1 Ijipt miaŋgöreŋ nene ahöyöhi, keu mi Keinan gölme miaŋgöreŋ jigetka Jeikobnöŋ möta nahönurupŋi kewö jii mötket: “Iŋini mönö wuanöŋgöra silekmalek aka kuruk je aŋgeka malje? 2 Ijipt miaŋgöreŋ wit padi ahözawi, nöŋön keu mewö möral. Nini qahö kömumba malmal toroqeba malbingöra iŋini mönö wahöta Ijipt geba miaŋgöreŋ nene tosatŋi bohonŋi memba kagetka nemba malbin.”*Apo 7.12

3 Mewö jii möta Josefkö daturupŋi 10 yeŋön miriŋini mosöta nene bohonŋi membingöra Ijipt gölmenöŋ anbingö aket. 4 Iwiŋini Jeikobnöŋ Josefkö munŋi Benjamingö qakŋe ayuayuhu kun öŋgöbapuköra keŋgötŋi möröhaŋgöra i daturupŋi yembuk qahö melaim waŋgiiga anget.

5 Keinan gölmenöŋ bödi mi mewöŋanök ahöyöhaŋgöra Israelgö nahönurupŋi yeŋön Keinan azi tosatŋan angeri, yeŋgö sutŋine wit padi bohonŋi membingöra mohotŋe anget. 6 Angetmö, Josefnöŋ Ijipt kantrigö azi kembuŋini tata malök. Yaŋön wit padi mi könagesöŋi pakpak yeŋön bohonŋi memegöra aliga yaŋgöreŋ kaŋgota malget. Miaŋgöra daturupŋan kageri, yeŋön kaŋgota miaŋgöreŋök yaŋgö wösöŋe simin köla gölmenöŋ bamgöget. 7 Mewö bamgögetka Josefnöŋ daturupŋi eŋgeka möt kutum eŋgiyökmö, könaŋamŋi köyatim eŋgiba kian azigö tandök ak eŋgiba örömureim keu könöpŋambuk jiba kewö qesim eŋgiyök: “Iŋini mönö denikepköra kazeye?” Qesim eŋgiiga kewö meleŋget: “Nini Keinan gölmenöhök nene söŋgöröŋi membingöra kazin.”

8 Mewö meleŋgetka Josefnöŋ daturupŋi möt kutum eŋgiyökmö, yeŋön i qahö möt kutum waŋgiget. 9 Qahö möt kutum waŋgigetka Josefnöŋ mönöwök gaunŋi yeŋgöra ehöhi, mi mötmötŋe kaŋgoriga mötmöriba jihip je suŋini mitiba kewö jii mötket: “Yei! Iŋini mönö kegwek azia akze. Nini kantrinini denikeaŋgöreŋ göröken awörök aka yarö gilbingö lömbörizini, iŋini mi ek kewöta mötpingöra ki kaze.”*Jen 37.5-10

10 Mi möta kewö meleŋ waŋgiget: “Azi kembunini, mewö qahö. Welenqeqeurupki nini mönö nene söŋgöröŋi membingöra kazin. 11 Nini körekŋanök azi mohotkö nahönurupŋi akzin. Nini azi diŋdiŋi mala muneŋ qahö jimakzin. Göhö welenqeqeurupki neŋön mönö gölme ek-kewötkö yarö azia qahö aka maljin.”

12 Meleŋ waŋgigetka “Qahö!” töhöreŋ qeta kewö toroqeyök: “Nini kantrinini denikeaŋgöreŋ göröken awörök aka yarö gilbingö lömbörizini, iŋini mi ek kewöta mötpingöra ki kaze.”

13 Mi möta kewö meleŋ waŋgiget: “Welenqeqeurupki nini Keinan gölmegö aziŋi mohotkö nahönurupŋa, darumun 12 akzin. Munini qöndökŋan nalö kewöŋe iwininambuk mire tariga kunŋan qahö toroqeba malja.”

14 Mewö meleŋ waŋgigetka kewö jim eŋgiyök: “Mewö aiga iŋini ölŋa gölme ek-kewötkö yarö azia akzei, mi lök jibi mötze.

15 Mewö maljeaŋgöra nöŋön kewö esapköm eŋgimam: Farao kiŋnöŋ jebuk maljawi, nöŋön keu öl töhönŋi miaŋgö dop jöjöpaŋ keu kewö jim köhöizal: Munŋini qöndökŋan ki qahö kama ewö, iŋini mönö gölme ki qahö mosöta anme. 16 Iŋini keu ölŋi jize me qahö, nöŋön mi esapkömamgöra kewö jizal: Iŋini mönö sutŋineyök kun melaigetka anda munŋini qöndökŋi waŋgita ki kamahot. Tosatŋi iŋini mönö ki mamböta kösö mire tata malme. Mewö qahö akŋe ewö, iŋini mönö ölŋa gölme ek-kewötkö yarö azia akze. Farao kiŋnöŋ jebuk malja ewö, nöŋön keu öl töhönŋi miaŋgö dop jöjöpaŋ keu mi jim köhöizal.”

17 Mewö jim eŋgiba jiiga kösö miriŋe al eŋgigetka wehön karöbutkö dop tatket. 18 Wehön karöbut aiga Josefnöŋ kaba keu kewö jii mötket: “Jeŋinambuk toroqeba malbingö mötze ewö, iŋini mönö yuai jimami, mi aketka nöŋön ölöp malmalŋini jöhömam. Nöŋön mewöyök iŋini ewö Anutugö jitŋi oŋgitpileŋbuköra keŋgötni mörakzal. Miaŋgöra iŋini mönö kewö akŋe: 19 Iŋini azi diŋdiŋi muneŋini qahö malje ewö, darumun eŋgöreŋök mönö kunŋan kösö miri kiaŋgöreŋ toroqeba tariga tosatŋi iŋini ölöp wit padi memba miriŋine liliŋgöba anme. Miaŋgöreŋ anda miriŋine könagesöurupŋinan bödi aka maljei, mi nene eŋgime. 20 Iŋini mönö mewö anda munŋini qöndökŋi waŋgita nöŋgöreŋ kame. Kagetka keuŋinaŋgö ölŋan mewö asuhuiga eka möt kutuba qahö eŋgubi kömume. “Keuŋi mewö jiiga mönö miaŋgö dop aket.

21 Yeŋön nanŋini Hibru keunöŋ sutŋine keu kewö eraum-mötket: “Nini munini silik ak waŋgiini, miaŋgö likepŋi bölöŋan mönö ölŋa qaknine öŋgöza. Yaŋön malmalŋi jöhöba ak kömum waŋgibingöra uleta kuŋgum neŋgiiga kahasililiŋi ketaŋi ehinmö, yaŋgö keuŋi möta mi qahö wuataŋgöin. Miaŋgöra kahasililiŋ lömbötŋambuk kiaŋön neŋgö qaknine öŋgöza.”

22 Mewö eraum-mötketka Rubenöŋ kewö jiyök: “Nöŋön kewö jibi mötket: ‘Iŋini azi gwabö mi silik bölöŋi kude ak waŋgime.’ Mewö jialmö, iŋini nöŋgö keuni mi möta silekmalek aket. Mötket, nalö kewöŋe yaŋgö sepŋaŋgö keugö likepŋan mönö qaknine öŋgöiga kahasililiŋ mötzin.”*Jen 37.21-22

23 Mewö eraum-mötketka Josefnöŋ yembuk Ijipt keunöŋ keu jiiga kunöŋ mi meleŋnök. Miaŋgöra yeŋön keuŋini jigetka ölöp möt asariyöhi, mi daturupŋan qahö möt kutuget. 24 Josefnöŋ keuŋini möt asariba liliŋgöba sahörök. Sahöta kunbuk liliŋgöba eŋgeka yembuk keu jiyök. Yembuk keu jiba Simeon sutŋineyök memba jiiga yeŋgö jeŋine jöhöget. Mewö.

25 Josefnöŋ jimkutukutu kewö alök: “Welenqeqe iŋini mönö azi mieŋgö toru gösöŋine wit padi löŋgötketka numbuŋe kotketka mohot mohot yeŋgö moneŋ esuŋini mi totoŋine inanŋik inanŋik toruŋine alme aka köna anangö nene semönŋi mi tok eŋgime. “Mewö jim kutum eŋgiiga miaŋgö dop ak eŋgiget. 26 Mewö ak eŋgigetka wit padi toruŋini mi doŋki qakŋine ala mosöta anget. 27 Anda mala gaun ahöbingöra miri kunöŋ aŋgota darumun yeŋgöreŋök kunŋan doŋkiŋi gumohomamgöra aka toru kösöŋi pösata moneŋ esuŋi mi toru numbuŋe nene qakŋe kiniga ehök. 28 Mi eka darumunŋi kewö jii mötket: “Eket, nöŋgöreŋ moneŋ mi mönö meleŋda torune utketka kinja. “Mewö möta wösöŋini juliga aurum tililiŋgöba aŋgeka kewö jiget: “Anutunöŋ mönö wani yuaia ki ak neŋgizawe?”

29 Anda mala Keinan gölmenöŋ iwiŋini Jeikobköreŋ aŋgota yuai asuhum eŋgiyöhi, miaŋgö kösohotŋi mi körek kewö jigetka mörök: 30 “Kantri miaŋgö azi kembuŋi yaŋön örömureim keu könöpuk jiba gölme ek-kewötkö yarö azia akinak, miaŋgö tandök ewö ak neŋgiyök.

31 “Mewö ak neŋgiyökmö, nini yaŋgöra kewö jiin: ‘Nini azi diŋdiŋi muneŋnini qahö mala gölme ek kewötpingöra aka qahö kazin. Qahöpmahöp! 32 Nini azi mohotkö nahönurupŋa, darumun 12 aka maljin. Kunŋan qahö toroqeba maliga munini qöndökŋan nalö kewöŋe Keinan gölmenöŋ iwininambuk mire tatza.’

33 “Mewö jiinga gölme miaŋgö azi kembuŋan neŋgöra keu kewö jiyök: ‘Iŋini azi diŋdiŋi me muneŋi maljei, mi kewö kewöt eŋgiba mötmam: Eŋgöreŋöhök darumunŋini kun i mönö mosötketka nömbuk ki tariga tosatŋi iŋini ölöp wit padi memba liliŋgöba anme. Anda miriŋine könagesöurupŋinan bödi aka maljei, mi nene eŋgime. 34 Iŋini gölme ek-kewötkö yarö azia qahöpmö, azi diŋdiŋi muneŋini qahö maljei, mi kewö kewöt eŋgiba mötmam: Iŋini mönö anda munŋini qöndökŋi mi waŋgita nöŋgöreŋ kame. Mewö kagetka darumunŋini meleŋ eŋgibiga ölöp gölme kiaŋgöreŋ aŋgumnep-qaŋgumnep aka malme.’ ”

35 Mewö jiba toru gösöŋineyök nene köweŋine mokogetka moneŋ esuŋini moneŋinambuk mi toruŋine mohot mohot totoŋine kini miwikŋaiget. Moneŋ esuŋini miwikŋaiba eka i aka iwiŋini mohotŋe auruba keŋgötkotkot mötket. 36 Mewö mötketka iwiŋini Jeikobnöŋ kewö jii mötket: “Iŋini nahönurupni körek pakpak noaŋgitpingö mötze: Josefnöŋ qahö malja. Simeon nembuk qahö malja. Benjamin mi mewöŋanök noaŋgita waŋgita anbingö jize. Sihimbölö pakpak miaŋön mönö nöŋgö qakne öŋgöza.”

37 Mewö jii möta Rubenöŋ iwiŋaŋgöra keu kewö jiyök: “Ni Benjamin qahö waŋgita liliŋgöba kaba gihimam ewö, gi ölöp nani nahönyahötni yahöt mi etkunöŋga kömumahot. Benjamin mi ölöp nöŋgö böröne alnöŋga i mönö galöm köla anda mala waŋgita liliŋgöba kaba gihimam.”

38 Mewö jiyökmö, Jeikobnöŋ meleŋda jiyök: “Nahönyahötni qöndökŋi yahöt yetköreŋök datŋan kömuiga munŋan mohot malja. Iŋini könanöŋ anbingö mötzei, miaŋgöreŋ ayuayuhu kunŋan yaŋgö qakŋe öŋgöma ewö, iŋini mönö kondotketka wösöbirik öŋgöŋgöŋan nöŋgö qakne öŋgöiga kömumba nöröp jupni yaŋgonambuknöŋ uŋem mire gemam. Miaŋgöra nöŋgö nahönan mönö nömosöta embuk qahö anma. “Mewö.