Rokap na Fafas ulo Iesu Karisito
Mak
i siit u
Orek Famu
Mak, nenge asa sabin e Jon, i siit ta u e buk igii, ma i kaltu famu una siit Rokap na Fafas ulo Iesu Karisito. Mak biil i neng lon nenge sangful ini u e kalalik na fafausum ke Iesu, biil. Fale fanu ri wol le Mak i ongen ususe lo Iesu sau sing Pita, ke nami ka siit u. Mak i kiis la tom na Ierusalem ke ka par fale tier sabin ae Iesu i tel ta u. Fale tom tasum ri wol le na Mak 14:51-52, Mak i use fafis u tom.
Namih, ka tapiek aragii nenge tom falupes ke Pol ru e Barnabas na foim kiruh (par Aposel 12:25).
Mak i sisiit usuf fan Rom isi rin usum na Rokap na Fafas lo Iesu. Na buk igii, i fas ri le rakrakai ke Iesu i laumet ma ka ier sabin isi rin usum le Iesu sau i e Kalalik ke God.
Mak i siit papte ta ifuun e tier an fabitit ae Iesu i fatapiek ta u turan foron tatawin ae i kalsakai ta u. Isau le biil i to siit papte ifuun e fafausum ke Iesu.
Nenge tier sabin ae Mak i siit u, i aragii: Rakrakai ke Iesu i laumet kanaka lo Satan, ma Iesu i e Tom Fafaliu kirer.
Foron tier ae Mak i siit papte ta u i papang sau na Mak 16:8. Mak 16:9-20 nenge kaltu keskes i siit u.
Buk ke Mak i aragii:
1:1-13 Iesu i tipes foim kia
1:14—9:50 Iesu i foim na Galili
10:1-52 Iesu i la una Ierusalem
11:1—15:47 Farfarop na wik turan minet ke Iesu
16:1-20 Apaptifis ke Iesu
1
Jon Tom tel Bapitaiso i Fageges Sal
Metiu 3:1-12; Luk 3:1-18; Jon 1:19-28
1 Igii e tanwaran Rokap na Fafas ulo Iesu Karisito, Kalalik ke God.
2 Malakai 3:1Orek ke God ae profet Aisaia i siit ta u i tarah,
“Ian wuun famu tom fafas kiak lo wo,
ae in fageges sal salam.”
3 Aisaia 40:3Kinen tikas i tautau na sunbiil aragii,
“Fageges sal sala Kumguui,
fatortores sal sala.”
4 Jon ka tapiek na falifu foes, ka famam baptais fanu ke ka famam fafas sing ri le rin sokiliis liu kiri ma rik kep bapitaiso, isi God ik pa ufu foron sinang laulau kiri. 5 Fanu tina foron maleh tikii na falifu na Iudaia turan fanu tikii tinbae na Ierusalem ri ka la usuf i. Ri ka fapos foron sinang laulau kiri ke Jon ka baptais ri na dan na Ioridan. 6 2King 1:8Jon i kilkiliis la ini kaen ae ri tel u ini olon kamel ke ka fis lifa la ini pus ae ri tel u ini punun bulmakau. Ma i ien sukuuw la turan mindu aka. 7 Ma ka fafas aragii, “Ier ae in mi pes iau, rakrakai kia i liu kulkulef na rakrakai kiak. Pesu, biil ia tortores isi ifasi ian parau ma iak puk ufu finaun su kia. 8 Ia baptais gam ini dan, isau le in baptais gam ini Tanwa Kalkaluu.”
Jon i Baptais Iesu
Metiu 3:13-17; Luk 3:21-22
9 Na aunbiing ae, Iesu ka la tina Nasaret na falifu na Galili ma Jon ka baptais u na dan na Ioridan. 10 Aunbiing Iesu ka apti tina dan, ka par kukulii i sapsapeng la ma Tanwa Kalkaluu ka pu arae nenge bun ulo. 11 Stat 22:2; BukSong 2:7; Aisaia 42:1; Metiu 12:18; Mak 9:7 Ma kinen tikas ka orek tinbae na kukulii aragii, “O keng Kalalik ae ia ier kanaka isi wo. Ia laes kanaka ini wo.”
Satan i Tof Iesu
Metiu 4:1-11; Luk 4:1-13
12 Ma fanpil, Tanwa Kalkaluu ka wuun ufu una sunbiil. 13 Ka kiis pes ifet e sangful e biing aiwa ma Satan ka tof u. Foron muruuw aka sabin tinaiwa, isau le foron angelo ri ka lupes u.
Iesu i Tawi pes ifet e Kalalik na Fafausum Famu kia
Metiu 4:12-22; Luk 4:14-15; 5:1-11
14 Aunbiing ri ka luun ta Jon na felun kamkabet, Iesu ka la una falifu na Galili ma ka famam fafas ini Rokap na Fafas ke God. 15 Metiu 3:2Ke Iesu ka tarah, “Aunbiing ka tapiek tah, matanfuntih ke God ka fatat. Gamen sokiliis liu kimi ma gamek unune na Rokap na Fafas!”
16 Na aunbiing Iesu i tole bulin dan kawil na Galili, ka par Saimon ru latualik e Enru ru linlin ubiin la na dan, wara le ru un tom ienmaket. 17 Ke ka tara sing ru aragii, “Kamu mi lo iau isi iak fausum kamu ini sinangun dat fanu.” 18 Fanpil ru ka la koseng foron ubiin kiruh ke ru ka mi lo Iesu.
19 Iesu i la ituul sau ke ka par iun kalalik ke Sebedi, Jems ru latualik e Jon. Ru tumtumarnge foron ubiin kiru la awii na palgan mon. 20 Fanpil Iesu ka tawi pes ruh, ma ru ka kang koseng temruh turan foron tom foim kiri aiwa na mon ke ru ka mi lo.
Iesu i Tel ufu Tanwa Laulau
Luk 4:31-37
21 Ri ka la una Kapernaum, ma na Biingen Mangeh, Iesu ka kau una felun lotu ma ka tipes fausum fanu. 22 Metiu 7:28,29Fanu tikii ae ri ongen fafausum kia ri ka bitit, wara le biil i fausum ri arae foron tom fafausum ini nagogon ri fausum ri la, biil. I fausum ri aragii kaltu ae God tom i ta rakrakai usuf i. 23 Na aunbiing ae, nenge kaltu aiwa na felun lotu ae tanwa laulau i susuef ulo, ka perek aragii, 24 “Iesu tina Nasaret, sani o ier le on tel u ini kemem? O la isi falaulau kemem? Ia usum le wo e seh. O Kaltu Kalkaluu ke God.”
25 Ke Iesu ka fakiing u aragii, “Babat na ngusum ma ok suu koseng kaltu ae!” 26 Tanwa laulau ae ka gule falaulau kaltu ae, ka lala ngangeh ke ka suu koseng u.
27 Ke fanu tikii aiwa ri ka bitit ma ri ka fadiik faliu ini ri aragii, “Sani aragii? Fafausum fuu ae imel e rakrakai lo? Kaltu igii i fakiing foron tanwa laulau ma ri wong tom sing i.” 28 Ma fanpil, ususe lo Iesu ka sarara na foron falifu tikii na Galili.
Iesu i Faliu Fanu Fuun
Metiu 8:14-17; Luk 4:38-41
29 Fanpil, Iesu turan berberat na fafausum kia ri ka suu tina felun lotu ke ri ka la tura Jems ru e Jon una fel ke Saimon ru e Enru. 30 Tina antu Saimon i borong kiniis ini gogor, ke ri ka fas Iesu ini. 31 Iesu ka la usuf i, ka pose na lima ke ka fapti u. Ke sasem ka rop koseng u ke ka tipes sosok ari.
32 Aunbiing pisiih ka sup ta na efef, fanu ri ka filange fanu tikii ae ri sasem turan fanu tikii ae tanwa laulau i susuef ulo ri usuf Iesu. 33 Ke fanu tikii na tara maleh ri ka tapiek turim una matanfel ae. 34 Ke Iesu ka faliu ifuun e fanu ini marmarsan sasem ma ka tel ufu ifuun e tanwa laulau. Isau le biil i somangat isi foron tanwa laulau rin use ti tier, wara le ri usum le i e seh.
Iesu i Fafas na Galili
Luk 4:42-44
35 Na biingbiing saksak, aunbiing pisiih biil biitom i supiek, Iesu ka aptih, ka suu tina fel ma ka la una nenge kiptin biil isi sising. 36 Ke Saimon turan foron tala ri ka im isi. 37 Ma aunbiing ri ka tafe u, ri ka tarah, “Fanu tikii ri famam im isi wo.”
38 Ke Iesu ka tara sing ri aragii, “Kere mang na ti fale maleh fatat, isi iak fafas sabin aiwa. I e wara ae ia ka la uga.” 39 Metiu 4:23; 9:35I la na foron falifu tikii na Galili. Ka famam fafas na foron felun lotu kiri ke ka tel ufu foron tanwa laulau.
Iesu i Fafuu nenge Kaltu ae i Sem Lepra
Metiu 8:1-4; Luk 5:12-16
40 Nenge kaltu ae i sem lepra ka la, ka ilepul na mata Iesu ma ka sising u aragii, “Male o ier isi, ke ok fafuu*Fan Iudaia ri tara le kaltu ae i sem lepra i duh, ma biil ifasi in la na fatpoton fanu. pes iau.”
41 Iesu ka mais u, ka sawe lima, ka pose lo ke ka tarah, “Ia ier isi. On fuuh!” 42 Fanpil lepra ka rop tina pununfo ke ka tapiek fuuh.
43 Ma Iesu ka wuun ufu ke ka fanau u aragii, 44 WokPris 14:1-32“Ongen u, gong o fas tikas ini sani i tapiek lo wo. Isau le on la ma ok finngas pununfom sing pris ke ok ta fafen kiam usuf God, arae Moses i use ta u isi rik usum le sasem kiam ka rop tah.” 45 Isau le kaltu ae ka la bin ke ka fasarara ususe na foron maleh tikii ini sani i tapiek ta lo. I e wara ae Iesu biil mang i to la malal la na matan fanu na ti maleh. Ka kiis sau na foron sunbiil, isau le fanu tina marmarsan falifu ri famam la biitom usuf i.
1:2: Malakai 3:1
1:3: Aisaia 40:3
1:6: 2King 1:8
1:11: Stat 22:2; BukSong 2:7; Aisaia 42:1; Metiu 12:18; Mak 9:7
1:22: Metiu 7:28,29
*1:40: Fan Iudaia ri tara le kaltu ae i sem lepra i duh, ma biil ifasi in la na fatpoton fanu.
1:44: WokPris 14:1-32