1 Abramnöŋ Ijipt gölme mosöta anömŋi aka bau inap yuaiŋi pakpak memba eŋguaŋgita Lotpuk mohotŋe liliŋgöba anda Keinan gölmegö Saut likepŋi qetŋi Negew miaŋgöreŋ kaŋgotket. 2 Abramgöreŋ lama bulmakau aka goul silwö mi lömbötpuk ahöm waŋgiiga azi kindiŋbirik malök. 3 Mewö mala Negew distrik uruŋe tata mosöta kusukŋanök rowoŋqeqeŋine ahöba wahöta anda mala Betel mire kaŋgotket. Opo seri koumŋi mutuk Betel aka Ai miri mietkö sutŋire kuŋgui kinöhi, mönö miaŋgöreŋ kaŋgotket. 4 Mutuk jöwöwöl alta meyöhi, mönö miaŋgöreŋ kaŋgota Kembugö qetŋi qeta köuluköyök.

5 Lotnöŋ Abrambuk tata mosöta malöhi, yaŋön mewöŋanök lama bulmakau kambuŋi kambuŋi aka opo seri koumŋi koumŋi mi gwötpuk memba malök. 6 Mewö mala sömbup sukinap yuaiŋiri gwötpuk ketaŋi ahöm etkiiga gölmenöŋ qahö dop kölök. Mi öröröŋ gumohom eŋgieŋgigö dop qahö ahöiga mohotŋe tata malmalgö lömböriba osiyohot. 7 Osiba Abram aka Lot yetköreŋ sömbup galömurupŋiri yeŋgö sutŋine gölmegö aŋgururuk asuhuyök. Nalö miaŋgöreŋ Keinan könagesö aka Periz könagesö yeŋön gölme miaŋgö toŋi aketka yembuk mohotŋe malget.

8 Mewö mala Abramnöŋ Lotköra kewö jii mörök: “Niri mönö iwi moröya maljit. Miaŋgöra ni aka gi sutnire me sömbup galömurupniri yeŋgö sutŋine aŋgururuk kude ahöma. 9 Miaŋgöra ölöp deŋbit. Gölme pakpak mönö göhö jemesoholge aukŋe ahöm anjawi, mi ölöp ekzan. Mewö aiga göŋön qaninire göröken anmam jiman ewö, nöŋön ölöp ölnire göröken anmam. Me göŋön ölnire göröken anmam jiman ewö, nöŋön ölöp qaninire göröken anmam.”

10 *Jen 2.10Mewö jiiga Lotnöŋ uba wahöta Jordangö gölme köröŋi ketaŋi pakpak ehiga Anutunöŋ mi ölöp mem kelöriga Kembugöreŋ oyaeŋkoyaeŋ arö kelökŋambuk ewö ahök. Mi Ijipt yeŋgö gölme ewö ahöba Zoar miri göröken anök. Mutuk Kembunöŋ Sodom aka Gomora qahö ayuhum etkiiga nalö miaŋgöreŋ gölme mi mewö ahöyök. 11 Mewö ahöiga Lotnöŋ mi ek kewöta Jordangö gölme köröŋi ketaŋi pakpak mi möwölöhöba wehön kotkotŋe göröken anök. Mewö aka deŋnohot. 12 Deŋda Abramnöŋ Keinan gölmenöŋ anda malökmö, Lotnöŋ gölme köröŋi ketaŋaŋgö taonŋi taonŋi yeŋgö sutŋine anda kaba malök. Mewö mala opo seri koumŋi meköba memba kuŋguba anda kinda teteköŋe Sodom kösutŋe aŋgota malök. 13 Miaŋgöreŋ malökmö, Sodom könagesö yeŋön könagesö tandök bölöŋi aka Kembu qetala siŋgisöndok keta bölökŋi aka memba malget.

14 Lotnöŋ Abram umbula aniga nalö miaŋgöreŋ Kembunöŋ Abramgöra keu kewö jiyök: “Mönö jegi ötök ala mesoholge uba wahöta eleŋda andöge uba mewöyök wehön kotkotŋe aka wehön gegeŋe göröken unöŋ. 15 *Apo 7.5Gölme pakpak ki ekzani, mi mönö gi aka göhö gwölönarökurupki eŋgö buŋaya qebi nalö teteköŋi qahö buŋaŋina ahöm öŋgöma. 16 Nöŋön gwölönarökurupki ahumsehip gwötpuk eŋgibiga qötöŋinan qariba gölmegö sakösakŋi (sakösiŋi) ewö akŋa. Kun daŋön sakösiŋ kötŋi mieŋgö jaŋgöŋini oyoŋbawak, yaŋön ölöp gwölönarökurupki yeŋgö jaŋgöŋini mema. 17 Nöŋön gölme ki mönö göhö buŋaya qem gihizal. Miaŋgöra ölöp wahöta anda kaba gölme pakpak ki bahöbahö euke emuke ek kutuba malman.”

18 Mewö jiiga Abramnöŋ wahöta opo seri koumŋi qeköba memba kuŋguba anda Hebron gölmenöŋ kaba Mamre mire in ip ketaŋi kin angeri, mieŋgö kösutŋine tarök. Miaŋgöreŋ tata Kembugöra jöwöwöl alta kun meyök. Mewö.