1 Cristo eynynâ ypemugudo, âdy aini wâgâ, âdara aidyly wâgâ warâ auguepa ise urâ. Ânguy âdara mâkâ odopâdyly awyly nutuwâbyra. 2 Ânguy tynwânwândyly umeba ise odopâdyly, tutuzelâ âmaemo. Âtâ odo inwânwândyly umeba wâne tâmagazeim kopae âewyly myara mawânkâ ise odopâdyly. 3 Warâ ise Jesus einwântânry modo aguely: “Idânârâ koendâ lelâ tarâ. Ânguy nâseguâdâbyra, takalagueba, nâsenagazebyra warâ” kezemo. Arâ aguelymo ume ise Jesus odopâdyly. Inakanhe aitomobyry wâgâ enagazezemo. Imery egasehoem pekodo idâhu ewâmadyly watay, ewânugue nâsemaguewâbyra, myara ise Jesus eynynâbaom modo âsemagueho nudupa awyly.

4 Cristo eynynâ ypemugudo, tutuzelâ âmaemo Jesus odopâniem awyly, iamu oday adakobâni emyenro keba mawylymogue. Odopâdyly tânuenzelâ âmaemo. Awylygue inanaynmolâ mawylymo. Tânanano wâne tâmagazeim saintuo tânanaym lelâ-ro myara ise inanaynmo mawylymo, Jesus odopâduo. 5 Peto oday adakobâni modo emyenro kurâ, Jesus xurâ kydawylygue, âkealâ iwâgâ tutuze kydawylygue warâ. Kopae adakobâni modo emyenro mâkeba kurâ, ize ato ara aini kydawylygue, Kywymâry Jesus odopâdyly tynwânwânse kydawylygue warâ. 6 Xykywâni modo arapa kine, xykydânry modo ara, âdy aini awyly kiuntuhoem. 7 Kopae xykywâni emyenro, toku ikano emyenro warâ mawânkâ Jesus einwântânry modo. Jesus odopâdyly nenuendaymbamo.

8 Kurâ peto oday adakobâni modo emyenro olâ tânuenzelâ kine. Tâwâlâ kydâjimanâne, Deus ize ato aiedyly kinmopa kitoem. Sodadu wâne tuhohu xuahuho metalgueto tyese, tuduery ipy tyâpa itoem, myara Jesus kyzeinwânsezene, kagonro kyjiwynene warâ, Satanás amaymba kydâsemaguehoem, inakanhe kyese keduo. Sodadu wâne tyangahu xuahuru metalgueto tyese, myara Jesus kyzeinwâne. 9 Kywymâry Jesus Cristo kieinwândylygue kydâsemaguehoem myakâwândy Deus kuduakely, kydâsenagazedoem inkâba. 10 Kâmakeze akâwâm Cristo iguely, aunloenlâ eagâ kitoem. Odopâduo, eagâpa kitaymba ise kurâ igueypyem, kyiguepa alelâ. 11 Awylygue, âjigue âzeon-hondâdaungâ, ago kuru Jesus mâinwântomoem. Âjigue tâturuzelâ itaungâ, Deus ize ato ara amitomoem. Arâlâ amidylymo awyly, tutuze urâ.

12 Eagonro lâpylâ âurutomo, Cristo eynynâ ypemugudo. Tessalonicadâ Jesus einwânni modo iwymârydo xyrentaungâ. Kywymâry Jesus induakeybylâ akaemo âwymârymoem. Jesus wâgâ inomedâdylymo, âurudylymo warâ, imâem Jesus mâinwântomoem. 13 Xyrentaungâmo, iwynedaungâmo warâ, âmaemoem anhekylymo wâgâ. Âwymârymo kâdunâguedaundâ. Koendâ lelâ itaungâ agonromo agâ.

14 Warâ lâpylâ âyanmo auguely. Tâsewanidyzebanro modo xurutaungâ: “Tynepa itaungâ, âsewanize, ize matomobe mitomoem” kewâtaungâ tâsewanidyzebanro modoram. Jesus einwândyly imoze kewâni modo xurutaungâ, Jesus einwândyly nimopa itomoem. Imâemba kulâ Jesus wâgâ einwânni modo eon-honwanâdaungâ, imâem nheinwântomoem; tâmawyadâzeim modo emawyadâdaungâ. Ânguy kâdynedaundâ; idânârâ emaenwâdaungâ, âdamyguepamolâ. 15 Inagazenimo kâzenagazedaundâ. Koendâ lelâ idânârâ etaungâ, Jesus einwânni modo, einwântânry modo alelâ.

16 Tuomare lelâ itaungâ. 17 Deus agâ amyguepa tâiseba itaungâ. 18 Deusram aguewâtaungâ: “Deus, koendonro âmâ” kewâtaungâ, âmaemoem koendâ atay, koendâpa atay alelâ. Arâ amyguelymo mawânkâ Deus ize ato, Cristo Jesus eynynonro mawylymogue.

19 Deus Ispiritury anhekyly kâzekuâdâdaundâ. 20 Deus wâgâ ânguylâ aguely mâindadylymo-ro watay, izepa tâiseba itaungâ. 21 Iwantaguedaungâ, sapâiguewâdaungâ warâ lakuru, aguehobyry âkealâ, âkealâba warâ awyly mâuntuhomoem. Deus eynynâ aguely-ro watay, idataungâ, einwântaungâ warâ. 22 Inakanhe kulâ agueduomo olâ kâzeinwântaundâ. Ânguy inakanhe kulâ kâdurutaundâ lâpylâ warâ.

23 Warâ inanry Deus agâ âwâgâmo auguely: “Deus, âmâlâ inanry xina takalagueba itoem aienehonrim. Tessalônica donro modo koendâ lelâ itomoem aiekâ, ara itomoem. Eagâmolâ ikâ, inakanhe nâpaunzebyra itomoem, inakanhe anipyra itomoem, âdygue tâwentâzeba itomoem, Pymâ Jesus Cristo odopâduo” tâkeze winase Deusram. 24 “Aiese urâ” tâkehobyry aieni tawylygue adâkehobyry aralâ ise aidyly agâmo. Turâem myakâwândy âduakelymo.

25 Cristo eynynâ ypemugudo, xina eynynâ adâkezelâ itaungâ Deusram.

26 Tohonuguze âsedaenguwâdaungâ, Cristo eynynâ âjipemugu mawylymo mâenehon-homoem*Saguhoem tohonuguze âsedaengulymo. Iwerâma tâpymogoynze tâdâsedaenguly..

27 Kywymâry Jesus “Aguekâ” kehobyry wâgâ arâ auguely âyanmo: “Idânârâ âmaemo Tessalônica donro Jesus einwânni modo xirâ pape itainly idataungâne” uguely. Xirâ kâinweniby idânârâ mâuntudyzemo kuru wato.

28 Kywymâry Jesus Cristoram koendâ mâzehohomoem kâenkadyly.

Alâ kulâ ise âyanmo kâinwenily.

Paulo