12
Anutunöŋ Abram oholök.
1 *Apo 7.2-3; Hib 11.8Kembunöŋ Abramgöra kewö jiyök: “Gi gölmegi, könagesögi aka iwigahö miri yuaiŋi mosöta gölme kondel gihimami, mönö miaŋgöreŋ anman. 2 Nöŋön ahumsehip gihibiga gwölönarökurupkan könagesö ketaŋi akŋe. Nöŋön kötuetköba naŋgöm gihibiga qetbuŋagan qariba ketaŋi akŋa. Mewö aiga Anutunöŋ göhöra aka könagesö tosatŋi kötuetköm eŋgiba malma.
3 Denike yeŋön gi kötuetköm gihimei, nöŋön mönö i kötuetköm eŋgiba malmam.
Denike yeŋön gi jim suehöm gihimei, nöŋön mönö i mewöyök jim suehöm eŋgiba malmam.
Göhöra aka nöŋgö kötumötuetnan mönö gölmegö könagesö kambuŋi pakpak yeŋgö qakŋine öŋgöiga oyaeŋkoyaeŋ akŋe.”*Gal 3.8
4 Mewö jiiga Abramnöŋ Kembunöŋ jiyöhaŋgö dop Haran miri mosöta aniga Lotnöŋ yambuk anohot. Abramnöŋ yambuŋi 75 aiga miaŋgöreŋ Haran miri mosöta anök. 5 Anmam jiba anömŋi Sarai, behötŋi Lot, sukinapŋi pakpak qezakögetka sehiyöhi aka welenqeqe ambazip Haran mirinöŋ mala eŋgömegeri, mi memba eŋguaŋgita mosöta Keinan gölmenöŋ anbingöra anda mala miaŋgöreŋ aŋgotket.
6 Abramnöŋ gölme miaŋgöreŋ anda mala mala miri qetŋi Sekem miaŋgöreŋ kaŋgota in ip ketaŋi qetŋi More miaŋgö kösutŋe koumŋi qeba tarök. Nalö miaŋgöreŋ Keinan ambazip yeŋön lök gölme miaŋgöreŋ malget. 7 Mewö malgetka Kembunöŋ Abramgöreŋ asuhuba kewö jiyök: “Gölme ki mi mönö göhö gwölönarökurupki yeŋgö buŋaya qem eŋgimam. “Mewö jiiga Abramnöŋ Kembu yaŋgöreŋ asuhuyöhi, yaŋgöra jöwöwöl ohohogö altaŋi kun miaŋgöreŋ meyök.*Apo 7.5; Gal 3.16
8 Miaŋgöreŋök mosöta toroqeba Betel mirigö wehön kotkotŋe göröken gölme kunduŋambuk miaŋgöreŋ anda opo seri koumŋi möröreŋgöba kuŋgui kinök. Mewö kiniga Betel miri miaŋön wehön gegeŋe göröken tariga Ai taonöŋ wehön kotkotŋe göröken tarök. Mewö tarohotka sutŋire kinda Kembugö jöwöwöl altaŋi kun miaŋgöreŋ memba Kembugö qetŋi qeta köuluköm waŋgiyök. 9 Miaŋgö andöŋe gölme mi mosöta toroqeba Saut göröken anda distrik qetŋi Negew miaŋgöreŋ tata malget. Mewö.
Abramnöŋ Ijipt kantrinöŋ anda malök.
10 Nalö miaŋgöreŋ Keinan gölmenöŋ bödi (buörö) asuhuiga miaŋön köhöiba lömbötŋi aiga Abramnöŋ Ijipt kantrinöŋ kusukŋanök malbingöra anget. 11 Könanöŋ anda Ijipt dopdowigetka Abramnöŋ miaŋgöreŋ anömŋi Saraigöra keu kewö jiyök: “Mötnöŋ, göŋön ambi eksihimgabuk akzani, mi mötzal. 12 Mewögöra Ijipt azi yeŋön gi geka kewö jime: ‘Ki yaŋgö anömŋa.’ Mewö jiba ni nuŋguget kömumam-mö, gi gehorigetka malman. 13 *Jen 20.2; 26.7Miaŋgöra göŋön mönö kewö jiman: ‘Ni yaŋgö nenŋa.’ Mewö jinöŋga göhöra aka ölöpŋanök ak niŋgiba nöŋgö malmalni gou kölgetka malmam.”
14 Abramnöŋ Ijipt kaiga Ijiptkö ambazipŋi yeŋön Sarai eketka ambi eksihimŋambuk qetpuk ahök. 15 Miaŋgöreŋök Farao kiŋ kembugö pom jembonurupŋi yeŋön i ekeraŋgöra Farao kiŋgöreŋ anda Saraigö sileŋi möpöseigetka mörök. Mi möta jiiga Sarai waŋgita kiŋ kembugö jakömbuak miri uruŋe öŋgöget. 16 Öŋgögetka Farao kiŋnöŋ Saraigöra aka Abram ölöpŋanök ak waŋgiyök. Mewö ak waŋgiiga yuai kewöŋi mi Abramgö buŋaya ahök: lama, bulmakau, doŋki aziŋi aka ambiŋi, welenqeqe azi aka ambi aka kamel jesöŋgöŋi mi Abram waŋgiiga buŋa qem aŋguyök.
17 Mi buŋa qem aŋguyökmö, Kembunöŋ Abramgö anömŋi Sarainöŋ Farao kiŋgö mire malöhaŋgöra aka jiiga kawöl bölöŋi kötökŋan Farao kiŋ aka ambazip yaŋgö jakömbuak mire malgeri, yeŋgö qakŋine öŋgöyök. 18 Mi öŋgöiga Farao kiŋnöŋ Abram köl öröi kaiga kewö qesim waŋgiyök: “Göŋön mönö wani kimbia ak niŋginöŋ? Wuanöŋgöra ‘Mi anömna,’ mewö qahö jinöŋga möral? 19 Wuanöŋgöra ‘I mi nena,’ jinöŋ? Mewö jinöŋga nöŋön i anömna akŋapköra waŋgiral? Anömgi ki. Mönö i waŋgita anohot.”
20 Mewö jiba aziurupŋi jim kutum eŋgiiga Abram waŋgita könanöŋ anda al eŋgigetka anömŋi aka öröyuaiŋi pakpak ahöm waŋgiyöhi, mi memba eŋguaŋgita anget. Mewö.