15
Kag Kanta nina Moises
1 Pagkatabok ninra sa ragat, nagkinanta si Moises ag kag mga Israelinhon para sa GINO-O it tuyar kali:
“Kami ay makanta sa GINO-O,
dahil katitingaya kag Ida pagraog.
Kag mga kabayo ag mga sundalong nakapangabayo it amo kaaway
ay Ida yang tinapyak sa ragat.
2 Kag GINO-O kag nagtata-o sa amo it kusog,
Sida kag amo ingkakanta.
Sida kag amo Manluluwas,
Sida kag amo Dios, amo Sida adayawon,
Sidang Dios it amo tatay, amo Sida itaas.
3 Kag GINO-O ay sundalo nak waya't kapantay.
GINO-O kag Ida pangayan.
4 Kag mga karwahe ni Paraon ag kag ida mga sundalo,
Ida yang tinapyak sa ragat.
Gingyunor ra Nida sa Puyang Ragat
kag mga piling pinunong sundalo ni Paraon.
5 Kag marayom nak tubi it nagtabon sa inra.
Nagrugyang sinra nak nupay bato.
6 Kag Imo tuong damot, amo GINO-O, ay makagagahom.
Ingwagit kag amo mga kaaway
parayan sa Imo rakong gahom.
7 Ikaw nak Halandong Hari,
it nagpirdi sa Imo mga kalaban.
Nagrayab-rayab kag Imo kahangit,
nak imaw kag pay nagsunog sa inra tuyar sa mga uhot.
8 Pay Imo yang inghuyop, ag natunga kag tubi.
Kag suyog ay nagpaibabaw
nak pay tuyar sa pader.
Kag marayom nak tubi ay pay nagtugas
hastang sa katugkaran.
9 Kag mga kaaway ay naghinambog,
‘Ayaguron namo sinra, amo sinra maaabutan,
ag amo aparti-partihon kag inra mga manggar sa amo mga kaibahan,
hastang sinra ay magkawar-an.
Amo ahukason kag amo talibong,
ag amo sinra apangmatyon.’
10 Pero sa usang hudop yang Nimo,
natabunan sinra it ragat.
Nagyugrang sinra nak pay tingga
sa marayom nak tubi.
11 Si-o sa inra mga dios kag makakapantay sa Imo,
amo GINO-O?
Si-o kag makakapantay sa Imo nak makagagahom
ag balaan?
Si-o kag makakapareho sa Imo nak gingkakahadlukan
dahil sa Imo mga ginghihimo nak mga katitingayang milagro?
12 Pay Imo yang ginghunat kag Imo tuong damot,
ag sinra ay gingyubong sa irayom it ragat.
13 Dahil sa Imo waya gibabag-ong pagpalangga,
nag-uuna Ikaw sa amo, nak Imo mga tinubos.
Parayan sa Imo kusog, kami ay Imo ingpapangunahan
papagto sa Imo balaan nak istaran.
14 Kali ay mababantog sa ibang mga nasyon,
ag sinra ay mapanguyog;
Mababatyagan it mga Pilistinhon kag kahadlok
tuyar sa kabading nagpapasyapo.
15 Kag mga pinuno it Edom ay magkakahadlok.
Kag mga nagpapanguyo sa Moab ay mapinanguyog,
ag kag tanang mga taga-Canaan
ay pay matutunaw sa kahadlok.
16 Kahadlok ag pagkalibog kag mahari sa inra.
Parayan sa rakong gahom it Imo damot,
sinra'y pay mga bato nak indi makahiwas,
Hastang kaming Imo mga tawuhan,
amo GINO-O, ay nakarayan,
Kaming Imo mga tinubos,
sinra ay amo nalampasan.
17 Aray-on Nimo kami ag ibutang sa Imo gingpromisang duta,
sa lugar nak Imo pinili, amo GINO-O,
agor maging Imo istaran,
sa Templo nak gingtinrog it Imo damot.
18 Kag GINO-O it mahari hastang sa waya't katapusan.”
Kag Kanta ni Miriam
19-20 Ngasing kag manghor nak rayaga ni Aaron nak kag ngayan ay si Miriam ay usang propeta. Ag pagkatabok ninra sa ragat, narumruman nida nak tong gingyayagor kag mga Israelinhon it mga kabayo ni Paraon, kanunot kag mga nakasakay sa karwahe ag ibang mga sundalo ay ingpabalik it GINO-O kag tubi ag natabunan sina Paraon. Pero kag mga Israelinhon ay imaw kag sa unahan nak nagpapanaw yang patabok sa ugang duta sa tunga it ragat. Kada nagbaoy sida it tamborin, ag nagsunor ra sa ida kag tanang mga kabade nak gamit ra kag tamborin ag nagsasadaw habang nagkakanta sida. 21 Tuyar kali kag kanta ni Miriam:
“Magkanta it pagdayaw sa GINO-O
dahil Sida ay nagraog.
Kag mga kabayo ag mga sundalong nakapangabayo it ato kaaway
ay Ida yang tinapyak sa ragat.”
Kag Mapait nak Tubi sa Tuburan
22 Pagkatapos, gingpahanra ni Moises kag mga Israelinhon sa pagpadayon, ag nagginaney sinra halin sa Puyang Ragat papagto sa Disyerto it Sur. Nagpanaw sinra sa sakop it tatlong adlaw, ag waya sinra't nakitang tubi. 23 Tong bandang huli, nakaabot sinra sa tuburan it Mara, ugaling indi ninra mainom kag tubi ruto dahil kali ay mapait. Kada kaling tuburan ay gingtawag nak Mara.*15:23 Kag gustong bisayahon it Mara ay “Mapait.” 24 Ngani, nagnginuyob kag mga tawo laban kang Moises, ag siling ninra, “Ni-o ngasing kag ato ainumon?”
25 Dahil rili, sida ay nag-ayaba sa GINO-O. Ag gingtudlo sa ida it GINO-O kag usang klasing sanga raha. Ingbaoy nida kina ag ingpilak sa tubi, ag kag pait it kinang tubi ay nabaoy.
Ruto, gingpurbahan sinra it GINO-O ag ingtaw-an it kasuguan. 26 Siling Nida sa inra, “Ako kag GINO-O nak inro Dios, kung kamo yang ay magpanimati it maado sa Ako gingsisiling sa inro, ag himuon kung ni-o kag tama sa Ako pagmuyat ag tumanon kag Ako mga kasuguan, ay indi Nako giparaya sa inro kag mga sakit tuyar sa Ako gingparaya sa mga Ehiptohanon, dahil Ako kag GINO-O nak inro manugbuyong.”
27 Pagkatapos it kina, kag masunor nak lugar nak inra ingsamputan ay Elim, kung hariin ay inggwa't doseng tuburan ag sitentang puno it palmera. Ruto sinra gikampo sa palibot it mga tuburan.