1 *1Ko 2:3Iau e Paulus, ngane a ngaru hateka mu gu longo iau. Iau a bakovi madoru, i manga e Kristo ia a bakovi madoru. I ranga ne mua ri pahaluhoi ta iau a mangenge ni ta puhaki mai mua na tahuna a made turane mua, pali na tahuna a made basi, a here a raukea, a ratapile mua na ngava. 2 *1Ko 4:21Pali a taki tora mua, mu pulo a vilone mua. Bara mu rata mavonga, na tahuna a bele lake i uka ma ga ta puhaki mai e huriki ri pahaluhoi ta a ramai a naro na malala.

3 I muholi, iau a bakovi. Pali i uka ma a vaubi na naro na malala. 4 *Epe 6:13-17A lebo a bole, i uka ma a lebo na vabinga na malala. A lebo a bole a lebo tora na Vure. I tahoka a nitora ni ratapile a niluhoi na malala, ra niluhoi e huriki a pile ri taga vona. I tahoka a nitora ni ratapile a nitamina ngava ri gege hita vona. 5 A ratapile a niluhoi tagege lobo i rata e huriki i uka ma ri luhoi torea a Vure. A nugutata a niluhoi gigi tora ne ria, ri gi longototo a ngavane Kristo. 6 Muri, na tahuna mu longototo pali a ngavane Kristo, bara vakamadihi e huriki ri tabana ni longotaro.

7 Mu luhoi kado kamumu a maki mu matai. E rei a viri i taki ia, ta ia a viri ne Kristo, ge matakilaka vona, iau tara a viri ne Kristo. 8 *2Ko 13:10Ma mu gu luhoi iau, ta a bibi rike mule hateka a ragu vona a nitora e Bakovi Dagi i habia nau, ga matakari mua. A nitora iea, i habia nau, i uka ma ga ratapile mua. I habia nau ga do rike mua. I mavonga, i uka ma a maruhu vona.

9 A here lakene mua, i uka ma ga vakamangenge mua. 10 E huriki ranga ri ta maea, “Na tahuna e Paulus i here, i ta puhaki hateka. Pali na tahuna i made turane hita, ia a malele piu, a ngavana i uka lehona.” 11 E huriki ri ta mavonga, a ngaru ri gi lohoka vona, i muholi, na tahuna a here lakene mua, a ta puhaki. Pali na tahuna a lakene, bara ta puhaki ne mua.

12 Pali a keri ni taki iau ga kamumu i manga e huriki a bakovi ranga iene. Ri ta paki paki hateka. Ri bibi rike mule a rane ria, ri taki ta ri kamumu hateka. Na tahuna ri pelekado mule ria, ri matai kunana e huriki e turane ria, ri rangi ria o i uka. Ri manga manga!

13 *Rom 12:3A Vure i habi nau a leho. I uka ma ga bibi rike mule iau vona tara maki i tabuli polovavo na leho a Vure i habia nau. Ga vivi vona kunana a maka maki pololilo na leho a Vure i habia nau. Mua mu tabuli pololilo na leho iea. 14 I mavonga, na tahuna a vara mua, i uka ma a page poloa a leho a Vure i habia nau. Iau kunana a viri a vara muga mua. Iau a viri a bele muga na tabeke ne mua, a vakalongo mua na Velenga Kamumu ne Kristo.

15 Iau i uka ma a bibi rike mule iau na leho na viri tara i ratea. A ngaru a niluhoi ne mua ne Kristo ge bele dagi, lakea a leho nau iene bara i bele dagi. 16 Muri bara lakea na maka tabeke mule lokovonga, ga vakalongo a Velenga Kamumu ne ria. A koi ni bibi rike tavula iau na leho na viri tara i ratea. 17 *Jer 9:24; 1Ko 1:31A hinere i ta maea, “A viri i ngaru ni bibi na maki tara, ge bibi vona a maki e Bakovi Dagi i rata.” 18 *1Ko 4:4A viri i bibi rike mule a rana, nahea. Pali a viri e Bakovi Dagi i bibi rikea, ia a viri a Vure i ngarua.