1 Abrahamnöŋ Mamre miri mosöta toroqeba Saut göröken distrik qetŋi Negew miaŋgöreŋ anda miri qetŋiri Kades aka Sur mietkö sutŋire malök. Miaŋgö andöŋe toroqeba taon qetŋi Gerar miaŋgöreŋ anda kusukŋanök malök. 2 *Jen 12.13; 26.7Miaŋgöreŋ mala ambazip mieŋgöra kewö jii mötket: “Sara mi nena. “Mewö jiiga Gerargö kiŋi Abimelek yaŋön keu ali aniga Sara waŋgita jakömbuak miriŋe kaget.

3 Mewö aketmö, Anutunöŋ suŋgem kunöŋ Abimeleköreŋ kaba gaunöŋ kewö jiyök: “Ambi buŋa qem aŋguzani, mi azi kungö anömŋa. Miaŋgöra gi mönö yaŋgöra aka kömupkö buŋaya akŋan.”

4 Mewö jiyökmö, kiŋ Abimeleknöŋ Sara qahö meyöhaŋgöra aka kewö jiyök: “Kembu, ni siŋgisöndokö keuni qahö. Miaŋgöra göŋön ni aka könagesöurupni nini öne töhön ayuhum neŋgibanbuk. 5 Abrahamnöŋ mönö nanŋak nöŋgöra kewö jiyök: ‘Ambi mi nena.’ Ambinöŋ mewöyök kewö jiyök: ‘Abraham mi nena.’ Miaŋgöra urune geŋmoŋ qahö ahöiga ambi mi jibi kaiga börönan yuai tölokŋi kun qahö ahal.”

6 Mewö jiiga Anutunöŋ gaunöŋ likepŋi kewö jii mörök: “Keu jizani, mi ölŋa. Göhö uruge geŋmoŋ kun qahö ahöiga göhöreŋ kayöhi, mi mötzal. Miaŋgöra göŋön ambi mi misiriba nöŋgö jene siŋgisöndok akanbuköra sel jöhöm gihiba malal. 7 Mewögöra ambi mi mönö kunbuk meleŋda apŋaŋgöreŋ waŋgiman. Azi mi kezapqetok azia aka ölöp göhöra köuluköiga qahö kömuman. I kunbuk qahö waŋgiman ewö, keu ki mönö ölŋa mötman: Gi aka tinitosolomurupki iŋini mönö körek kömume.”

8 Keu mi jii kiŋnöŋ möta söŋanök wahöta pom jembonurupŋi pakpak eŋgohol tokom eŋgiba Kembunöŋ keu pakpak jiyöhi, mi jii möta töwöratiba keŋgötŋini gwötpuk mötket. 9 Mewö mötketka kiŋ Abimeleknöŋ Abrahamgöra keu ali öŋgöiga kewö jiba qesim waŋgiyök: “Gi mönö wani kimbia ak neŋginöŋ? Nöŋön wani bölöŋi kun ak gihibiga göŋön kondotnöŋga siŋgisöndokö keu lömbötŋan mönö ni aka könagesöni nöŋgö sel tohoŋ uruŋe maljei, neŋgö qaknine öŋgömamgö akza? Göŋön yuai qahö ahakŋaŋgö dop mia soŋgo walöŋda ak niŋginöŋ. 10 Göŋön mönö könaŋi wuanöŋgöra silik mi aknöŋe?” Kiŋ Abimeleknöŋ Abraham mewö qesim waŋgiiga

11 kewö meleŋnök: “Nöŋön keu mi kewö mötmöriba jial: ‘Gölme kiaŋgö könagesö eŋön Anutugö jitŋi oŋgitpinbuköra keŋgötŋini qahö mötpeak. Miaŋgöra ni anömnaŋgöra aka nuŋguget kömumbileŋbuk.’ 12 Yaŋön ölŋa neni, iwinaŋgö böratŋi akza. Namnaŋgö böratŋi qahö akzawaŋgöra i anömna meal. 13 Anutunöŋ Iwinaŋgö miriŋi mosöta kungen anmangö jiyöhi, nöŋön nalö miaŋgöreŋ Saragöra kewö jial: ‘Niri denike denike anbiri, miaŋgöreŋ nöŋgöra nena jiman. Mewö aka miaŋön ni urukalem kondel niŋgiba malman.’ ”

14 Mewö jii möta Abimeleknöŋ Abrahamgö anömŋi Sara meleŋda waŋgiyök. Mewöŋanök lama bulmakau aka welenqeqe azi aka ambi mi mohotŋe i waŋgiyök. 15 Waŋgiba keu kewö jiyök: “Mötnöŋ. Nöŋgöreŋ gölme ki wösöge ahözawi, miaŋgöreŋ mönö nangi sihimgahö dop malman.” 16 Mewö jiba Saragöra kewö jiyök: “Mötnöŋ. Nöŋön moneŋ silwö köt 1000:gö dop nengi waŋgibiga miaŋön töwagi akza. Töwa miaŋön könaŋamgi kondeliga ambazip körek göbuk maljei, yeŋön mi eka kewö jiba möt yaköme, ‘Siŋgisöndokö keuŋi mi Saragöreŋ qahö ahöza.’ ” Mewö jiyök.

17-18 Abrahamgö anömŋi Saragöra aka Kembunöŋ ambi pakpak kiŋ Abimelekö miri uruŋe malgeri, yeŋgö morö memegö könaŋi jöhöyök. Miaŋgöra Abrahamnöŋ Anutu köuluköiga Abimelek mem ölöwahök. Mewöyök anömŋi aka welenqeqe ambiurupŋi mem ölöwak eŋgiiga kunbuk moröŋinambuk aket. Mewö.