Ekaresia
Ekaresia, Daiyagha Tutuno Ea, Baria Aria Jojabe Uria Re.
Ingi utari embó eini, ragaro Luk na ená buka, Ekaresia*, ghaeko* 63-70 Iesu siroruturia-da ambova gefirie. Sei umó, Iesu endava irirota donu eta uria, ananu buka eini, ragaro, Luk Kakarada, rova gefirie. Ená buka rova, Asisi Kakara daiyagha furia, Iesu da natofodava asuguturieta, númane buro jojabe kotú bouvube egegeta rouvia-da gaga reta gembari vitie. Kotú númane daiyagha naa dumeniva iiava, Gaga Taubananu minono reaveta, abua-abua nanjogoda enembo ningia gaabee egeguturota, Iesu Keriso da ekaresia siroruturia-da gaga, unona gefirie.
Ená buka da ragaro mo, namonde amó Ekaresia Daiyagha Tutuno Ea, Baria Aria Jojabe Uria Re. reta rosore. Luk umó, Iesu gaabee ari enembo daiyagha egegeta uria, ananu nundubuturota gefirie. Avotago, Ená bukami Asisi Kakarada irari irugeta rouvie. regegasira mo, aná beago gaa bee re. Anada bee mo, Asisi Kakarami Iesu da natofodava asugea irirota, ano utuaveta, númane unda uno ananu ningia, unda ambo-ambo egeguturota, Iesu da ragarova minono regeguturieta, ekaresia baborurie.
Ekaresia Daiyagha Tutuno Ea, Baria Aria Jojabe Uria, Anada Gagada Mendó Mane, Aná Evere.
1:1-26 Unda Gaganu minono rari-du rea, Iesu unda natofo ea simbuguturie.
2:1-8:3 Iesu da natofo unda Gaganu, Jerusalem Bogu Naava isaghava minono regegeta uria re.
8:4-12:25 Iesu da natofo unda Gaganu, Judia kotú Samaria Frovensiva isaghava minono regegeta uria re.
13:1-21:16 Pol umó, Iesu da aghi kato ea, minono rirota, deĩ eta uria re.
21:17-28:31 Jiusi enembomi ririeta gitofomi Pol Jerusalem avo diburava ituturie. Anada ambova, umó bua aria, bogu naa Sisaria anava diburava ititiguturieta vitirie. Aghá urieta, rekago koto ari-du rea, umó ninenguturieta, bogu naa Rom anava arie.
1
1:1-11 Luk Tutuno Ea, Iesu Uutuva Vivituria Gaga Gefirie.
(Mak 16:19-20; Luk 24:50-53)
1-2 Luk 1:1-4Ariee, Tiofilus ko, anda buka seiva gefirera-da bee mo, aná enanu indú rereta, ningi! Iesu umó buro daiyagha tutuno ea furia-va, ari donu uria, kotú gaga donu nghaĩ ititurota furia, kotú uutuva vivituria, ananu gefirere. Avotago, Iesu ambua erea, uutuva jo vitambi irirota, fefera aghade, embobo unda aghi egegari-du sei gateguturia-du nghaĩ ititurie. Númane Asisi Kakarada anomi buro donu egegari-du, kotú gaga donu regegari-du uno uria-nu nghaĩ ititurie. 3 Iesu amburarivareta jebugea erea, umó fefera 40 endava irirota, fefera daba-daba unda ambo nimbidava isagha ea, ivata anogha dibe eini be eini urota, undufa umonu irugeaveta, umó amburarivareta jebugea eroruria-nu gaabee egegeta urie. Aghade, God Afa unda natofo* daiyagha kaifa eta rouvia, ananu irugeta urie. 4 Luk 24:49Fefera einiva, Iesu numonde danode desea, undari undidiguturota eghá ririe, “Anda Afada donu utaita be gajituria, aná ririeta niningigutureravore. Amindu eve Jerusalem kaifa egege! Mania doa serigata! 5 Mat 3:11; Mak 1:8; Luk 3:16; Jon 1:33Anada bee mo, Jon na enembo tefo uvumi bafutaito eta urie. Avotago, fefera dumenida ambova, nímane Asisi Kakarada anomi bafutaito aita rore.”
6 Amindu fefera eini, numonde furia desea, uriga eghá egeguturie, “Jojabee, gigo! Inona oreki rata, námane andufa Jiusi enembo tefo neno egeguturota, námane andufa kaifa egegara, aĩ, tefo?” 7 Aghá regeguturieta, Iesu na mino númandu eghá ririe, “Nímandu jo rata niningigambi aita rosoravore. Eini-eini dano God Afa na unda unomi reaveta siroreta rouvie. Amindu, nímandu jo rata niningigambi egegaita rosoravore! 8 Mat 28:19; Mak 16:15; Luk 24:47-48Avotago, Asisi Kakarami nímandava asugadua mo, unda ano utota bua, nímane erea tutuno ea, Jerusalem reta ya Judia Frovensi anava, Samaria Frovensi anava, naa dano kotú roo enda dano biruru urota, anda Gaga Taubananu minono regegaita rosoravore.”
9 Mak 16:19; Luk 24:50-51Aghá riria-da ambova, númane gerueta, Iesu rururieta uutuva yavuria gooso rova teterurieta númanda dibe goosomi gajiturie. 10 Númane avo jijiregea, unda yavua-nu tatasegea gigigutueta, jo gaimbo ambi, embobo ungagha ungá unda asugari saghai tatamo manemi furia, númane vitiria-da kasava isagha ea jijireguturie. 11 Aghá ea, númandu eghá ririe, “Galili embobo, nímane dodu uutuva dingera roso? Iesu daiyagha nímandavareta uutuva vivitueta gigigetora, emboro dabako aghagonu uutuvareta kaverea furaita rouvie.”
1:12-26 Matias Judas Da Kambesi Bari-du Gateguturia Re.
(Matyu 27:3-10)
12 Aghá uria-da ambova, Iesu da ambo nimbi, ooto ragaro Olivi avo reta kaverea aria, jo roo yafabe yambi, bogu naa Jerusalem bububuguturie. 13 Mat 10:2-4; Mak 3:16-19; Luk 6:14-16Bubua aria, númanda sei iririgeta uria kambova terua vitia aria, itiva buburiturie. Anava buburituria mo, Pita, Jon, Jems, Andru, Filip, Tomas, Bartolomyu, Matyu, kotú Alpheaus da mendi Jems da akau, númanda akauda mendi Judas, Saimon Tuvari Katode* Aghajora, ená embó Saimon sei noni eini Grik gaami “Selot” regegeta uria-da eini ea vitirie. Númane Rom enembo tuvia nendufa gavana ari gaga regegeta urie. Amindu undú “Tuvari kato” regegeta urie. dano. 14 Númane evevetu dumenide, Iesu da nue Meri de kotú Iesu da ikoko mendide dano desea, neno dabako egeguturota, benunu urota iririgeta urie.
15 Anada ambova fefera dumeni seriguturieta, Iesu gaa bee egegeta uria enembo dano 120 bubua desuturieta, Pita na erea jiria eghá ririe, 16-17 “Anda ikoko mendi, ariri gharovu, Asisi Kakara na ririeta, namonde anda mambube Devit donu Judas du gefiria, aná gaa bee siroruta. Judas reiria mo, aná namonde anda enembo eini re. Ená buronu ari-du, Iesu na gateguturie. Avotago Judas na gitofo kofiri urota, Iesu númanda ingova itutata, umó nandia bundita. 18 Mat 27:3-8Judas umó, Jiusi enemboda barirari guri ututata bua angia, kambesi eininu aná gurimi utua bua, avo jua dea uro bejea desini bani-bani isaghava buburitata ambubuta. 19 Aghá utata, Jerusalem enembo dano niningiguta-gea, aná kambesida ragaro númanda gaami Akeldama ririkiguta. Anada bee mo, Tatangu Kambesi re.
20 Ps 69:25; Ps 109:8Anada bee mo, Daa Bukava eghá gembari vitie:
‘Unda kambesiva enembo tefo iroe!
Mania doata, enembo eini unda kambova irauveta!’
Kotú gaga eini eghá gefirieta vitie,
‘Embó einimi unda kambesi bua, buro aita rouvie.’
21-22 Mat 3:16; Mak 1:9; Luk 3:21; Mak 16:19; Luk 24:51Amindu taubana mo, namonde embó eini Judas da kambesi bari-du regegota jiroe! Tutunova Jon enembo bafutaito eta uria-vareta, Jojabee Iesu uutuva vivita anada rorova, namonde danode iru-furu eta uria embó eininu gategore! Aghá adora mo, namonde amó Iesu da ambua erora-da gaga nanjigo riradora mo, umó osagho fumboe!”
23 Aghá riria-da ambova, embobo ungagha gateguturie. Embó einida ragaro bakode re: Josep, Barsabas, kotú Jastus re. Embó einida ragaro mo, Matias re. 24-25 Aghá egegea benunu urota, eghá regeguturie, “Jojabee, imó enembo nanjogoda neno roo dano gita roravore. Judas unda buro doa kambesi akuago undú simbuguturia anava angie. Amindu, unda kambesi bari-du rea, avonu rei-nundubutora, ananu iruge-gea, regegota jiria inda aghi kato eini ae!” 26 Anada ambova númane, ungá unda ragarova kikindo gaegeguturia mo, Matias da ragaromi isagha urie. Urieta, Matias umó Iesu da aghi kato eini ea, numonde 12 ea deĩ egegeta urie.
1:5 Mat 3:11; Mak 1:8; Luk 3:16; Jon 1:33
1:8 Mat 28:19; Mak 16:15; Luk 24:47-48
1:13 Mat 10:2-4; Mak 3:16-19; Luk 6:14-16
*1:13 Aghajora, ená embó Saimon sei noni eini Grik gaami “Selot” regegeta uria-da eini ea vitirie. Númane Rom enembo tuvia nendufa gavana ari gaga regegeta urie. Amindu undú “Tuvari kato” regegeta urie.
1:20 Ps 69:25; Ps 109:8
1:21-22 Mat 3:16; Mak 1:9; Luk 3:21; Mak 16:19; Luk 24:51