A Mugana Raukea e Paulus i Here Lakea ne Huriki a
Korin
A Nita Vakalohoka
E Paulus a apostolo i herea a raukea iea (1 Kor 1:1). E Paulus i kilala a rana na raukea iea (3:5-6; 16:21).
I here lakea ne huriki a tara ne Kristo o Korin na pida e 54-55 AD, na tahuna i made o Epesus. A bakovi ala tolu, e Stepanas, e Portunatus, e Akaikus, to bolea a raukea ne huriki a tara ne Kristo o Korin, to lakea o Epesus to habia ne Paulus. E Paulus i here mugea tara raukea ge koli a raukea ne ria.
A tanga e Korin i tabuli na tabeke mule puru ne Iurop, tabukoi na Dari na Kurukuruna Malala. A tabekena malala i tolu mule puru ra i lakea liu na dari, i tabuli vona a tanga i tolu. Mona ni gale e Gris, e Itali, e Spein. Na tahuna e Paulus i herea a raukea iea, a tabeke mule puru ne Gris ni gale e Akaia. A tabeke mule sike ni gale e Masedonia. Akaia, ra tabeke mule puru ne Gris, i manga a bodu. I uka ma i bola ra malala iea, i vano i lakea liu na tabeke mule sike. Na gagana malala nga varago i kamumu ne huriki ri gi hori a aga vona. E Korin a kurukuruna tanga ne huriki ri valai ri vahabi a maki vona. E Korin a tanga i tahoka a rana. I tahoka a murina ni vahabi a maki i dagi, a maka roho ni kona a maki ri pesi haluia, na tabeke tara a murina ni pelekado a ngava. I tahoka a roho na moni, a murina ni ninu, ni malo. I kupo a maka murina ni kavurike a hanuna vure taminga. I tahoka a roho dagi ne vona ni rata a maka rihiva legelege. E huriki a Korin ri bibi rike ria vona maka ruma kamumu ri tahoka.
I kupo e huriki a Korin ri kavurike a hanuna vure taminga.
Ne Apostolo 18:1-8, e Lukas i ta vona e Paulus i vakatubu navai a leho, i vakatubu a tara ne Kristo o Korin.
Na raukea iea, e Paulus ta ge koli a maka ninana ne ria, pali i luhoi tabu a maka maregoa i bele ne ria. I luhoi ni ta vona taro a maka maregoa nga.
1
A Nita Muga
Iau e Paulus. Na ningaru na Vure, i gale iau, ge iau a apostolo ne Isu Kristo. Maria e Sostenes, a turane hita, miri herea a raukea iea.
Miri here lakene mua e huriki a tara ne Kristo o Korin. E Isu Kristo i ru here here mua, ge mua ne vona a Vure kunana. I gale mua, ge mua e huriki a tara vona, turana e huriki na tanga lobo ri kavurikea a Bakovi Dagi, e Isu Kristo. Ia a Bakovi Dagi ne ria, a Bakovi Dagi ne hita.
A Vure, e Tamane hita, rua e Isu Kristo, a Bakovi Dagi ne hita, ru gu rata kamumu mua, ru gu habi a nivalemu ne mua.
E Paulus i Kavurikea a Vure
A luhoi mua na parava vakaroro, a kavurike a Vure vona a naro i rata kamumu mua vona a vuhuna mu rihi e Isu Kristo. I rata kamumu mua, i hatebalala, i vakabagetu mua na maki lobo, na lohokanga dagi, na naro ni ta kamumu. Ra i maea, i vakasiri i muholi a ngava ne Kristo a vakalongo mua vona. Ngane mu davea a Bakovi Dagi ne hita, e Isu Kristo, ge hamule valai, i uka ma mu bala vona tara bagetua na Vure. * 1Tes 3:13; 5:23Ge tuhori mua, ge vano ge harena na nilobona parava, mu gu malamala na tahuna a Bakovi Dagi ne hita, e Isu Kristo ge hamule valai. * 1Tes 5:24; 1Ion 1:3A Vure i rata a maki lobo i taki ge rata. I gale mua mu gu rihi e Tuna, re Bakovi Dagi ne hita, e Isu Kristo.
A Lotu o Korin i Tahoka a Maregoa
10  * Pili 2:2Mua e huriki a turagu, a taki tora mua na rane Isu Kristo, a Bakovi Dagi ne hita, a ta maea, “Mu hate taku. Naha ni vapida lae, naha ni vakabele a tara ge kupo. Mu pesi palupu na niluhoi i taku, na ngava i taku.” 11 Mua e huriki a turagu, a kabu ne Kloe ri vakalongo iau vona mu vahehe. 12  * Apo 18:24-28; 1Ko 3:4Ri taki ta i ranga ne mua mu ta maea, “Iau a muri ne Paulus.” I ranga mu ta maea, “Iau a muri ne Apolos.” I ranga mu ta maea, “Iau a muri ne Sipas.” I ranga mu ta maea, “Iau a muri ne Kristo.” 13 Re Kristo, ni vaveru na maka tabekena? Ra iau, e Paulus, a mate na kai tavalavala na murine mua? Ni vahilolo mua na ragu? 14  * Apo 18:8; Rom 16:23A kavurikea a Vure vona iau i uka ma a vahiloloa tara viri ne mua. A vahilolo kunana e Krispus, e Gaius, 15 ma mu gu taki ta ni vahilolo mua na ragu. 16  * 1Ko 16:15A kabu ne Stepanas, ria ranga a vahilolo ria. Pali a luhoi i uka tabu tara viri ga vahiloloa. 17 E Kristo i rudu iau, i uka ma ga vahilolo e huriki. I rudu iau ga vara e huriki na Velenga Kamumu. I uka ma i ngaru ga voko e huriki na ngava na lohokanga dagi na malala. Ma ga rata mavonga, ge uka a nitora a kai tavalavala ne Kristo.
E Kristo a Vuhuna Lohokanga
18  * Rom 1:16Ne huriki ri laho na dala na matenga, a nitovo na kai tavalavala i manga a ngava tavula. Pali ne hita, e huriki a Vure i korimule hita, a nitovo na kai tavalavala, ia a nitora na Vure. 19  * Ais 29:14A hinere hosi i ta maea,
“Ga ratapile a lohokanga ne huriki a bakovi na lohokanga.
Ga vakavaroru a niluhoi ne huriki ri luhoi ta ri lohoka hateka.”
20  * Jop 12:17; Ais 19:12; 33:18; 44:25I mavonga, a vai e huriki a bakovi na lohokanga? A vai e huriki a mari na vinara? A vai e huriki ri moro hateka na nita? A Vure i vakasiri kavakava, a lohokanga na malala i manga manga. 21  * Mat 11:25A Vure i tahoka a niluhoi kamumu hateka. I rata maea, e huriki i uka ma ri gi lohoka na Vure na tahuna ri ramai a lohokanga na malala. Pali i vivi ni korimule e huriki ri luhoi torea a ngava ni vara ria vona, ra ngava e huriki ri luhoi ta a ngava tavula. 22 E huriki a Iuda ri ngaru ni matai a nivakasiri. E huriki a Grik ri ngaru a lohokanga legelege. 23  * Rom 9:32; 1Ko 2:14Pali a ngava mi vara e huriki vona, mi taki ria ne Kristo ni paditata na kai tavalavala. A ngava iea i rata e huriki a Iuda ri boru, pali e huriki a Grik ri luhoi ta a ngava manga manga. 24  * Kol 2:3Pali e huriki a Iuda, e huriki a Grik a Vure i gale ria, ri masia e Kristo ia a nitora, a lohokanga na Vure. 25  * 2Ko 13:4A niluhoi na Vure si luhoi ta i manga, i moro hateka na niluhoi moro moro ne huriki a bakovi. E huriki na malala ri luhoi ta a Vure i uka nitora vona. Pali a nitora na Vure i rangi a nitora lobo ne huriki a bakovi hateka.
26  * Mat 11:25; Iak 2:5Mua e huriki a turagu, mu luhoi mule a tahuna a Vure i gale mua. I kupo ne mua i uka ma mu tahoka a lohokanga na matane huriki na malala. I kupo ne mua i uka rane mua. I kupo ne mua i uka ma mu valai na kabu na hariki. 27 Pali a Vure i vulaki e huriki ri manga na matane huriki na malala, ge vakamaruhu e huriki na malala ri luhoi ta ri tahoka a lohokanga dagi. I vulaki e huriki a bakovi tavula na matane huriki na malala, ge vakamaruhu e huriki a bakovi dagi na malala. 28 A Vure i vulaki e huriki a matasia, re huriki na malala ri biu ria. I vulaki e huriki a bakovi tavula na matane huriki na malala, ge ratapile e huriki na malala ri luhoi ta ri dagi hateka. 29  * Epe 2:9A Vure i rata mavonga, ge i uka tara viri ge bibi rike mule a rana na matana Vure. 30  * Jer 23:5-6Ia kunana a Viri i rata mua mu rihi e Isu Kristo. Na naro iea, e Kristo i habi a niluhoi kamumu lobo ne hita. Na limane Kristo kunana, a Vure i konamule hita, i rata hita si malamala, i kali here here hita, ge hita ne vona kunana. 31  * Jer 9:24I mavonga, i uka ma si gi bibi rike mule a rane hita. Ni here hosi, i maea, “A viri i ngaru ni bibi, ge bibi rike kunanea a Bakovi Dagi.”

*1:8: 1Tes 3:13; 5:23

*1:9: 1Tes 5:24; 1Ion 1:3

*1:10: Pili 2:2

*1:12: Apo 18:24-28; 1Ko 3:4

*1:14: Apo 18:8; Rom 16:23

*1:16: 1Ko 16:15

*1:18: Rom 1:16

*1:19: Ais 29:14

*1:20: Jop 12:17; Ais 19:12; 33:18; 44:25

*1:21: Mat 11:25

*1:23: Rom 9:32; 1Ko 2:14

*1:24: Kol 2:3

*1:25: 2Ko 13:4

*1:26: Mat 11:25; Iak 2:5

*1:29: Epe 2:9

*1:30: Jer 23:5-6

*1:31: Jer 9:24