NAVISIP̃EIANO
Napano Jone Mialio
Ana Bivitauialario
Verialiano Moti
Tukunu bulati na niosi nei
Niosi nei, vite nalo na Kristo bisip̃eio ban Jone, napano siano na bulati nene “Navisip̃eiano,” Jone bivitauiaio. Naio berii visiano nalo napano Yesu berialio ban naio. Naio bivitauia ka bogo napano tomu na Romo amila kirisikili laka ban namoneano nalo, a aju amuebivinlo, bior ka amonea Yesu Kristo. Jone bivitauia niosi nei ka ridular kialo jidomiano nalo, ka asikil atu sikili ea bogokouo nei.
Ea niosi nei, be visiano nalo na Yesu berialio ban Jone. Naio berii jamerijiano nalo ka namoneano nalo ea bogo na amijikia ajoglubar nioniag nalo nene. Mia tomu dolu nalo maka ajikia avokar nioniag nene. Kialo burupati jidomiano na jamerjiano nei jibenei. Yesu Kristo, naio be Atua Sop̃i, a be kiado Tubo, a ea jum̃ano, Atua mia vudobi vatitig Sim̃aro vija kiano uolu dolu nalo. Bogo na naio rila nonovio im̃auano nei, mia naio sian vuliano van kiano tomu nalo napano ajikili aju kirisikili ea kialo moneano. Mia naio rivurulo ava atu vija naio ea tiniabene vou bija ea yetemeriba vou napano naio mila vatitigio ruei aju.
Torogio nalo na niosi nei
Iliano moti 1:1-8
Visiano moti bija m̃esi nalo napano ban ea yimo lu aluo 1:9—3:11
Niosi napano be lu ka toro visio bija niajebijo aluo 4:1—8:1
Simeduo nalo aluo 8:1—11:19
Mermu bija temeul juo napano naljuo abova 12:1—13:18
Visiano dolu nalo napano Jone mialio 14:1—15:8
Dise aluo napano abujo ka Atua kiano tiniamimiano 16:1-21
Atua mila bulag bulukomeli nei Babilon a juvulu temeul nei napano bova, a naiolioliano simsibi, bija Sim̃aro 17:1—20:10
Atua jibure tomu nalo ea legiano maaro 20:11-15
Tiniabene vou bija yetemeriba vou, bija Yerusalemo vou 21:1—22:5
Iliano maariano 22:6-21
1
Verivisivisiano na niosi nei
1 Niosi na be visip̃eiano ka venia napano mia naio riyotuba ea legiano nalo napano mia amei navo. Atua naio jidom ka kanano tomu na im̃auano nalo na yetemeriba monoka ameravo rivu ka vite nalo nene, naruei, jian jikiaiano nene ban Yesu Kristo, karina Yesu naio miila kiano nailiano tai miyotuba ka kanano toro na im̃auano nei Jone, naio mila vite nalo nene amiyotuba ka naio ea kanano visip̃eiano tai.
2 Jone naio mial nailiano nene bisi, naruei naio bitilubar ka naina be Atua kanano iliano riano, be iliano na be riano tai memedu ka aver visivisii venia napano mia Yesu Kristo naio rim̃auka iorou, mila na naio bivitauia bulagio vatitig bo jua niosi nei vite nonovio napano naio mialio, ka kito na iorou romijikia rovulukuio.
3 Naruei toro kei napano mia naio rivuluku iliano nalo na verialiano nei, p̃eli mije tilieno kanio, mije vatitigio joa kanano iviso, mia Atua kanano ilivuiano ve burutomoruo toa kiano meuliano, bior ka napano burum̃ara legiano nene naio jo binimei vaataro laka naruei.
Jone jikar kiano verialiano na kiano moneano ea iliano na ilivuiano ban Atua
4 Visi 4:5Kiniou Jone, nebivitauia bulag iliano nalo nei ka riviedu rivan kamiu taara aluo na namoneano nalo napano kumitua komeli nalo na ea tanobuku na toru na vio nei Esia. Kiniou najaaro ka neviviuo kamiu ea siano napano naio jo beamu beamu laka, a naio jo vonganei, a mia naio to toboto. Nojom̃a nobolkouo vonganei ka kamiu ka burum̃ara tiniememiano vija tum̃aroano toa kenemiu meuliano tulaka, napano mia rijikia rimaluvo ka kamiu den kiado Atua nei vija kanano niununo aluo napano ajumolu ajukamu ka kiano jobaro, 5 a mijikia rimaluvo ka kamiu den Yesu Kristo bunu, naina napano naio biekouo banbano mia kiano burukija miou, karina naina be moti napano naio jumolu meul bereio, napano vonganei naio be burum̃ara parinio tubo ka parinio tubo nalo na yetemeriba.
Riano, Yesu Kristo nene napano naio tinien miia kito toru, banbano mijamo ka kanano burukija miou ka rivulu bulag kito den vironiano na kiado kariano nalo, 6 Visi 5:10naruei naio bitiri bulag kito ka romei rove m̃aratavo ve takurano ea yati na kanano tubo sesa nalo, a ka naio bijauia bulag kito ka rajai naio rotibe ka tomu lu na karam̃ano kanano im̃auano nalo, naio ga be Atua Sop̃i.
Yesu mila bo ban kito toru jibe na ana bo ka reilivu ka siano, rodular naio to medave laka, rivan rivan mia maka rijikia ribisi bogo tai, tibe na.
7 Mat 24:30; Mak 13:26; Luk 21:27; 1Tesa 4:17, Jon 19:34,37, Mat 24:30Kamiu kuvitii vatitig rivu! Naio naruei jom̃a mijian burevure melijo nalo na mave, naio riyotuba rimei. Mia kito nonovio reial naio ka mirado memedu, a vija bunu nalo nanua m̃a ajukukakar naio ea m̃akolkolo, nalo bunu avitilubar naio bereio. A mia ve burum̃ara jogvaiano a tegiano riyotuba ea tomu nalo na yetemeriba, tinielo rimaio ka venia napano amila ban naio ea bogo nanua beamu. Mia monoka tibe ga na, neber “Ee” ban naio kanio.
8 Visi 22:13Bo ka kito rovatove ka Tubo Atua, Atua Sop̃i na moroano, naio napano jo beamu, naio jo banei, a mia naio tobo to, napano kiano ilitemiano tai naio ber jibe nei, berinavo
“Kiniou nei nebe burupati, kiniou nei nebe juluvati!”
Jone mial kijokijo na Yesu
9 Kiaku bilbilu nalo, kiniou Jone nebe kuruemiu tormoruo, napano neberial vite nalo nei ban kamiu. Nojidom neverial van kamiu bior kito naruei napano robe Yesu kiano, ktio naruei rojutano ka kiano tuboiano, kito naruei rojum̃a rabar bitiran jogvaiano na bogokouo nei, ana kito naruei rojum̃a rojam̃ikar kito bija jidomiano na tebievi.
Mo kanaku tukunuano naio ban jibe nei, berenio nua beamu kiniou nojom̃a neberial Atua kanano iliano, nojo nomioliolu ka Yesu Kristo banbano na kulo Romo amije vironiano ban kiniou, amila kiniou nebinimei nomim̃au kurano ea uleule na telisu nei, siano Patimos. 10 Naruei ea Legiano Lu tai nojo jibe na ana nomijog jibe Niununo binimei ea kiniou, nomijog jooa tai ju iorou ka kiniou, mil burutomoluo jibe ka pasimeduo miolu, mil ber jibe nei, berinavo:
11 “Venia napano mia jau kealio,
keial kovivitauia bulagio rivan ea niosi tai,
karina jau kotuvan rivan tanea lotuano nalo na tanobuku na vio Esia,
ka ajikia avulukuio.
Lotuano nalo na, nalo aluo, be Eveso, Simena, Pekamam, Taitera, Satisi, Vilatelvia bija Leotesia.”
12 Jooa na mil ban kiniou jibe na ana nejidom neial kenia, nabarp̃ilig kiniou nemial burupati na yulu nalo ga aju, napano amim̃auka niogo ea nalo aluo. 13 Burubati yulu nalo nene ajumolu aju jibe na, karina iviso kanio nemial toro tai jumolu jikili ju, napano naio jibe ka naio napano aber Kulorinio Kenerinio. Naio miya burutili soto tai, bija miya kulum̃arauo napano amiyako ka niogo, ajelan barkor iarene. 14 Vijinio miuvu mia miuvu, jibe ka vijinio nunu bija mavo, mia tiamirano merera jibe ka minano sebi. 15 Jaano kirisikili bo, javukia m̃arbutoto napano amijie ea sebi ka rila sikili rivu, mia bogo napano naio mil, joono miolu jibe ka tei napano jaburu ea baraam̃a. 16 Naio jumolu jikili ju jibe ka napano ea jum̃ano meruo naio bokar m̃arvitano aluo, mia iobogu na mira tai napano naio mali ea ikit tivelinio juo naio jo moluo ea niono. Mirano bunu, riano, naio merera, mia merera naio javukia m̃erenio napano naio jikili mia jikili.
17 Visi 2:8, 22:13Nemial toro nene jibe na, tomnei, mila kiniou jibe ka nam̃aro garuei, nomijoru yetano ea jaano. Mia naio jian jum̃ano meruo binimei jokol kiniou, naio berinavo
“Jau komerou re ka kiniou, kiniou nei nebe natikariano mia nebe najuluvatiano.
18 Naio napano be burupati na meuliano be kiniou nei, bior napano kiniou nemeul, karina nam̃aro, karina nemeul bereio, nemeul to toboto.
Kiniou nei naruei napano vulariano na m̃ariano a vulariano na bulukusebi kirivova nei na tomu na m̃ariano, nalo ajua jum̃aku.
19 Mia jau komerou re, jau kotovon re, kovivitauia bulagio vatitig ga venia na jau kojom̃a komialio, napano tealo abe tena vonganei, bija tealo abe tena bogo nalo na amei na vo.
20 Mia kiniou never titai vanso beamu vo, ka tivelinio na m̃arvitano aluo nanua jau komialio joa jum̃aku, bija burupati yulu aluo na m̃a amim̃aukalo ea niogo na.
Vite nalo nei ajavukia jikiaiano tai napano naio joluku, mia nioti nene jibe nei, ber m̃arvitano aluo nalo nei napano, abe nailiano aluo na mia avitikar lotuano aluo nalo nei, a burupati yulu aluo, naina be lotuano aluo nene neibano.”