allah gasan manjalankan palayanan itu. Wayah itu, Petrus wan urang-urang lain nang juriat Nabi Ibrahim maharapakan banar Al Masih datang sabagai raja nang manarusakan raja Daud nang pacangan mambibasakan rakyatnya matan panjajahan musuh nang manyambah barhala. Dalam Al Quran ada tatulis istilah Al Masih nang disambatakan gasan nabi Isa haja (Al-Imran 3:45, An-Nisa 4:157,171,172, Al-Maidah 5:17, 72, Al-Tawbah, Al-Baraah 9:30, 31).

23 Wayah itu, Nabi Isa baucap wan bubuhan pangikut Sidin wan urang banyak nang bakumpul di situ, “Amun urang handak manjadi pangikutKu, saban hari inya harus mambuang kahandaknya saurang. Lawan pulang, saban hari inya harus sanggup disambati, sanggup mandarita wan sanggup mati kalu inya handak umpat Aku. 24 Sualnya nang kada sanggup mati lantaran umpat Aku, inya cagaran kada salamat. Tapi nang sanggup mati lantaran umpat Aku, inya salamat di ahirat kaina. 25 Amun ikam panyugihnya di dunia ini, tapi masuk naraka lantaran manolak Aku, napa untungnya gasan ikam? Kadada untungnya! 26 Amun urang supan maakui Aku wan ajaranKu, Aku gin, nang datang matan surga, supan jua maakui inya wayah Aku datang pulang ka dunia ini lawan malaikat malaikat Allah. Wayah itu samunyaan urang cagar malihat kuasa wan tarangKu, kuasa wan tarang Abah di surga, wan kuasa wan tarang malaikat malaikat-Nya.” 27 Sabujurannya antara bubuhan ikam, ada nang kada pacangan mati sabalum malihat karajaan Allah.