9
1 Hi kaisa mipnikan Au molok ii. Naꞌko hi ok-okeꞌ leꞌ ii, lof anmuiꞌ bian feꞌ ka nmaten, mes lofa miit Uisneno In sonaf neem nok kuasat ꞌnaek.”
Usif Jesus nabai jon, ma In bael abtais naklimaꞌ mbi ꞌnuuꞌf aa tuun
(Mateus 17:1-13; Lukas 9:28-36)
2 Nfiin neno nee te, Jesus mpaisaꞌ naꞌ Pedru, naꞌ Yakobus, ma nok naꞌ Joao, he sin haa sin nsaen neu ꞌnuꞌaf amnanuꞌ es, leꞌ ka nmuiꞌ fa atoni. Olas sin nsaen ntenuk tunan, sin niit Jesus nabai jon. 3 Ma nok In bael abtais naklimaꞌ mutiꞌ. Mbi pah-pinan ii, ka nmuiꞌ fa bael es leꞌ mutiꞌ nneis naꞌko In bael abtais nane. 4 Suk naskeek, sin napeen niit Jesus namolok nok naꞌi Elia ma nok naꞌi Moijes.
5-6 Ma sin teun sin namtaun ma nasmanan. Ma naꞌ Pedru nteek amneik. Ma tala in naꞌuab antanteun on. Oke te, in natonan Jesus nak, “Amaꞌ! Mbi bale ii, alekot! Naleko nneis, hai mmoeꞌ maan lopo teun. Es amfeel ee neu Ko, ma es amfeel ee neu naꞌi Moijes, ma es antein amfeel ee neu naꞌi Elia.”
7 Nalali te, nipu nsaon nꞌaom naan sin. Ma sin nneen hanaf mpoi naꞌko nipu nane nak, “Mneen, he! Jesus ije, Au Aan Honi. Mitniin ma mneen lek-leok meu Ne!”✡2 Pedro 1:17-18; Mateus 3:17; Markus 1:11; Lukas 3:22
8 Olas sin Pedru nnenan hanaf nane, sin nail napuun, mes suk naskeek, sin ka niit antein fa atoin nua in nane. Alahaa Jesus anmees.
9 Oke te, Jesus nok In asium-noinaꞌ sin nsanun nfanin naꞌko ꞌnuꞌaf nane. Olas sin ansanun, Jesus mpaaꞌ sin am nak, “Saaꞌ es leꞌ aleloꞌ hi miit ee, hi kaisa mitonan neu sikau-sikau. Au leꞌ ii, Aan Mansian. Au musti ꞌmaet feꞌ. Nalail, kalu Au ꞌmoni ꞌfain, niꞌ hi nabeiꞌ mitonan atoni bian sin.”
10 Sin nhuuk alekot Jesus In haan mantaꞌen nane, ma sin ka nteek naan fa neu atoni bian. Mes sin teun sin nmantotin es nok es mnak, “In aꞌnaonaꞌ nak saꞌan, nak In he nmoni nfain naꞌko In aꞌmaten nane? On mee, he?”
11 Ma sin ntoit neu Ne mnak, “Kulu akama sin nak naꞌi Elia musti neem nahuun feꞌ, niꞌ Kristus neem. Mes kalu natuin Amaꞌ Ho neꞌop, on mee?”✡Maleaki 4:5; Mateus 11:14
12 Jesus natae mnak, “Nane namneo. Naꞌi Elia musti neem nahuun feꞌ, he nasoitan lalan neu Kristus, atoni leꞌ nane Uisneno es anleek nani naꞌko unuꞌ. Mes, nmoeꞌ on mee? Hi feꞌ ka mihiin saaꞌ es leꞌ sin nluul nani mbi Uisneno in sulat matoom neu Aan Mansian? Fun sin ntui nalali be, nak kalu In neem nalali, atoni lof nasuusp Ee, ma naꞌmaet Ee. 13 Mes hi musti mitniin lek-leok, he! Naꞌi Elia nane maneoꞌ neem nalali. Mes atoni neik nasuusp ee, natuin sin aꞌloemk in. Nane msat, pas naꞌeuk nok saaꞌ es leꞌ unuꞌ naꞌi-naꞌi sin ntui nani.”
Usif Jesus nalekoꞌ liꞌanaꞌ leꞌ pah-tuaf amleꞌut antaam mbulalu ee
(Mateus 17:14-21; Lukas 9:37-43)
14 Olas Jesus nok In asium-noinaꞌ sin tuaf teun, nmanꞌekun nfain nok In asium-noinaꞌ sin bian, sin napeen niit atoni namfau leꞌ matolan. Leꞌ atoni amfaut in nane neman ma nail Jesus In asium-noinaꞌ sin bian nmatoen nok kulu akama sin. 15 Olas atoni namfau napeen niit Jesus, sin naskeken, fun sin nakat In feꞌ es ꞌnuuꞌf aa tuun. Nalail sin naen annaon naꞌeuk nok Ne.
16 Ma Jesus ntoit sin mnak, “Hi mmatoe saaꞌn ee es ii?”
17 Nmuiꞌ tuaf es neem natoon am nak, “Amaꞌ, mneen oum feꞌ! Au ꞌoum ꞌok au aan mone, henati Ama muleok ee. In anmoon, naꞌuabat ka nahinef, fun pah-tuaf es mbulalu ee. 18 Kalu pah-tuaf antaam mbulalu ee, in ntepon liꞌanaꞌ nae neu naijaan. Nalali te, liꞌanaꞌ nae in fefan naheun nok fule, ma neuk in nisin. Oke te, neun in aon maneo fa. Au utonan ulail Ho asium-noinaꞌ sin ee, he nliuꞌ napoin pah-tuaf nane. Mes sin ka nabeiꞌ fa.”
19 Nneen on nane te, Jesus naskalaꞌ sin mnak, “Haah! Hi mneis niis ee! Au uꞌnoinaꞌ ki haef-haef, mes hi ka mipan maan fa lek-leok. Ma hi neek palsait ka maneꞌo-maneꞌo fa neu Kau! Au musti feꞌ ki ꞌsabaal ntee lekaꞌ!? Mok liꞌanaꞌ nane neem on ii!” 20 Nalali te, sin ntoup neik liꞌanaꞌ nane neem neu Jesus. Mes olas pah-tuaf napeen niit Jesus, in ntepon liꞌanaꞌ nane neu naijaan. Liꞌanaꞌ nane nahui-loon neu naijaan, ma in fefan naheun nok fule.
21 Nalali te, Jesus ntoit liꞌanaꞌ nane in amaf nak, “Ho anah nameen menas ii, es lekaꞌ?”
In amaf natae mnak, “Nameen naꞌko ba feꞌ liꞌanaꞌ. 22 Pah-tuaf nane nabala es aꞌloꞌob ee, he naꞌmaet liꞌanaꞌ ije. In ntepon liꞌanaꞌ ije haef-haef neu aij aa nanan, ma naleem ee neu oel. Mes Amaꞌ mtulun maan ee fa! Kalu nabeiꞌ, Ama mumnau kai fa, muleko maan kai liꞌanaꞌ ije feꞌ.”
23 Jesus natae mnak, “Anasaaꞌ te ho mak ‘kalu nabeiꞌ’? Au nabeiꞌ ꞌmoeꞌ saaꞌ-saaꞌ ok-okeꞌ, ile lamu atoni mpalsai!”
24 Nalali te, amnasiꞌ nane natae nana nuꞌon nak, “Amaꞌ! Namneo au ꞌpalsai je. Mes mtulun maan kau henati au neek palsait ii henati naꞌkiiꞌ antein!”
25 Olas nane, Jesus nail atoni namfau neem nabuab ok mbi nane. Nalail In nleul pah-tuaf nane nak, “Hoi! Pah-tuaf amleꞌut! Mpoi nai muꞌko liꞌanaꞌ ii! Maut he in naneen, ma naꞌuab. Ho kaisa mbulalu mteni liꞌanaꞌ ii nai!”
26 Nneen Jesus naꞌuab on nane te, pah-tuaf nane nkoa-muus. Ma in mbulaol liꞌanaꞌ nane naskukuꞌ ntein, nalail niꞌ in ampoi nasaitan liꞌanaꞌ nane. Ma liꞌanaꞌ nane nꞌoel naan on leꞌ anmaet. Tal antee atoni mbi nane nmantonin mnak, “Aah! Liꞌaan anmate!”
27 Mes Jesus nhuuk liꞌanaꞌ nane in aꞌniman ma ntoup nafeent ee. Ma in anfeen nain kuun olas naan.
28 Nalali te, Jesus nok In asium-noinaꞌ sin nasaitan bale nane, ma nnaon ntaam ntein mbi uum jes. Mbi nane, sin nmesen, ma ntoit Jesus mnak, “Amaꞌ! Anasaaꞌ te alelo hai ka nabeiꞌ mliuꞌ fa pah-tuaf nane?”
29 Oke te, Jesus natoon sin mnak, “Mneen lek-leok! Pah-tuaf in namneo namaunun. Kalu hi ka mꞌonen mtoit neu Uisneno, hi ka mibeiꞌ fa he mliuꞌ pah-tuaf on leꞌ nane.”
Usif Jesus natoon antein In aꞌmaten
(Mateus 17:22-23; Lukas 9:43-45)
30 Nalali te, Jesus nok In asium-noinaꞌ sin nnaon nasaitan bale nane, ma he nnaon neu profinsia Galilea. Olas nane, Jesus ka nloem fa he atoni nahiin nak In es naan, 31 fun In naꞌnoinaꞌ haa In asium-noinaꞌ. In natonan sin mnak, “Ka ꞌloꞌo fa be, atoni naꞌsaꞌu Kau neu atoni bian. Nalail sin naꞌmaet Kau, Aan Mansian ii. Namneo Au ꞌmaet, mes mbi sineꞌ, Au ꞌmoni ꞌfain.”*Ambi laes Gregu (Yunani), sin nmulai nsoꞌin naꞌko: neno ije (= 1), nmeu-nokaꞌ (= 2), sineꞌ (= 3), esah (=4). On nane, mbi laes Gregu (Yunani), μετὰ τρεῖς ἡμέρας (meta treis hēmeras) “mbi neno no teen ii” in aꞌnaonaꞌ ambi laes Baikeno es leꞌ “mbi sineꞌ”. Mimnau, Usif Jesus anmaet nok neon nimaꞌ (msoiꞌ es). In nmeu-nokaꞌ te, es leꞌ neon neeꞌ (msoiꞌ nuub), Usif Jesus ambi nopu nanan. Mbi sineꞌ te, es leꞌ neno kleij (msoiꞌ teun), Usif Jesus anmoni nfain. On nane, tatuin hit tsoiꞌ neno, In nmaet fai nuban, nalali te In nmoni nfain.
32 Jesus natoon on nane, mes In asium-noinaꞌ sin nteek amneikun. Sin ka nbarain fa he ntotin ntein neu Jesus, in aꞌnaonaꞌ neu saaꞌ.
Usif Jesus In asium-noinaꞌ sin nmatoen nak sikau es neik aꞌnaet
(Mateus 18:1-5; Lukas 9:46-48)
33 Oke te, Jesus sin nnaon nteen neu Kapernaum. Olas sin ntaam neu ume, Jesus ntoit In asium-noinaꞌ sin mnak, “Alelo hi mmatoe neu saaꞌ mbi lalan?”
34 Mes ka tiit fa es he nataeꞌ, fun alelo mbi lalan, sin nmatoen mnak, “Sikau lof es neik aꞌnaet neu kit ok-okeꞌ?”✡Lukas 22:24
35 Nalail, Jesus ntook naꞌnoinaꞌ sin mnak, “Sikau es anloem he neik atoin aꞌnaet, in monin musti maneꞌo-maneꞌo neek baun on leꞌ liꞌanaꞌ he nhae neu atoni ok-okeꞌ.”✡Mateus 20:26-27; 23:11; Markus 10:43-44; Lukas 22:26
36 Oke te, Jesus nasꞌau liꞌaan es mbi nane, ma In nfain nnao neu sin atnaank in. Ma In naꞌuab mnak, 37 “Sikau leꞌ natuin Kau ma nhae neu atoni aꞌbaut namnees on leꞌ liꞌanaꞌ ii, in aꞌnaonaꞌ on leꞌ atoni nane nhae neu Kau msat. Ma in nhae neu Au Amaꞌ msat, leꞌ unu nfee Kau mepu mbi pah-pinan ii.”✡Mateus 10:40; Lukas 10:16; Joao 13:20
Hit biak in es leꞌ sikau?
(Lukas 9:49-50)
38 Nalali te, Jesus In asium-noinaꞌ tuaf es, naꞌ Joao, natoon mnak, “Amaꞌ! Mbi haef es, hai miit tuaf es in nteek Amaꞌ In kanan he nliuꞌ pah-tuaf. Mes hai mikain ee, fun in ka hit atoni fa.”
39 Mes Jesus natae mnak, “Hee! Hi kaisa miꞌeek ee. Fun sikau es neik Au kanak, ma nmoeꞌ lasi mkakat, in ka nteek naꞌleꞌuf anfain fa Au kanak. 40 Kalu in ka nmamuus fa nok kit, in hit atoni msat.✡Mateus 12:30; Lukas 11:23 41 Es on nane, mimnau lek-leok! Kalu nmuiꞌ atoni leꞌ nahiin nak hi mituin Kristus, nalail in ntulun ki, nane Uisneno ka napnikan fa atoni nane in haet. Maski nak in naꞌinut oel kopu mese msat, Uisneno ka napniikn ef.”✡Mateus 10:42
Kaisa mibaꞌe mok sanat!
(Mateus 18:6-9; Lukas 17:1-2)
42 Nalali te, Jesus natoon antein sin mnak, “Kalu atoni es nmoꞌen nsaan neu liꞌaan es, tal antee in ka npalsai ntein neu Kauf, natlek-leok, he! Naleko nneis, kalu atoni nait fatu ꞌnaek es,†Sula Kninoꞌ lasi Gregu (Yunani) nluul am nak, ‘fatu tutuꞌ’ leꞌ sin aneiki he ntuut aen-kase. ma nfutu neu atoni nane in neon, he nalemaꞌ neu tasi tnanan.
43 Kalu ho mmoeꞌ musanab meik ho ꞌnimam, mkeut mufeka haa ho ꞌnimam nane! Naleko nneis, ho mtaam meu sonaf neno tunan meiki haa ho ꞌnimam biam. Kalu kahat, sin mpolin nataam ko neu aij maputuꞌ ma aij malalaꞌ nabal-baal meik ho ꞌnimam nua sin.✡Mateus 5:30 44 [Aij maputuꞌ nane, namneoꞌ bale maꞌneꞌat. Aij leꞌ nane ka nmaet nitaf. Ma kaun anaꞌ leꞌ mbi nane sin naklotiꞌ ka nasnasan fa.]‡Sula Kninoꞌ lasi Gregu (Yunani) unuꞌ, ka nluul fa mbi elaꞌ 44. 45 Kalu ho mmoeꞌ musanab meik ho haem, mkeut mufeka haa ho haem nane! Naleko nneis, ho mtaam meu sonaf neno tunan meiki haa ho haem biam. Kalu kahat, sin mpolin nataam ko neu aij maputuꞌ ma aij malalaꞌ nabal-baal meik ho haem aa nua sin. 46 [Aij maputuꞌ nane, namneoꞌ bale maꞌneꞌat. Aij leꞌ nane ka nmaet nitaf. Ma kaun anaꞌ leꞌ mbi nane sin naklotiꞌ ka nasnasan fa.]§Sula Kninoꞌ lasi Gregu (Yunani) unuꞌ, ka nluul fa mbi elaꞌ 46. 47 Kalu ho mmoeꞌ musanab meik ho matam, mloiꞌ mupoin haa ho matam nane! Naleko nneis, ho mtaam meu sonaf neno tunan meiki haa ho matam biam. Kalu kahat, sin mpolin nataam ko neu aij maputuꞌ ma aij malalaꞌ nabal-baal meik ho maatm aa nua sin.✡Mateus 5:29
48 ‘Aij maputuꞌ nane, namneo-namneo bael maꞌneꞌat.
Aij leꞌ nane ka nmaet niit fa.
Ma kaun anaꞌ leꞌ mbi nane sin naklotiꞌ ka nasnasan fa.’✡Jesaya 66:24
49 Au ꞌnoinaꞌ ije, namneo maꞌfeen. Sikau es natuin Kau, in musti nsutai ma natuin piut, namnees on leꞌ atoni nmaes sisi ma nseꞌi neu aij, henati sisi nane ntahan aꞌloob.
50 Masi nane naleok. Hit ttaob ee neu mnahat henaꞌ namiin. Mes kalu masi nane in ka namiin fa masiꞌ, nane naleok saaꞌ? Hit tpoi-lakan. Hi musti namnees on leꞌ masiꞌ, ma mmoin maneek es nok es, mok atoni ok-okeꞌ.✡Mateus 5:13; Lukas 14:34-35
Es on naan, hi misnaas nai miꞌko hi mmatoes nane mak, sikau es aꞌnaet, ma sikau es aꞌbaut!”
✡9:7 2 Pedro 1:17-18; Mateus 3:17; Markus 1:11; Lukas 3:22
✡9:11 Maleaki 4:5; Mateus 11:14
*9:31 Ambi laes Gregu (Yunani), sin nmulai nsoꞌin naꞌko: neno ije (= 1), nmeu-nokaꞌ (= 2), sineꞌ (= 3), esah (=4). On nane, mbi laes Gregu (Yunani), μετὰ τρεῖς ἡμέρας (meta treis hēmeras) “mbi neno no teen ii” in aꞌnaonaꞌ ambi laes Baikeno es leꞌ “mbi sineꞌ”. Mimnau, Usif Jesus anmaet nok neon nimaꞌ (msoiꞌ es). In nmeu-nokaꞌ te, es leꞌ neon neeꞌ (msoiꞌ nuub), Usif Jesus ambi nopu nanan. Mbi sineꞌ te, es leꞌ neno kleij (msoiꞌ teun), Usif Jesus anmoni nfain. On nane, tatuin hit tsoiꞌ neno, In nmaet fai nuban, nalali te In nmoni nfain.
✡9:34 Lukas 22:24
✡9:35 Mateus 20:26-27; 23:11; Markus 10:43-44; Lukas 22:26
✡9:37 Mateus 10:40; Lukas 10:16; Joao 13:20
✡9:40 Mateus 12:30; Lukas 11:23
✡9:41 Mateus 10:42
†9:42 Sula Kninoꞌ lasi Gregu (Yunani) nluul am nak, ‘fatu tutuꞌ’ leꞌ sin aneiki he ntuut aen-kase.
✡9:43 Mateus 5:30
‡9:44 Sula Kninoꞌ lasi Gregu (Yunani) unuꞌ, ka nluul fa mbi elaꞌ 44.
§9:46 Sula Kninoꞌ lasi Gregu (Yunani) unuꞌ, ka nluul fa mbi elaꞌ 46.
✡9:47 Mateus 5:29
✡9:48 Jesaya 66:24
✡9:50 Mateus 5:13; Lukas 14:34-35