A Mugana Raukea i Herea e
Ioanes
A Nita Vakalohoka na Raukea i Tolu ne Ioanes
A viri i here ra raukea nga i uka ma i kilalea a rana. Pali i tahoka ranga maki i vakasiri maea e Ioanes a murimuri ne Isu, ra viri i here. I tahoka ranga ngava i palupu turana ngava i tabuli na Velenga Kamumu i herea e Ioanes, i vakasiri maea ra buk nga lobo i here a bakovi ala taku, re Ioanes. Ne 1 Ioanes 1:1-3 a viri i here i taki ia i turana e Isu na tahuna e Isu i vara koea na malala. Ne 2 Ioanes, e 3 Ioanes i taki ia a gare. A maka maki i here na raukea iea i vakasiri manga ia a gare, a gare ne huriki a tara ne Kristo.
I mata manga e Ioanes i here ra raukea nga na pida e 90 AD, a pida i 60 muri ne Isu i mate, i mahuri mule.
Na parava iea a maka tara ne Kristo ri bele kupo na maka tanga, lakea e huriki ala kupo ri laho tala, ri tovo ria. Pali ranga ne ria ri pulo a nitovo na Velenga Kamumu, ri ru dili ranga niluhoi ne ria. Re huriki a mari nitovo taminga nga ri rata e huriki, ri koi ni ramai a nitovo ne Ioanes. Ngane e Ioanes i here ni vakatora a tara ne Kristo, nahea ri gi loho rua vona a nita muholi na velenga kamumu i tovo ria vona. Na tahuna e Ioanes i gare, i made o Epesus, na tabeke na nirolona haro na hini mona ni gale e Teki. E Ioanes kikeri ra murimuri ne Isu i tabana ni mahuri, ra i maea e huriki a tara ne Kristo na tabeke iea ri mata rike vona, ri ramai a nitovo vona. I here ra raukea nga lakea na maka tara ne Kristo i matakari ria.
A ngava dagi na raukea nga i rua. A nita muholi turana naro na nivangaru.
A nita muholi i maea, o lohoka kamumu na Vure ia e rei, e Isu ia e rei, na maki a Vure i ratea ne hita na limana e Kristo. “Mia mi tahoka ra niluhoi iea, a vuhuna a Vure i vakasiria ne mia.” E Ioanes i ta maea, lakea ra niluhoi iea ge muga e huriki a tara ne Kristo lobo. Nahea ri gi loho vagori lae.
A nivangaru, e Ioanes i ratea ra ngava iea, ge vakasiri e huriki na ningaru na Vure ne hita, a ningaru ne hita lakea na Vure, lakea ne turane hita. I ta hateka maea, a vuhuna i ngaru e huriki ri luhoi torea e Kristo ri gi vangaru, manga a Vure i ngaru e huriki lobo.
1
A Nita Mahuri i Bele Kavakava
1 *Ion 1:1A Nita Mahuri i made hosi, muga na maka maki ni ratarike. Mi longoa a nitana, mi masia na matane mia. I muholi mi masia, mi padoi ia na limane mia. 2 *Ion 1:14A Nimahuri iea i bele kavakava, mi masia. Mi vakalongo mua vona a Nimahuri Vakaroro iea, ra i made muga turana e Tamana, muri i bele kavakava ne mia. 3 A maki lobo mi matai, a maki lobo mi longo, ngane mi taki tala ne mua, lakea mua ranga mu gu rihi mia. I muholi, si rihi e Tamana turana e Tuna, re Isu Kristo. 4 *Ion 16:24A herea a raukea iea, a nivivi ne mia ge bele dagi.
Si Gi Laho na Nipara na Vure
5 *1Tim 6:16; Iak 1:17A ngava mi longo vona, ngane mi vakalongo mua vona i maea: A Vure a Nipara. I uka ranga hini ge uvo ge tabuli vona. 6 *1Ion 2:4E rei a viri i taki ta i rihi a Vure, pali i laho na uvo, i uka ma i ta muholi. Ia a bakovi na taminga. 7 A Vure i made na hini palala. I mavonga, na tahuna si laho na hini palala, si varihi, a darane Tuna, e Isu, i vahilolo hita na naro hale lobo ne hita. 8 *Sng 32:5; Snd 28:13Pali a viri i taki ta i uka naro hale, i uka ma i ta muholi. I tami mulea. 9 Pali na tahuna si taki tala na Vure a naro hale ne hita, a Vure bara i ramai a ngava muholi i taki pali, bara i ramai a naro kiripiripi vona, i puga vuroki a naro hale ne hita, i vahilolo hita, si malamala na matana. 10 Pali a viri i taki ta i uka naro hale ge rata, ngane i takia a Vure, ta ia a bakovi na taminga. A bakovi maea i marikoi a nitana Vure.