15
Kian kantri yeŋgöra aka zioznöŋ julmamgö ahök.
1 *Lew 12.3Antiokia malohotmö, Judia prowinsnöhök ambazip tosatŋan eta kaba könahiba urumeleŋ ambazip kewö kusum eŋgiget, “Iŋini Mosesgöreŋ Köna keugö dop Anutugö aiwesökŋi sileŋine qahö yandime ewö, mewö mönö Suepkö buŋaya akingö osime.” 2 Mewö kusum eŋgigeraŋgöra aka aŋgururuk ahuiga Pol Barnabas yetkön tuarenjoŋ ak eŋgiba könöpŋambuk jim eŋgiyohot. Jim eŋgiyohotka urumohot qahö aka keu kewö jöhöba jiget, “Nini mönö Pol Barnabas aka jitŋememe tosatŋi melaim eŋgiinga Jerusalem sitinöŋ öŋgöba keu mi memba aposol aka Jerusalem urumeleŋ könagesögö jitŋememe yeŋgöreŋ anda jime.”
3 Keu mewö jöhöba jigetka urumeleŋ könagesö yeŋön i melaim eŋgigetka könanöŋ anget. Anda mala Fonisia aka Samaria prowins yahöt mi kutuba könanöŋ könagesöŋi könagesöŋi eŋgeket. Eŋgeka kian kantri tosatŋi yeŋön uruŋini meleŋgeraŋgö buzupŋi jiba urumeleŋ kambu yeŋgöra sösöŋgai ketaŋi al eŋgiget. 4 Al eŋgiba anda mala Jerusalem sitinöŋ aŋgotket. Aŋgotketka aposol aka jitŋememe yeŋön urumeleŋ könagesö yembuk köl öröm eŋgiget. Köl öröm eŋgigetka kösohotŋini kewö jiget, “Anutunöŋ nam köl neŋgii misin nup meinga nembuk mala aŋgöletot ketaŋi ketaŋi aka memba malök.” 5 Kösohot mi jigetmö, Farisi (Köna keugö kapaŋkölköl) kambunöhök urumeleŋ azi tosatŋan wahöta kewö jiget, “Kian kantri yeŋön uruŋini meleŋgeri, yeŋgöra mönö kewö jim kutubin: Yeŋön mönö Anutugö aiwesök sileŋine yandiba Mosesgöreŋ Köna keu pakpak wuataŋgöba malme.” Mewö.
Jerusalem totoko ala aŋgururuk keu mindiŋgöget.
6 Mewö jigetka aposol aka jitŋememe yeŋön keu mi jim kewötpingö tokoget. 7 *Apo 10.1-43Tokoba goranora (noragora) keu gwötpuk jiba jitnakölik aket. Mi aketka Pitönöŋ wahöta kewö jii mötket, “Azi alaurupni, Anutunöŋ mutuhök sutnine nup mendeŋda möwölöhöm niŋgiba nöŋgöra kewö jiyök, ‘Gi mönö kian kantrinöŋ anda Ölöwak Buŋa keu jim asarim eŋginöŋga yeŋön uruŋini meleŋda Kembu möt narime.’ Iŋini keu mi mötze. 8 *Apo 2.4; 10.44Anutunöŋ ambazip pakpak urunini möt kutuzawaŋön könaŋamŋi kondela Uŋa Töröŋi Juda ambazip neŋgöra melaiiga eröhi, miaŋgö dop mönö kian kantri ambazip yeŋgöra mewöŋanök i melaii uruŋine geyök.
9 “Melaii geiga mewö miaŋön Juda ambazip qahö eŋgek soriba kantri tosatŋi qahö qepureim eŋgiyök. Qahöpmö, yeŋön Anutu möt narigetka siŋgisöndokŋini mosöta uruŋini saŋgoŋniga sarakŋi aket. 10 Miaŋgöra iŋini mönö wuanöŋgöra Anutu esapesapnöŋ al waŋgibeak? Wuanöŋgöra gwarek dölökŋi yeŋgö qakŋine tem könjöŋ toroqeba alinga aŋgubeak? Tem könjöŋ mewöŋi mi nanine ambösakoninan me naninak mewöyök aŋgubingö dop qahö akmalin. 11 Mewö qahöpmö, kewö möt narizin: Kembu Jisösgö kalem möriamŋan mönö Anutu nam köl waŋgiiga amöt qem neŋgiiga Suepkö buŋaya akin. Kian kantri yeŋön mewöyök köna mohot miyök wuataŋgöba letota Suepkö buŋaya akingö möt narimakze.”
12 Mewö jiiga kambu yeŋön lökŋanök keu jaruba bök tatket. Tatketka Pol Barnabas yetkön keu kösohotŋiri kewö jiyohot, “Anutunöŋ nam köl netkii kian kantrinöŋ anda sutŋine misin nup meziga aiwesök aŋgöletot ketaŋi ketaŋi asuhuget.” Mewö jiyohotka kezap ala mötket. Mewö.
Bisop*Bisop, Grik keunöŋ episkopos, nanine keunöŋ jegalöm me inspekta. Yaŋön zioz nup pakpakö mindimindiri galömŋi akza. Jeims kiaŋön Jisösgö gwarekŋi qahöpmö, Jisösgö munŋi. Jeimsnöŋ keu jii mötket.
13 Pol Barnabas yetkön kösohotŋiri jim teköyohot mötketka Jeimsnöŋ keu kewö jiyök, “Azi alaurupni, nöŋön keu jibi kezap ala mötket. 14 Anutunöŋ nalö mutukŋi kian kantri ambazip mesohol köl eŋgiba sutŋineyök ambazip nanŋaŋgöra möwölöhöm eŋgiiga qetŋi bisiba könagesöŋi toroqeget. Anutunöŋ mewö aka könaŋamŋi kondel neŋgiyöhi, Saimon Pitönöŋ miaŋgö keuŋi jii mötzin. 15 Keu mewöŋi mi kezapqetok ambazip yeŋön mewöyök naŋgöba jize. Yeŋön keu kun kewö ohoget ahöza,
16 *Amos 9.11-12‘Miaŋgö andöŋe nöŋön liliŋgöba kaba kiŋ Deiwidkö kantri tohoŋi kunbuk memba wahötmam.
Yaŋön mutuk jakömbuak koumŋi qeba ambösakonini galöm köl eŋgiiga koumŋan buratiba tiŋgita erökmö, nöŋön mi kunbuk möhamgöba kuŋgubiga kantrinöŋ ölöwaka kinma.
17 Mi kewö asuhumapköra akŋam: Ambazip kambu tosatŋi pakpak yeŋön Kembu jarume.
Kian kantri pakpak nani buŋani akŋegöra eŋgoholali, yeŋön Kembu ni göraim niŋgime.
Kembu nöŋön mewö jizal aka miaŋgö dop kantriŋini mem ölöwakŋam.
18 Mewö ahakzali, mi mönö möpŋaŋgö möpŋeyök möta kota malje.’
19 “Miaŋgöra Jeims nöŋön keu mi kewöta mötmötnan kewö möta jizal: Kian kantri ambazip uruŋini Anutugöreŋ meleŋjei, neŋön mönö lömböt könjöŋ ketaŋi yeŋgö qakŋine alinga qahö dop kölma. 20 *Eks 34.15-17; Lew 17.10-16; 18.6-23Mewö qahöpmö, yeŋgöra kimbi kewö ohoinga dop kölma: Yeŋön sömbup busuŋi bem lopioŋgö naluk buŋa qeba könaŋine algetka ösumŋinan walöŋnöhi, mi kude neme. Sero yoŋgorö kude akŋe. Sömbup jölŋi qeqeŋaŋgö busuŋi aka sep mi kude neme. Yuai 4 mi mosötmegöra jim köhöibinak. 21 Mosesgö Köna keu mi mönö möpŋaŋgö möpŋeyök miri dop jim asariba kota maljin. Mi Sabat kendon dop köuluk mirinine oyoŋda mörakzin. Miaŋgöra keu 4 mi ölöp qahö mosötpin.” Mewö.
Jerusalem totokonöŋ kian kantri yeŋgöra kimbi ohoget.
22 Jeimsnöŋ mewö jiiga aposol aka jitŋememe yeŋön könagesö pakpak yembuk keu mi mötket dop kölök. Mötket dop köliga sutŋineyök azi tosatŋi möwölöhöm eŋgiba Pol Barnabas yetpuk mohotŋe Antiokia sitinöŋ melaim eŋgibingöra jiget. Mewö jiba azi qetŋi Judas qetŋi alaŋi Barsabas aka Sailas möwölöhöm etkiget. Azi yahöt mi urumeleŋ kambugö jitŋememe azia ahot. 23 Azi mi melaim etkibin jiba kimbi kun kewö ohoba böröŋire alget,
“Mötnaripkö kian alaurupnini, Antiokia siti aka Siria aka Silisia gölmenöŋ maljei, neŋön eŋgö jölöŋini jizin. Aposol neŋön mötnarip könagesögö jitŋememe yembuk eŋgö urumeleŋ alaurupŋina akzin. Mewö embuk keu eraum mötpingöra kimbi al eŋgizin.
24 Nanine ambazip tosatŋi qahö jim kutum eŋgiinga nanŋinök neŋgömosöta eŋgöreŋ kaba uruŋini kuŋguba keu murutŋi kekelolo eŋgigetka uru mötmötŋini siksauk aiga mörin.
25 Miaŋgöra nini körekŋanök totoko ala urumohot ahin dop kölök. Dop köliga azi yahöt meköba melaim etkiinga wölböt alayahöt Barnabas Pol yetpuk eŋgöreŋ kame.
26 Barnabas Pol yetkön nanine Kembu Jisös Kraistkö qetŋaŋgöra aka malmalŋiri köleŋnohotka tosatŋan etkuget kömumbitkö ahot.
27 Nini Judas Sailas melaim etkiinga kaba keu miyök toroqeba jitnöŋ jiyohotka mötme.
28 Uŋa Töröŋi aka neŋön keu kewögöra urumohot ahinga dop kölja: Eŋgö qakŋine lömböt könjöŋ qahö toroqeba albin. Keu bohonŋi 4 miyök wuataŋgöme. Mi oŋgitketka julbinbuk.
29 Keu 4 mi kewö: Sömbup busuŋi bem lopioŋgö naluk buŋa qeba könaŋine algetka ösumŋinan walöŋnöhi, mi kude neme. Mewöyök sep me sömbup jölŋi qeqeŋaŋgö busuŋi mi kude neme. Sero yoŋgorö kude akŋe. Yuai 4 mi mosöta andö qegetka urumohot ahinga Anutunöŋ kötuetköm eŋgiiga ölöwaka malme. Mönö uru bönjöŋ malme.” Mewö.
Keu memba angetka Antiokia siti yeŋön söŋgaiget.
30 Kimbi mewö ohoba melaim eŋgigetka anget. Köna anda geba Antiokia sitinöŋ aŋgotket. Aŋgota urumeleŋ könagesö köl öröm eŋgigetka tokoget. Tokogetka kimbi mi eŋgigetka oyoŋget. 31 Mi oyoŋgetka miaŋgöra amqeba urukölalep möta söŋgaiget. 32 Judas Sailas yetkön nanŋirak kezapqetok azia mala goro keu gwötpuk eŋgiba urugö naŋgönaŋgö keu jiba mem köhöim eŋgiyohot. 33 Mem köhöim eŋgiba nalö tosatŋi miaŋgöreŋ toroqeba malohot. Malohot teköiga urumeleŋ alaurup yeŋön “Luaibuk anmahot,” jiba melaim etkiget. Jerusalem malohotka melaim etkigeri, Judasnöŋ mönö yeŋgöreŋ liliŋgöyök. 34 (-)†Tosatŋan toroqeba jabö v 34 kewö alje: Liliŋgöyökmö, Sailasnöŋ keuŋi jöhöba toroqeba miaŋgöreŋ malök.
35 Pol aka Barnabas yetkön toroqeba Antiokia sitinöŋ mala ambazip tosatŋi gwötpuk yembuk Kembugöreŋ Buŋa keu kusum eŋgiba uruŋini kuŋgum eŋgiba malget. Mewö.
Pol aka Barnabas yetkön deŋnohot.
36 Mewö malgetmö, nalö tosatŋi teköiga Polnöŋ Barnabasgöra kewö jiyök, “Netkön taon miri pakpak liliköba Kembugöreŋ Buŋa keu jim asariba maliri, mönö miaŋgöreŋ liliŋgöba urumeleŋ alaurupniran denöwö maljei, mi ölöp anda eka mötpit.” 37 Mewö jiiga Barnabasnöŋ Jon qetŋi alaŋi Mak qetkeri, i mewöyök waŋgita mohotŋe anbingö mörök.
38 *Apo 13.13Mewö mörökmö, Jonöŋ mutuk Pamfilia taonöŋ löwöriba etkömosöta yetpuk toroqeba nup qahö meyök. Miaŋgöra Polnöŋ i waŋgita anbingö möri qahö dop kölök. 39 Qahö dop köliga aŋgururuk aka uruŋiri könöp jeiga deŋnohot. Deŋda Barnabasnöŋ Mak waŋgita geba waŋgenöŋ öŋgöyohotka opo seri öröba möröreŋgögetka luhutnöŋ naŋgöi gölme jölanŋi Saiprus miaŋgöreŋ anohot. 40 Anohotmö, Polnöŋ azi qetŋi Sailas meköiga urumeleŋ alaurup yeŋön Kembugö böröŋe al etkiba kalem möriamŋan sel jöhöm etkimapköra jigetka mosöta anohot. 41 Anda mala Siria aka Silisia prowins yahöt mi kutuba liliköyohot. Liliköba Polnöŋ urumeleŋ könagesöŋi könagesöŋi eŋgeka mem köhöim eŋgiba malök. Mewö.
*15:1: Lew 12.3
*15:12: Bisop, Grik keunöŋ episkopos, nanine keunöŋ jegalöm me inspekta. Yaŋön zioz nup pakpakö mindimindiri galömŋi akza. Jeims kiaŋön Jisösgö gwarekŋi qahöpmö, Jisösgö munŋi.
*15:16: Amos 9.11-12
*15:20: Eks 34.15-17; Lew 17.10-16; 18.6-23
†15:34: Tosatŋan toroqeba jabö v 34 kewö alje: Liliŋgöyökmö, Sailasnöŋ keuŋi jöhöba toroqeba miaŋgöreŋ malök.