8 Wayah itu, Nabi Isa malajari bubuhan pangikut Sidin. “Baingat-ingatlah,” ujar Nabi Isa. “Jangan sampai bubuhan ikam dibunguli manganai napa nang cagar tajadi. Sualnya banyak urang cagar datangan, mamakai ngaran-Ku, wan baucap, ‘Akulah Isa Al Masih! Hari kiamat sudah parak.’ Tapi jangan maumpati pangaramput pangaramput nang itu. 9 Lawan pulang, kada usah gair wayah bubuhan ikam mandangar habar tantang paparangan wan karusuhan. Sualnya hal hal nang kaya itu musti tajadi, tapi wayah itu hari kiamat baluman parak. 10 Bangsa bangsa cagaran bakalahian. 11 Gampa bumi, bahaya kalaparan, wan wabah panyakit cagar ada di mana-mana. Hal-hal nang manakutanakan cagar bacungulan di langit.”

25 “Kaina di matahari, bulan wan bintang-bintang cagaran kalihatan ciri-cirinya. Dibumi, bangsa-bangsa cagar takutanan wan kabingungan mahadapi hamukan laut. 26 Manusia cagar kabuliangan wan siupan mahadapi napa napa nang cagar tajadi di saluruh dunia ini, sabab banda banda di langit cagar manjadi kuncang kirap. 27 Rahatan nitu am, Aku, nang datang matan surga, cagaran datang didalam rakun nang liwar tarangnya. Lalu Aku cagaran bakuasa atas samunyaan urang. 28 Wayah masalah nitu mulai tajadi, bahimunglah wan parcaya ja. Sualnya satumat lagi bubuhan ikam cagaran disalamatakan.”