2
A Hanu Kiripiripi i Puru Valai
* Levi 23:15-21; Vin 16:9-11A habu na Pentekos i bele, lakea e huriki ri luhoi torea e Isu ri vapopo na ruma tara. Ri longo vakaturutu a nangina maki i nangi manga a vilu dagi i valai na hunu, i ngalu dili na ruma ri vapopo vona. * Mat 3:11Ri matai a maka maki i manga a tabelena kanono, ri vakalipida, i tabuli langa na gine ria takutaku. * Mrk 16:17; Apo 4:31; 10:44-46; 19:6A Hanu Kiripiripi i dili ne ria lobo, lakea i rata ria ri vakatubu ni ta na maka nita ne huriki basi.
Na tahuna iea e huriki a Iuda na tanga lobo na malala ri valai, ri made o Ierusalem. Na tahuna ri longoa a maki iea, ri maguru valai. Ri turutu a vuhuna ri longo na tabelene ria takutaku a ngava i taki e huriki nga. Ri ngapa, ri vanana, “Re huriki nga, a bakovi o Galili. Pali i navai ri ta, si longokilala na nita ne hita takutaku a ngava ri taki? I uka ma si valai na tanga i taku kunana. Si valai o Partia, o Midia, o Elam, o Mesapotamia, o Iudea, o Kapadosia, o Pontus, o Asia, 10 o Prigia, o Pampilia, o Egipto, na tabeke ne Libia ra tabeke i matakaria e huriki na tanga e Sirene. I ranga ri valai o Rom. 11 E huriki ranga a Iuda. E huriki ranga i uka ma ria a Iuda, pali ngane ri ramai a vinara ne huriki a Iuda. E huriki ranga ri valai na robo e Krit, e Arabia. Pali hita lobo si longo ria na nitane hita takutaku, ri vakalongo a maka maki dagi hateka a Vure i rata!” 12 Ri turutu, ri luhoi viliha lae, ri vanana, “A ra pelegona maki iea?”
13 Pali e huriki ranga ri padikede ria, ri ta maea, “Ri ninu hateka a vain karaba, ri manga.”
E Petrus i Vara e Huriki
14 Pali e Petrus, i pesi turane huriki a apostolo ala ravulu a polona i taku, i gale tala, i ta maea, “Mua o huriki a bakovi o Iudea, turane huriki mu made koea o Ierusalem, mu longo kamumu a ngava ga taki. 15 Mu luhoi ta mi ninu. I uka ma mi ninu. Ngane a kilala i polova na hatelanga kunana. 16 A maki mu matai, a maki e Jol a propet* Jol a propet tara hosi. I here puru hosi a ngava nga na Ngava Dagi Hosi. O masia na bitona buk a ngava e ‘propet.’ i taki hosi, i ta maea,
17 ‘A Vure i ta maea, na nilobona parava
ga habi ne huriki lobo a Hanugu.
E huriki e tune mua a bakovi a ngatavine bara ri ta propet.
E huriki a riau bara ri matai a maki na vurene ria.
E huriki a gare bara ri vurena.
18 E huriki a vora bakovi a vora ngatavine nau,
ria ranga ga habi ne ria a Hanugu,
bara ri ta propet.
19 Ga rata a maki ni turutu vona meli na hunu,
ga rata a nivakasiri koea na malala:
a dara, a kanono, a pokona kanono.
20 A haro bara i paravunu,
a keva bara i para vururu, manga a dara
muga na parava ne Bakovi Dagi ge valai.
A parava iea i dagi hateka.
21 Lakea a Vure bara i korimule
e huriki ri gale lakea ne Bakovi Dagi.’
22 “Mua o huriki a bakovi o Israel, mu longo valai. E Isu o Nasaret, a Vure i rata na limana a maka nivakasiri dagi i kupo na matane mua, i vakasiri mua ne Isu i uka ma i tatami. Mu lohoka vona. 23 Re Isu, ni habi na limane mua, a Vure i lohoka vona muga, i ramai a ningaru vona. Mu paditatea na kai tavalavala na limane huriki a bakovi hale, i mate. 24 A Vure i vakamahuria na matenga, i vakatavagea na nimadihi na matenga, a vuhuna a matenga i keri ni nugutatea, 25  * Sng 16:8-11a vuhuna hosi e Davit i ta propet vona, i ta maea,
‘A matai vakaroroa e Bakovi Dagi i laho turagu,
a vuhuna i pesi na kanegu,
i uka tara viri ge vakamangenge iau.
26 I mavonga a hategu i vivi, a tabelegu i ratea a ngava nivivi.
Iau a pasimata ne vomu a Vure nau,
27 a vuhuna i uka ma go lohopile iau, ga tabuli na kanono.
I uka ma go mata taroa a Viri Malamala vomu, ge mavuru.
28 O vakasiria nau pali a dala na nimahuri.
Ga vivi hateka, a vuhuna o made turagu vakaroro.’
29  * 1Ki 2:10“Mua o huriki a turagu, a taki muholi mua, a gare ne hita e Davit i mate, ni tanu. A lovona i tabuli koea mona. 30-31  * 2Sam 7:12; Sng 16:10; 89:3-4; 132:11E Davit i lohoka vona a ngava a Vure i ta muholi vona na viri tara, a hamona, bara i made na gula hariki vona. E Davit ia a propet, i matai muga a maki ta ge valai, lakea i rata a nita propet ne Kristo ge mahuri mule na matenga, i uka ma ge mate liu, a podana i uka ma ge mavuru.
32 “Re Isu, a Vure i vakamahuri mulea na matenga. Mia lobo mi masia. 33  * Apo 5:32; 7:55-56A Vure i bole rikea a rane Isu, i vakamadea na limana a kanena. E Tamana i habia vona pali a Hanu Kiripiripi i manga a hini i ta muholi muga ge ratea. Ngane i rudua i valai ne mia, i vakabele a maki mu matai mu longo ngane. 34  * Sng 110:1Re Davit, i uka ma ia ra viri i sike na hunu. Pali i ta muga, i ta maea,
‘E Bakovi Dagi i takia e Bakovi Dagi nau:
“O made na limagu a kanegu,
35 ge harena na tahuna ga ratapile
e huriki a pile vomu.” ’
36  * Apo 5:30-31“Ngane a ngaru mu gu lohoka vona, mua e huriki a Israel. A Vure i ratea e Isu, ge ia a Bakovi Dagi, ge ia e Kristo, re Isu mu paditatea na kai tavalavala.”
37 Na tahuna e huriki ri longoa a ngavane Petrus, i padi a hatene ria, lakea ri nana e Petrus turana e huriki a apostolo ranga, ri ta maea, “Mua o huriki a turane mia, a ra mi gi ratea ngane?”
38 E Petrus i koli, i ta maea, “Mua lobo, mu pulo a vilone mua, ni gi vahilolo na rane Kristo, lakea a Vure bara i puga vuroki a naro hale ne mua. Muri bara i habi ne mua a Hanu Kiripiripi. 39  * Ais 57:19Hosi a Vure i ta muholi vona ge habi a Hanu Kiripiripi ne mua, e huriki a hamone mua, turane huriki ri made basi, re huriki a Bakovi Dagi, a Vure ne hita bara i gale ria ri gi valai vona.”
40 E Petrus i taki tabu ranga ngava, i vakalongo ria ne Kristo. I taki tora ria, i ta maea, “Mu korimule mua, mu lele rau vona a rongova na Vure, ge pelekado e huriki a bakovi hale na tahuna mona.” 41  * Apo 2:47; 4:4E huriki ala kupo ri ngarua a nitane Petrus, lakea ni vahilolo. Na parava iea kunana e huriki ala 3,000 ri dili turane ria.
E Huriki a Tara ne Kristo Ri Vaveru a Maki
42  * Apo 20:7Na parava lobo e huriki a tara ne Kristo ri vapopo, ri habi a hatene ria ni vasileki, ni kani palupu, ni longo a nitovo ne huriki a apostolo. 43 A Vure i rata a nivakasiri i kupo na limane huriki a apostolo, i rata e huriki ri togoa a Vure. 44  * Apo 4:32-35E huriki a bakovi a ngatavine ri ramai e Isu ri made palupu, ri vaveru a maki lobo ne ria. 45 Ri habi a maka mahala ne ria ni kona. E rei a viri ne ria i bala a moni, ri habi vona a moni i ngarua. 46 Na parava lobo ri vapopo na roho na Vure, ri kani palupu na ruma ne ria. Ri vivi na maki ni kani a Vure i habi ne ria, ri vaveru. 47  * Apo 6:7; 11:21Ri kavurikea a Vure. E huriki a bakovi a ngatavine polovavo ri ngaru ria. Na parava lobo e Bakovi Dagi i korimule tabu e huriki a bakovi a ngatavine ranga. Lakea ri dili turana e huriki na tara na Vure.

*2:1: Levi 23:15-21; Vin 16:9-11

*2:3: Mat 3:11

*2:4: Mrk 16:17; Apo 4:31; 10:44-46; 19:6

*2:16: Jol a propet tara hosi. I here puru hosi a ngava nga na Ngava Dagi Hosi. O masia na bitona buk a ngava e ‘propet.’

*2:25: Sng 16:8-11

*2:29: 1Ki 2:10

*2:30-31: 2Sam 7:12; Sng 16:10; 89:3-4; 132:11

*2:33: Apo 5:32; 7:55-56

*2:34: Sng 110:1

*2:36: Apo 5:30-31

*2:39: Ais 57:19

*2:41: Apo 2:47; 4:4

*2:42: Apo 20:7

*2:44: Apo 4:32-35

*2:47: Apo 6:7; 11:21