25 Wayah itu, ada saikung guru agama juriat Nabi Ibrahim nang badiri handak manjabak Nabi Isa lawan tatakunan. “Guru, kayapa caranya sakira aku baulihi hidup nang salawasan di surga?” ujar guru agama tadi batakun. 26 “Apa jar Kitab Suci Taurat? Napa nang tatulis di situ?” ujar Nabi Isa balas batakun. 27 “Kita musti sayangi Allah lawan saganap hati, saganap jiwa, saganap kakuatan wan saganap akal budi. Lawan pulang, kita musti sayangi papadaan nang kaya kita sayangi diri kita saurang” ujar guru agama tadi manyahut. 28 “Bujur pian ni. Turuti ja, kaina pian cagar baulihi hidup nang salawasan di surga” ujar Nabi Isa.

29 “Lalu siapa papadaanku nang harus kusayangi?” balas guru agama tadi kada hakun kalah pandir. 30 “Nah, ada satu kisah,” ujar Nabi Isa manyahut. “Ada saikung lalakian turun matan kota Yarusalem ka kota Yeriko. Inya dipukuli, ditalanjangi, wan dirampok. Wayah inya sudah parak mati, inya ditinggalakan. 31 Kabulujuran, datang saikung imam lalu di situ. Imbah maitihi urang tadi, inya maliung wan bajalan tarus. 32 Kaya itu jua saikung urang nang bagawi di bait Allah. Inya maitihi urang tadi jua, tagal inya gin maliung jua wan bajalan tarus. 33 Imbah itu, datang saikung urang Samaria nang lalu disitu jua. Rahatan maitihi urang tadi, inya maras banar. 34 Diparakinya urang tadi, dibarasihinya lukanya pakai ubat tradisional.*10:34 Ubat tradisional disini adalah 'banyu anggur wan minyak zaitun'. Lalu, dibabatnya lukanya. Imbah itu, urang tu dinaikakannya ka atas kaladai tunggangannya saurang lalu dibawa ka panginapan sakira kawa dirawatnya.†10:34 Kaladai di sini adalah kaladai urang Samaria. 35 Isuknya, pas handak tulak, inya manjulung duit ka ampun panginapan. ‘Rawatakan inya, kaina kugantiꞌi samunyaan ungkusnya’ ujar urang Samaria tadi. 36 Nah, kaya itu pang kisahnya. Jadi nang mana di antara talu ikung tadi nang balaku sabagai papadaan ka urang nang dirampuk tadi?” ujar Nabi Isa batakun wan bubuhan nang mandangarakan Sidin. 37 “Urang nang sudah manulung tu,” ujar guru agama tadi manyahut.

“Nah, tulak ja wan lakuakan nang kaya itu jua” ujar Nabi Isa.