3
KAG KAYABAWAN NI HESUS KANG MOISES
Si Hesus kag Anak it Dios ag si Moises kag Suguon it Dios
1 Ngani, mga hali nako nak tinawag it Dios pramas magpasakop sa Ida ag magiging kaibahan Nida sa langit, aisipon ninro nak gador si Hesus. Dahil Sida kag sinugo it Dios bilang Pinaka-apostol ag Pinaka-mataas nak Saserdote nak dapat natong tuuhan. 2 Sida ay matutom sa pagtuman sa Dios nak imaw kag nagpili sa Ida, tuyar kang Moises nak matutom ra sa pagrumaya sa panimayay it Dios it kato.*3:2 Siguro kaling ingpapatungran nak “panimayay it Dios” ay kag mga Israelinhon nak it kato ay gingsugo si Moises it Dios nak apamunuan sinra paliwas sa Ehipto. 3 Pero tungor kang Hesus, kag Ida balor ay yabaw pa kisa kang Moises, kumo kag balor it nagpapatugrok it bayay ay mas yabaw pa kisa sa mismong bayay. 4 Ngani, kag tanang bayay ay inggwa't manugpatugrok, pero kag Dios ay imaw it manughuman it tanang butang.
5 Matuor, si Moises ay matutom sa ida pagserbisyo sa bug-os nak panimayay it Dios, pero sida ay tuyar yang sa usang suguon raha. Kali ay halimbawa yang sa ipahadag it Dios nak matatabo sa palaabutong panahon. 6 Pero si Kristo ay matutom ra sa Ida pagserbisyo, ugaling buko tuyar sa usang suguon yang kundi bilang Anak nak inggwa't karapatan sa poder it Ida Tatay nak Dios. Ag ngasing kita kinang ingsisiling nak panimayay it Dios kung mapadayon kita nak magpaninrugan sa ato pagtu-o ag ipagmarako kag ato ing-aasahan.
Kag Paandam nak Indi'g Talikuran kag Dios
7 Kada ngani kita ay dapat magpati sa gingsisiling it Ispirito Santo nak,
“Ngasing, kung narurungganey ninro kag gingbibisaya it Dios sa inro,
8 daey igpatugasa kag inro tagipusuon tuyar sa inghimo it inro mga ginikanan
it katong inra ingkuntra ag ingpurbahan kag Dios ruto sa disyerto.
9 Dahil aber sa suyor it kwarentang tuig nak
nakikitaey ninra kag katitingayang ginghuhuman it Dios para sa inra,
ay permi gihapon ninrang ingpupurbahan Sida.†3:9 Exo. 17:1-7.
10 Kada, nahangit kag Dios sa inra ag nagsiling,
‘Kag inro tagipusuon ay perming nagyayado sa Ako,
ag waya nak gador kamo gisusunor sa Ako mga bisaya.’
11 Kada, sa rako it kahangit it Dios sa inra, Sida ay nagsumpa nak,
‘Inding gador sinra makasuyor sa lugar kung riin ay maaaguman kag kapahuwayan
nak Ako ing-aman para sa inra.’ ”‡3:7-11 Sal. 95:7-11.
12 Kada, ako mga hali sa pagtu-o, magrahan kamo pramas waya it aber usa sa inro nak inggwa it kayainan sa inro tagipusuon ag indi magtu-o sa Dios, dahil imaw kina kag mapayado sa inro sa buhi nak Dios. 13 Kag inro dapat himuon sa bawat adlaw habang inggwa pa it nabibilin nak adlaw sa inro kabuhi, ay pakusugay ninro kag pagtu-o it usa'g-usa para waya sa inro it magtugas kag tagipusuon parayan sa pangluko it kasal-anan. 14 Dahil magiging kaibahan nato permi si Kristo kung mapadayon kita nak magpaninrugan sa ato pagtu-o sa Ida, tuyar sa ato naunang inghimo hastang sa katapusan. 15 Aisipon ray nato kag ingsiling it Dios it kato,
“Ngasing, kung marunggan ninro kag gingbibisaya it Dios,
aya gipatugasa kag inro tagipusuon tuyar sa inghimo it inro mga ginikanan
it katong inra ingkuntra Sida.Ӥ3:15 Sal. 95:7-8.
16 Ay sasin-o ngani katong mga ingpapatungran dili nak nakarungogey sa Dios pero nagkuntra gihapon sa Ida? Di baga sinra katong mga nagliniwas sa Ehipto sa irayom it pagpanguna ni Moises? 17 Ag kanin-o nahahangit kag Dios sa suyor it kwarentang tuig? Di baga sa inra nak nagpakasala ag namatay ruto sa disyerto? 18 Ag usa pa, sasin-o katong mga gingpaninrugan it Dios nak inding gador sinra makasuyor sa lugar kung riin ay maaaguman kag kapahuwayan nak Ida ing-aman para sa inra?*3:16-18a Sal. 95:7-11. Di baga sinra katong nagsuway sa Ida?†3:16-18b Bil. 14:1-35. 19 Ngani, ato nakikita nak sinra'y waya nakasuyor rutong lugar, dahil sa inra kawar-an it pagtu-o.