10
Atoni Farisi namin lalan he namouf Usif Jesus matoom neu lasi matsaos ma nok mapoi-lakan
(Mateus 19:1-12; Lukas 16:18)
1 Nalali te, Jesus sin nnaon onuk profinsia Judea, nok bale bian mbi noel Jordan in maans aa saen. Mbi mee-mee, toob namfau neman ntool naan Ne. Jesus naꞌnoinaꞌ sin on leꞌ neno-neno.
2 Nmuiꞌ atoni Farisi bian neman he namofu Ee. Sin ntoti mnak, “Natuin hit plenat akama, kalu atoni feꞌu matsao nalail, in nabeiꞌ mapoi-lakan, ka aiꞌ ka?”
3 Jesus natae mnak, “Mimnau feꞌ! Plenat neu feel-mone leꞌ naꞌi Moijes natoon nain neu kit, nak on mee?”
4 Sin nataen mnak, “Naꞌi Moijes in aplenat nak, atoni nabeiꞌ mapoi-lakan, mes ile lamu haa in nfeeꞌ sulat mapoi-lakan neu in feel.”✡Tektana Tfain Monik Ahunut 24:1-4; Mateus 5:31
5 Jesus natae nfain sin mnak, “Hoi! Mneen, he! Naꞌi Moijes ntui on nane, fun natuin hi neekm in ꞌnaak faut ok! 6 Hi kaisa mipnikan leꞌ lasi un-unuꞌ, leꞌ olas Uisneno nmoeꞌ neno tunan ma pah-pinan! Nmuiꞌ matuꞌi mnak,
‘Uisneno nmoeꞌ mansian, bifeel ma atoni.✡Uab Un-unuꞌ 1:27; 5:2
7 Es on nane te, atoni mpoi nnao nasaitan in enaf-amaf,
he mpoi nmoin neek buaꞌ nok in feel,
ma nmafuut nekaf nok ne.
8 Fun sin nua sin nfain meseꞌ.’✡Uab Un-unuꞌ 2:24
9 Kalu Uisneno es neikn on kuun he nabuab sin nfani meseꞌ, mansian kaisa msekin ntein sin nai!”
10 Nalali te, Jesus nok In asium-noinaꞌ sin ntaman mbi ume es. Mbi nane, sin ntoit Jesus In aꞌnoinaꞌ alelo.
11 Jesus natae mnak, “Sikau es mapoi-lakan nok in feel, nalail matsao ntein nok bifeel tetaꞌ, nane lasi lahi! 12 Bifeel on nane msat! Kalu in mapoi-lakan nok in monef, nalail in matsao ntein nok atoni tetaꞌ, nane lasi lahi msat!”✡Mateus 5:32; 1 Korintus 7:10-11
Usif Jesus nateut liꞌaan in
(Mateus 19:13-15; Lukas 18:15-17)
13 Mbi neno es, nmuiꞌ atoni neik sin aanh in neman neu Jesus, he ntoti Ee he nateut sin. Mes In asium-noinaꞌ sin naꞌekaꞌ atoni he kaisa neman naꞌeuk nok Jesus.
14 Jesus napeen niit sin nmoeꞌ on nane, ma In namaun In asium-noinaꞌ sin mnak, “Mifetin liꞌaan in nane he neman neu Kau! Kaisa mikain sin! Fun atoni on leꞌ nane kin, namnees on leꞌ toob naꞌko Uisneno in sonaf mbi neno tunan. 15 Hi mimnau lek-leok! Sikau es he neem nhaumaak Uisneno, sin musti namnaub Ee, namnees on leꞌ liꞌanaꞌ namnau in enaf-amaf. Kalu ka nmoeꞌ on nane, sin ka nabeiꞌ fa he ntaam neu sonaf Uisneno.”✡Mateus 18:3 16 Oke te, Jesus nhoo naan liꞌaan in, ma npooh liꞌaan in sin fuufk in meseꞌ-meseꞌ, ma nateut sin.
Atoin aꞌmaut naim lalan he nmoin piut nok Uisneno
(Mateus 19:16-30; Lukas 18:18-30)
17 Olas Jesus sin he nnaon, nmuiꞌ atoni aꞌmaut es naen neem he naꞌeuk nok Jesus. In nabees mbi Jesus In matan. Oke te, in ntoti mnak, “Kulu ꞌnaek leꞌ afin-finit! Au he ꞌtoit ꞌaan akleꞌo. On ii, Amaꞌ. Au musti he ꞌmoeꞌ on mee, he au uhiin maneꞌo, au nabeiꞌ ꞌtaam ꞌeu sonaf ma he ꞌmoin ubuaꞌ ꞌok Uisneno?”
18 Jesus natae mnak, “Anasaaꞌ te ho mak Kau mak, ‘afin-finit’? Ka nmuiꞌ fa atoni meseꞌ es he nfini nneis, mes alahaa Uisneno nmees. 19 Ho muhiin mulail, Uisneno in aplenat naꞌko unuꞌ nak,
‘Kaisa muꞌmaet atoni;
Kaisa mmoeꞌ lasi lahi;
Kaisa mubaak;
Kaisa msaksii muꞌmoeꞌ atoni;
Kaisa muꞌmoeꞌ atoni he mait sin aꞌbaleꞌ;
Ma mubees neu ho enaꞌ-amaꞌ.’ ”✡Mpoi naꞌko Pah Masir 20:12-16; Tektana Tfain Monik Ahunut 5:16-20
20 Atoni nane natae mnak, “Namneo, ꞌNaef Kulu! Naꞌko feꞌ munif, au utuin plenat nane ok-okeꞌ be.”
21 Jesus namnau atoni nane. Ma In nak, “Namneo! Mes fe nmuiꞌ lasi noon es. Leꞌ ii, ho mnao mfain he musaꞌu main ho maus ok-okeꞌ. Ma leꞌ loit in nane, ho mbait sin neu atoin amaꞌmuꞌit. Nane oke, ho oum mutuin Kau nai. Lofa Uisneno nafani ko ho maus mbi sonaf neno tunan.”
22 Atoni nneen Jesus namolok on nane te, in neekn aa namleuꞌ. Nalail in annao nfain nok neek susal, fun maneꞌo-maneꞌo in naꞌmauꞌ.
23 Ma Jesus nail nateef, ma naꞌuab nok In asium-noinaꞌ sin mnak, “Mneen, he! Atoni aꞌmaut namneo nsusal kalu ntaam neu sonaf Uisneno!”
24 Nneen In namolok on nane, In asium-noinaꞌ sin neek in naꞌtemen. Mes Jesus namolok antein mnak, “Mitniin lek-leok, he! He tjael Uisneno In toob, nane nsusal aꞌnaek! Kaisa mineꞌop mak nane ka susal fa. 25 Neu atoni aꞌmaut ntaam neu sonaf he njael Uisneno in toob, nane namnees susal on leꞌ bikaes ‘unta’ ꞌnaek es, ntaam neu in oꞌaf natuin anet in aꞌbolan.”
26 Jesus In molok on nane, nmoeꞌ sin nteek amnekun ntein. Ma sin nmantotin mnak, “Kalu he on nane, sikau es napeni ꞌhonis, he?”
27 Jesus nail sin meseꞌ-meseꞌ, ma In nak, “Neu mansian, namneo ka nabeiꞌ fa. Mes kaisa mipnikan: neu Uisneno, ok-okeꞌ nabeiꞌ anjael!”
28 Oke te, naꞌ Pedru nait molok mnak, “Amaꞌ. Hai misaitan main hai saaꞌ-saaꞌ ok-okeꞌ be, he mituin Ko. Mes lofa hai mipein saaꞌ?”
29-30 Jesus nak, “Au he utonan neu ki on ii: Sikau es natuin Kau, ma nnao nasaitan in enaf-amaf, in olif-tataf, in aanh in, in lele, in mepu, ma nasaitan in saaꞌ-saaꞌ ok-okeꞌ mbi ume nanan, he nnao natoon Uisneno In Laes Alekot neu atoni mbi mee-mee, in lofa nataim nautn es manesiꞌ. Lasi ok-okeꞌ leꞌ in nasaitan nane, lof nataim ma nfain neis-neis. Ma in lof napein nsutais fun in natuin Kau. Mes lof kalu pah-pinan ii isu-bai, in lof nmoin piut nok Uisneno. Nane es in haet! 31 Mimnau, he! Natuin Uisneno In neꞌop, sikau es naꞌaiti in nekan, in lof maꞌpalan. Mes sikau es naꞌpalan in nekan, in lof naꞌlaitn ee.”✡Mateus 20:16; Lukas 13:30
Usif Jesus natoon antein In aꞌmaten mbi haef teun
(Mateus 20:17-19; Lukas 18:31-34)
32 Olas nane, Jesus sin nnaon neu Jerusalem. Jesus annao nahuun. In asium-noinaꞌ sin ma atoni bian natuin naꞌko kotin. Sin namnaun nitan leꞌ In molok unuꞌ. Ma sin neek in naꞌtemen, ma namtaun. Oke te, Jesus noꞌen In asium-noinaꞌ sin nmesen, he natoon antein leꞌ saaꞌ es lof anbool neu Ne mbi Jerusalem. 33 In naꞌuab mnak, “Mneen, he! Hit leꞌ ii, tnao teu Jerusalem. Au ije, Aan Mansian. Mes mbi nae, sin lofa naꞌsosaꞌ Kau, neu leꞌ ꞌnakaf-aꞌnakaf akama sin, ma neu kulu akama sin. Nalali te, sin nhuuk he naꞌmaet Kau. Oke te, sin nanaꞌat Kau neu atoni tetaꞌ leꞌ ka nahiin fa Uisneno. 34 Nalali te, sin naꞌuab naꞌleꞌuf Kau. Sin nakiun Kau, ma nteop naklatiꞌ Au aok. Oke te, niꞌ sin naꞌmaet Kau. Maneoꞌ Au lof aꞌmaet. Mes lof mbi nfiin fai nuban te, Au ꞌmoni ꞌfain.”*Ambi laes Gregu (Yunani), sin nmulai nsoꞌin naꞌko: neno ije (= 1), nmeu-nokaꞌ (= 2), sineꞌ (= 3), esah (=4). On nane, mbi laes Gregu (Yunani), μετὰ τρεῖς ἡμέρας (meta treis hēmeras) “mbi neno no teen ii” in aꞌnaonaꞌ ambi laes Baikeno es leꞌ “mbi sineꞌ”. Mimnau, Usif Jesus anmaet nok neon nimaꞌ (msoiꞌ es). In nmeu-nokaꞌ te, es leꞌ neon neeꞌ (msoiꞌ nuub), Usif Jesus ambi nopu nanan. Mbi sineꞌ te, es leꞌ neno kleij (msoiꞌ teun), Usif Jesus anmoni nfain. On nane, tatuin hit tsoiꞌ neno, In nmaet fai nuban, nalali te In nmoni nfain.
Yakobus nok Joao ntotin he neikin atoin aꞌnaet
(Mateus 20:20-28)
35 Oke te, ꞌnaef Jebedeus in aanh in, es leꞌ naꞌ Yakobus nok naꞌ Joao, neman neu Jesus. Sin ntotin mnak, “ꞌNaef Kulu! Hai mpaluu Ko.”
36 Jesus ntoit sin mnak, “Hi mpaluu saaꞌ?”
37 Sin natae mnak, “On ije, Amaꞌ! Kalu Amaꞌ ntook ma naplenat, hai mtoit he Amaꞌ natokoꞌ kai, neu Amaꞌ In banapan aꞌneꞌu, ma es antook mbi Amaꞌ In banapan aꞌliij, henati hai mhuku plenat msat.”
38 Jesus natae mnak, “Hi nua ki leꞌ ije, ka mihiin maan fa saaꞌ es leꞌ hi mtoit. Au ii, lof upein lasi maꞌneꞌat namfau. On mee? Hi mak mibeiꞌ msutai lasi maꞌneꞌat nane mok Kau tala mmaet, ka?”✡Lukas 12:50
39 Sin nataen mnak, “Hai mibeiꞌ, Ama!”
Jesus nak antein sin mnak, “Maneꞌo! Hi lof msutai lais maꞌneꞌat msat on leꞌ Au. 40 Mes sikau es ntokon mbi Au banapak aꞌneꞌu ma banapak aꞌliij, nane ka Au ꞌleek ta fa. Mes nane Uisneno es anleek. In nafeek nalali be, neu sikau-sikau es antokon mbi tokoꞌ nane.”
41 Olas In asium-noinaꞌ sin bian nnenan naꞌ Yakobus nok naꞌ Joao ntoit onuk nane, sin natoꞌan. 42 Oke te, Jesus noꞌen sin ok-okeꞌ mnak, “On ii! Hi mihinen, aiꞌ? Atoin anaaꞌ apleent in, sin es nasusab kuuk sin toob in, tala sin ka nabeiꞌ fa he nmoꞌen saaꞌ-saaꞌ. Ma aꞌnaet-aꞌnaet leꞌ naꞌko suku leꞌ sin ka nahiin fa Uisneno, sin nfee plenat nneis niis, tala sin toob haꞌmuiꞌ ok anneis. 43 Mes hi kaisa mmoeꞌ on nane! Fun sikau naꞌko hi es neik aꞌnaet, in musti nmoeꞌ ate ma nhaeꞌ neu atoni bian.✡Lukas 22:25-26 44 Ma sikau es neiki ꞌnakaf, in musti nmoeꞌ nfain on ate.✡Mateus 23:11; Markus 9:35; Lukas 22:26 45 Fun natuin Au, Aan Mansian ije, ka ꞌoum fa he atoni nhae neu Kau, mes Au ꞌoum he ꞌhae ꞌeu atoni amfaut. Au ꞌoum uꞌnaꞌat Au ꞌmonik ije ok-okeꞌ, he uꞌsoi toob namfau sin naꞌko sin sanat ma penu.”
Usif Jesus nalekoꞌ atoin afolot
(Mateus 20:29-34; Lukas 18:35-43)
46 Jesus nok In asium-noinaꞌ sin, ma nok atoni amfaut annaon ntenuk koot Jeriko. Olas sin he nnaon piut, nmuiꞌ atoni maat-afoolt es ntoko mbi lalan in ninen, ma ntoit loit. In kanan, Bartimeos, ꞌnaef Timeos in anah. 47 Olas in nneen nak leꞌ afinit nane, Jesus naꞌko Najaret, ma in nkoaꞌ nahelan mnak, “Jesus! Naꞌi David in sufaꞌ-kaꞌuf! Hai mpao Ko ꞌloꞌo be! Mumnau maan kau fa!”
48 Nneen in ankoaꞌ on nane, leꞌ atoni amfaut in nakain ee mnak, “Huus! Muꞌmekaꞌ!”
Mes in nkoaꞌ nahelan piut mnak, “Jesus! David in sufaꞌ-kaꞌuf! Mumnau maan kau!”
49 Oke te, Jesus nhaek. Ma In nak, “Hi mok ne neem neu ii!”
Ma sin nnaon nak ee mnak, “Ho muꞌmekaꞌ nai! ꞌNaef Kulu noꞌen ko ben es nae. Oum nai!”
50 Nneen on nane te, Bartimeos mpoi-lakan nain in tainusat, ma in nhaek sabake, ma nnao naꞌeuk nok Jesus.
51 Jesus ntoti ee mnak, “Ho he mloem saaꞌ?”
Atoin afolot nane natae mnak, “Amaꞌ! Au ꞌtoit henati au ꞌailat ꞌiit.”
52 Jesus nak antein mnak, “Fun ho mpalsai mak Au nabeiꞌ uleko ko, leꞌ ije msat, ho muleok mulali ee! Mnao nai!”
Ma in matan nane naleok nain. Oke te, in nnao nahat Jesus amsat.
✡10:4 Tektana Tfain Monik Ahunut 24:1-4; Mateus 5:31
✡10:6 Uab Un-unuꞌ 1:27; 5:2
✡10:8 Uab Un-unuꞌ 2:24
✡10:12 Mateus 5:32; 1 Korintus 7:10-11
✡10:15 Mateus 18:3
✡10:19 Mpoi naꞌko Pah Masir 20:12-16; Tektana Tfain Monik Ahunut 5:16-20
✡10:31 Mateus 20:16; Lukas 13:30
*10:34 Ambi laes Gregu (Yunani), sin nmulai nsoꞌin naꞌko: neno ije (= 1), nmeu-nokaꞌ (= 2), sineꞌ (= 3), esah (=4). On nane, mbi laes Gregu (Yunani), μετὰ τρεῖς ἡμέρας (meta treis hēmeras) “mbi neno no teen ii” in aꞌnaonaꞌ ambi laes Baikeno es leꞌ “mbi sineꞌ”. Mimnau, Usif Jesus anmaet nok neon nimaꞌ (msoiꞌ es). In nmeu-nokaꞌ te, es leꞌ neon neeꞌ (msoiꞌ nuub), Usif Jesus ambi nopu nanan. Mbi sineꞌ te, es leꞌ neno kleij (msoiꞌ teun), Usif Jesus anmoni nfain. On nane, tatuin hit tsoiꞌ neno, In nmaet fai nuban, nalali te In nmoni nfain.
✡10:38 Lukas 12:50
✡10:43 Lukas 22:25-26
✡10:44 Mateus 23:11; Markus 9:35; Lukas 22:26