Rokap na Fafas ulo Iesu Karisito
Luk
i siit u
Orek Famu
Buk igii Luk i siit ta u. Luk biil i neng lon berberat na fafausum ke Iesu, ke biil sabin i sikin Iudaia, i sikin Grik. I tina Entiok na falifu na Siria. Luk biil i par ta foron tier ae Iesu i tel ta u, biil. Fale fanu sau ri fas u ini Iesu.
Luk i nenge dokta, ma i usum rokap na orek Grik. Buk igii i e buk famu ae i siit ta u ma i siit ta Buk Aposel sabin. I siit ta buk igii isi fan Grik rik usum na Rokap na Fafas ulo Iesu le i Tom Fafaliu ken fanu tikii, ma rik unune lo.
Luk i siit u sabin le Iesu i tapiek kaltu toh, ke ka use famais kia usuf foron lauu ke usuf kerer temtem tikii.
I sisiit sabin isi foron tier igii:
Ususefages usuf God,
Rakrakai ken Tanwa Kalkaluu,
Sising,
Liu ken foron lauu ke fanu ae ifuun e minsik kiri.
Buk ke Luk i aragii:
1:1-4 Tanwara na buk igii
1:5-80 Jon Tom tel Bapitaiso i pang
2:1-52 Iesu i pang
3:1-20 Foim ke Jon Tom tel Bapitaiso
3:21—4:13 Iesu i kep bapitaiso ke namih Satan ka tof u
4:14—9:50 Iesu i foim na Galili
9:51—19:27 Fafausum ke Iesu
19:28—23:56 Farfarop na wik, ke minet ke Iesu
24:1-53 Apaptifis ke Iesu ke tatkau kia una kukulii
1
1 Usuf Tiofilus:*Tiofilus kamtina na orek Grik le tala God, le kaltu ae i ier isi God Ifuun e fanu ri totof rakrakai isi rin siit papte foron tier ae i tapiek ta na fatpoto kemem. 2 Fanu ae ri par ta foron tier igii ini kolson matri tina tanwara, ma ri fafas la ini orek ke God, ri fas ta kemem ini foron tier igii. 3 Pesu, iau tom ia ka tatang rokap tah ke ia ka tafe ta foron tier tikii tina tanwara, ma ia wol le i rokap sabin le ian sisiit usuf o, Tiofilus, wo tara kaltu. Ia siit u tom arae i tapiek tah, 4 isi ok usum le foron tier tikii ae ri fausum ta wo ini, i tekentu.
Angelo i Fas Sakaria le Antu in Fang ti Kalalik
5 1Stori 24:10Na aunbiing ae Erot i king na falifu na Iudaia, imel e nenge pris asa e Sakaria, i tina uh na pris ke Abia. Antu, asa e Elisabet, i sabin tina mat ke Aron. 6 Ru turim ru iwun tom tortores na mata God, ma ru misuut la tom na foron orek ke Kumguui ke na foron nagogon kia. 7 Isau le biil ti kalalik kiruh, wara le Elisabet i koros. Ka wok mang ke Sakaria sabin ka tubunkak mang.
8 Nenge biing Sakaria i foim arae pris na mata God, wara le na aunbiing ae, uh na pris ke Sakaria ri tel foim na Felun Tunmapek. 9 Na sinangun foron pris una tim pes se lo ri in kau na Felun Tunmapek, ri fangfang satu ke asa Sakaria ka tapiek. Ma ka kau una palgan Felun Tunmapek ke Kumguui isi ik fasok foron tier ae bau lo i furung rokap. 10 Ma na aunbiing mang una fasok foron tier ae bau lo i furung rokap, gur na fanu ri ka famam sising turim awii na maleh na Felun Tunmapek.
11 Ke nenge angelo ke Kumguui ka tapiek sing i, ma ka soti awii isi mia na salan tunmapek ae ri fasok foron tier ae bau lo i furung rokap la. 12 Aunbiing Sakaria ka par u, ka nananar ma sokeh ka kuruung u. 13 Isau le angelo ae ka tara sing i aragii, “Sakaria! Gong o sokeh. God ka ongen ta sising kiam. Elisabet antum, in fang ti kalalik kiam, ke on foteng u ini Jon. 14 On lala laes ke balam in gesges isi, ma fanu fuun rin laes aunbiing in pang, 15 Namba 6:3wara le in laumet na mata Kumguui. Biil in umin wain la le umin dan rakrakai. Ma in fuun ini Tanwa Kalkaluu aunbiing biil biitom i pang. 16 Ma in lame fafis in fuun e fan Israel usuf Kumguui, God kiri. 17 Malakai 4:5,6In la famu lo Kumguui, ini matngan tanwa ke rakrakai arae Elaija, ke in sokiliis balan foron tamankak isi rik ier isi berberat kiri, ke ik sokiliis wolwol ken foron tom ongen fabulwar isi rik mi na polo na wol ken foron tom tortores. In tel u arae una fageges fanu isi tapiek ke Kumguui.”
18 Ke Sakaria ka diik angelo aragii, “Arafa ian usum arae le tier igii in tapiek? Wara le ia ka tubunkak mang ke antung sabin ka wok mang.”
19 Daniel 8:16; 9:21Ke angelo ka kiliis u aragii, “Ia Gabriel. Ia soti la na mata God, ma i wuun iau isi ian fas wo ini rokap na fafas igii. 20 Ongen u, igii in kut e ngusum ma biil ifasi on orek papang na biing tier igii in suut, wara le biil o unune na foron orek kiak, ae in tapiek na aunbiing tom lo.”
21 Na aunbiing ae, fanu ri ka nene pane Sakaria, ri ka wol pane le, isi sani ka muduung awii na Felun Tunmapek. 22 Aunbiing ka suu fis tina Felun Tunmapek, biil mang ifasi in orek. Ri ka usum ta le i par nenge parpar awii na Felun Tunmapek, wara le i famam fakileng sau ini lima usuf ri, ma ngusu i kut ta tom.
23 Ma aunbiing ka farop foim kia, ka fis una maleh kia. 24 Nami sau, antu Sakaria, Elisabet, ka tian ma na ilim e funiil biil i suu tina fel. 25 Ke ka tarah, “Tier igii Kumguui tom i tel u usuf iau. Ia koros tah, ma na foron biing igii, Kumguui ka mais iau ke ka tel ufu matlawen kiak na matan fanu.”
Angelo i Fas Maria le in Fang Iesu
26 Na fawon u e funiil ke Elisabet, God ka wuun angelo asa e Gabriel una Nasaret na falifu na Galili. 27 Metiu 1:18Ka wuun ufu usuf nenge tah ae biil biitom i borong turan ti kaltu, asa e Maria. Ri fakale ta u isi in telpes nenge kaltu asa e Josep, tina mat ke king Dewit. 28 Ke angelo ka tapiek sing i, ma ka tarah, “Tinier, on laes. Kumguui i kating kanaka wo ma i kiis turam.”
29 Aunbiing Maria i ongen foron orek kia, ka lala purngis e bala ma ka wolpane le, sani e kamtina. 30 Isau le angelo ka tara sing i aragii, “Maria, gong o sokeh. God i laes kanaka ini wo. 31 Metiu 1:21Ongen u. On tian ke ok fang nenge kalalik tamat, ke ok foteng u ini Iesu. 32 2Samuel 7:12,13,16; Aisaia 9:7Asa in laumet, ma rin foteng u ini kalalik ke God Buuii kanaka na Mawe. Ma Kumguui God in luun u na nian kiiskiis an king ke Dewit tama. 33 In nagogon fitliu na mat ke Jekop ma matanfuntih kia biil in to rop.”
34 Maria ka diik angelo ae aragii, “Arafa in tapiek arae e tier igii, wara le biil biitom ia borong ta turan ti kaltu?”
35 Ke angelo ka kiliis u aragii, “Tanwa Kalkaluu in susuef ulo wo, ke rakrakai ke God Buuii kanaka na Mawe ik kumef o. Ke ier ae on fang u, in kalkaluu ma rin foteng u le Kalalik ke God. 36 Par u, sikinting lo wo, Elisabet, ka wok mang. Ri tara la sing i le i koros, isau le igii ka tian mang, ma ka won ta e funiil kia. 37 Stat 18:14Wara le biil ti tier ae God biil ifasi in tel u.”
38 Maria ka kiliis u aragii, “Ia fafauun ke Kumguui. I rokap, ik tapiek arae lo iau, arae tom o ka use ta u.” Ke angelo ae ka la koseng u.
Maria i Laum Elisabet
39 Na aunbiing ae, Maria ka aptih ma ka sangar una nenge maleh na foron pungpung na falifu na Iudaia. 40 Aiwa, ka kau una fel ke Sakaria ma ka faorek pes Elisabet. 41 Aunbiing Elisabet i ongen Maria i faorek pes u, kalalik ae na bala ka miliu ke Elisabet ka fuun ini Tanwa Kalkaluu. 42 Ke ka perek aragii, “O kalok lon kelefin tikii, ke kalalik sabin ae on fang u i kalok. 43 Isau le ia matngan fifin arafa tom ae tina Kumguui kiak ka tapiek sing iau? 44 Aunbiing sau ia ongen o faorek pes iau, kalalik igii na balang ka miliu ini laes. 45 O kalok, wara o unune le sani Kumguui i use ta u usuf o, in suut.”
Seksek ke Maria
46 Ke Maria ka tarah,
“Balang i usefages Kumguui,
47 ke tanwang ka laes ini God,
Tom Fafaliu kiak,
48 1Samuel 1:11wara i mais iau le,
ia nenge fafauun foes sau kia.
Tipesu igii, foron ulul tikii rin use u le ia kalok,
49 wara le, God ae i Rakrakai,
ka tel ta foron tier laumet usuf iau,
ma asa i kalkaluu.
50 Ma famais kia i la usuf fanu ae ri bulat la lo,
tina foron ulul tinpakanini, una foron ulul ae namih.
51 Ka tel ta foron rakrakai na foim ini lima:
Ka tel sarara ta fanu ae wolwol kiri ifuun ini sinangun got.
52 Jop 5:11; 12:19Ka fapu ta foron tom nagogon tina foron nian kiiskiis kiri,
ma ka falaumet fanu ae ri fapuh ri la tom.
53 Ka fen ta fanu ae ri fitol ini foron rokap na tier,
isau le ka wuun ufu ta fanu ae ifuun e minsik kiri ini pungun limri.
tom foim kia,
wara le i wolpes Abaram
turan berberat kia
fitliu ini famais,
arae tom ka use ta u sing
foron tubutamat kerer.”
56 Maria ka melmel tura Elisabet pes ituul e funiil, ke nami ka fis una maleh kia.
Elisabet i Fang Jon Tom tel Bapitaiso
57 Ka aunbiing mang ke Elisabet una fafang, ka fang nenge kalalik tamat. 58 Fanu ae ri mel fatat u turan foron sikinting lo, ri ka ongen u le Kumguui ka finngas tara famais kia usuf Elisabet, ke ri ka laes turim tura.
59 WokPris 12:3Na fawal u e biing ken kalalik, ri ka geges isi rin kiit pununfo, ke ri ka ier isi fafenngo ini Sakaria, tama. 60 Isau le tina ka tarah, “Biil. Rin foteng u ini Jon.”
61 Ri ka tara sing i aragii, “Biil ti sikinting lo wo i kep ta u e as ae.”
62 Ke ri ka fapik tama, isi as sa tom i ier le rin luun u lon kalalik. 63 Sakaria ka tutus isi ti tier in sisiit lo, ke ka siit u le, “Asa e Jon.” Ma fanu tikii ae ri ka lala bitit. 64 Fanpil ngusu ka sapeng, kerme ka malmalos, ke ka tipes orek, ma ka usefages God. 65 Ke fanu tikii ae ri mel fatat ri, ri ka fuun ini sokeh. Ma ususe na foron tier igii ka sarara na foron maleh ae na foron pungpung na falifu na Iudaia. 66 Fanu tikii ae ri ongen u, ri ka lala wol lo, ma ri ka diik aragii, “Kalalik igii in tapiek matngan kalalik arafah?” Wara le lima Kumguui ae lo.
Seksek ke Sakaria
67 Tanwa Kalkaluu i susuef ulo Sakaria, tama Jon, ke ka orek profet aragii,
68 “Ususefages usuf Kumguui,
God ken fan Israel,
wara le ka tapiek ta usuf fanu kia,
ma ka fiil fasengsegeng ri.
69 Ka fapti ta nenge rakrakai na Tom Fafaliu usuf kerer,
tina mat ke Dewit, tom foim kia,
70 arae tom i use ta u na ngusun foron profet kalkaluu kia tinpakanini.
71 Ke in faliu kerer koseng foron tuui kirer,
ke tina liman fanu tikii ae ri ememse kerer.
72 I tel u arae una finngas famais kia
usuf foron tubutamat kerer,
ke isi ik fasuut puput kalkaluu kia,
73 ae i falimlim ta ini
usuf Abaram tubutamat kerer,
74 le in faliu kerer tina liman foron tuui kirer,
isi kerek foim sing i ma biil keren sokeh,
75 ini sinang ae i kalkaluu
ke i tortores na mata
na foron biing tikii ae kere liu lo.
76 Malakai 3:1Ma wo, keng kalalik,
rin foteng o le, o profet ke God Buuii kanaka na Mawe,
wara le on la famu lo Kumguui,
ma ok fageges sal sala,
77 isi famalal fanu kia le God in faliu ri,
aunbiing i pa ufu foron sinang laulau kiri,
78 wara na tara famais ke God kirer.
Pesu, malal tina kukulii in susupiek ulo kerer,
arae pisiih i susupiek na biingbiing.
79 Aisaia 9:2In popos ulon fanu ae ri kiis na kubunor,
ke ulon fanu ae malmaluu na minet i afit ri,
ke ik lame kerer na sal ae i siaroh.”
80 Ke kalalik ae ka laulaumet la, ma ka lala rakrakai na tanwa. Ka mel na falifu foes papang na aunbiing ka tapiek malal usuf fan Israel.
*1:1: Tiofilus kamtina na orek Grik le tala God, le kaltu ae i ier isi God
1:5: 1Stori 24:10
1:15: Namba 6:3
1:17: Malakai 4:5,6
1:19: Daniel 8:16; 9:21
1:32: 2Samuel 7:12,13,16; Aisaia 9:7
1:37: Stat 18:14
1:48: 1Samuel 1:11
1:52: Jop 5:11; 12:19
1:54-55: Stat 17:7; 1Samuel 2:1-10
†1:54-55: Israel i fakileng fan Israel tikii
1:59: WokPris 12:3
1:76: Malakai 3:1
1:79: Aisaia 9:2