47 Wayah itu sudah landung malam. Sagalumukan urang datangan ka Nabi Isa wayah Sidin masih bapandiran lawan bubuhan pangikut Sidin. Bubuhannya tadi dipimpin ulih Yudas nang dahulunya saikung pangikut Sidin. Nabi Isa diparakinya lalu diciumnya. 48 “Yudas, Aku sadih banar purunnya ikam mahianati Aku, nang datang matan surga, apalagi lawan ciuman parsahabatan” ujar Nabi Isa. 49 Pas malihat kajadian nang itu, bubuhan pangikut Sidin hanyar paham amun Nabi Isa satumat lagi cagar ditangkap urang. “Guru, biar kami lawan haja!” ujar bubuhan pangikut Sidin. 50 Lalu saikung pangikut Sidin manyarang saikung hamba katua imam imam juriat Nabi Ibrahim. Talinga kanan ditataknya. 51 “Ampih!” ujar Nabi Isa managur pangikut Sidin tadi. Lalu dijapai Sidin talinga urang tadi. Langsung waras. 52 Nang dibawa Yudas ka sana adalah imam imam, panjaga panjaga kaamanan Bait Allah, wan tatuha tatuha matan bubuhan juriat Nabi Ibrahim. Bubuhannya datangan gasan manangkap Nabi Isa. “Aku ni lain panjahat” ujar Nabi Isa wan bubuhannya, “kada usah mambawa parang wan pamangkung! 53 Saban hari, Aku ada lawan bubuhan ikam di Bait Allah. Tapi bubuhan ikam kada manangkap Aku. Tapi hanyar am ini, wayah landung malam, bubuhan ikam manangkap Aku sakahandak hati ikam haja, pas wayah Iblis bakuasa” ujar Nabi Isa pulang.