M̃esi Juo Napano Pol Bivitauiaio
Ban Namonoeano Lu Nalo Na
TESALONAIKA
Verialiano Moti
Tukunu bulati na niosi nei
Tomu nalo na yimo lu na Tesalonaika ajua jaleleiano bior amijog iliano telabo, aber Yesu binimei bereio ruei, a maka ajikia ka iliano vabe naruei na be riano. Ana Pol jiri kiano m̃esi juo nene ba ban namoneano nalo na Tesalonaika ka verial ilirianiano vanlo. Naio berinavo Yesu mia rimei bereio, mia beamu bajago va nalo monoka rimei rivova laka yetano ka tuboiano na toro tai napano mia rimaluvo, napano siano “Toro na lakorov Tuboiano,” a naio mia rilikuei ka Yesu.
Pol berial meravo ber tomu nalo napano abuluku m̃esi nei monoka atu sikili ea kialo moneano, ver vaio p̃eli mia ajevio jaleleiano ve telabo, a ajog rivova laka. Mia naio berinavo monoka aim̃au sikili tulaka ka ajevio. Vite nalo napano maka ajevio ea kialo meuliano, jibe napano naio bija tomu nalo na amim̃au bija naio aju amilaio, a monoka ala ga im̃auano novo nalo.
Torogio nalo na niosi nei
Iliano moti 1:1-2
Pol jaaro kalo bija naio miaia lo 1:3-12
Pol berloglog tomu nalo ka Yesu mia rimei bereio tum̃abe 2:1—17
Pol berlogloglo ka namoneano kiano bajago 3:1-15
Iliano maariano 3:16-18
1
Iliano na be moti
Im̃auo 17:1Taara na namoneano nalo na karam̃ado Atua kiano a kiado Tubo Yesu Kristo, napano kumitua komeli na Tesalonaika, kumemi tolu Pol, Sailas a Timoti, kumemi numisaaro toru laka ka nuviviuo kamiu ea niosi nei. Tiniememiano a tum̃aroano na karam̃ado Atua kiano bija kiado Tubo Yesu Kristo to vija kamiu.
Pol jikar kiano vivitauiano bija volkouano ka ver sivaiano
Titai napano bo ka nuvila bogo nonovio, monoka nuver siva ka Atua ka kamiu nalo na kenememi bilbilu nalo. A vonganei, kumemi numisaaro toru ka nuvila tibe nei, bior kumemi numijog lilianiano nalo na kenemiu, aber kenemiu moneano binimei bavin laka bogo nonovio, a kamiu tomu nalo biniu aju tinielo jiilo bavin toru lie. Nina bo laka, ana bogo na numitu numiselviv ea taara nalo dolu na Atua kiano namoneano, numitu numiaia kamiu toru banlo. Kumemi numitu nubisivisii banlo ka kumitu kubar bajago nalo na jikili na uolu nalo kialo, a kumitu kumidu ruru bogokouo tai na mila bulag kamiu laka, a kamiu kuvikulkul re, kenemiu moneano rijoru leleio re.
Bogo na kumitu jikili jibe na, ana numial ka bogo na Atua bijauia ga kamiu naio mim̃auka memedu batitigio, bior mijikia ka kamiu kube tomu nalo napano maka kuvijikia kuvijoru. Vonganei, naio mijikia ruei ka kamiu kumitu kubar jogvaiano nalo bior kiano navenatuboiano, a iorou, mia naio vititii kamiu ka kubare ka kuva joomo eaio.
Naio, bogo nonovio naio mim̃auka memedu ga, a mia naio rila meran vovaiano van nalo na aju amila bova ban kamiu. Nalo amila kamiu kumitu kubar bogokouo laka, a mia naio rila ribisi, mia naio rijai kamiu yako, a rijai bunu kumemi ea vio nei napano kumemi bunu numitu nubinua saba tealo. Bogo na reial ka burum̃ara sebi vilivili ea vio yauo, remijikia ka mila m̃arabo na Atua kiano ka riila Tubo Yesu taluvo ea tiniabene rimei ea yetemeriba, vija kiano nailiano nalo na jikili, ka mia naio rivuru bulag kito den jaleleano nalo na yetemeriba. Naio riyotuba, mia naio tibure nalo na maka asidom ajikia Atua, maka asidom ajogkar Ioluano Vou na kiado Tubo Yesu kiano.
Kialo vironiano na mia nalo avario, mia nalo ava koviobo garuei, mia nalo atukovio kalo maka ajikia atu vija Tubo bogo tai ea vio novo napano kiano moroano mim̃aukanio bo jo ruei. 10 Ea bogoti napano mia naio rimaluvo, mia kiano tomu lu nalo aiaia naio ve toru laka, mia nalo na amonea naio aial naio tibe naio bo bo laka, a mia kamiu bunu vijalo, kuvitakisor naio. Kumijikia kuvila tibe na bior kumonea kenememi Ioluano nalo, mia nalo dolu napano na, mia maka ajikia atakisor naio leleio.
11 Kumemi numitu numisidomii saba nalo na banbano-o, ana mila numisikili vatitigio bo ka nubolkouo bogo nonovio bior kamiu. Numitu nubika den kiado Atua ka riijaja kamiu, kubare ka meuliano lu nei napano naio bio kamiu kanio. Nubolkouo ka kenemiu verkariano novo nalo napano kumitu kumisidomii ka kuvitakiio, bija im̃auano nalo na bo napano kenemiu viekouoiano mijikia rila, mia Atua rim̃au ea kiano sikiliano ka mia monoka avar m̃arati. 12 Numitu nubolkouo jibe na ka kamiu kuviaia kiado Tubo Yesu siano rimei ve toru bure kamiu, a ka kuviluo lie vija kiano bajago nalo na bo. Ver kumijikia kuvila tibe na rivan rivano-o rive verare ka tiniememiano novo napano Atua kiado Tubo kiano, nina be Yesu Kristo, mia rivu mia rivu.

1:1 Im̃auo 17:1