6
Mu Vatuhori
* Mat 18:15Mua e huriki a turagu, na tahuna mu masia tara viri ne mua ge rata a naro hale, a ngaru e huriki ri kinigao na Hanu Kiripiripi ri gi lakea madoru vona, ri gi bole mulea. Pali ri gi matadoko, ma ni gi toni ria. * Rom 15:1Mu vatuhori ni kaloho a nimava. Na naro iea kunana bara mu ramai a vinara ne Kristo. Mu luhoi a ngava nga: e rei a viri i pahaluhoi ta ia a bakovi dagi, pali ia a bakovi tavula, a bakovi iea i tami mule ia. Pali a ngaru mua takutaku mu gu pelekado a narone mua. Na naro iea bara mu vivi na leho ne mua takutaku, i uka ma mu gu loho lege na narone turamu, * Rom 14:12a vuhuna hita takutaku bara si bole a mapana narone hita.
* 1Ko 9:11,14Si gi habi a maki kamumu ne huriki ri tovo hita na nitana Vure. * Rom 8:13Naha ni tami mule mua. I uka tara viri ge tamia a Vure. A ra maki o varo na hania, ra maki ngi kunana bara o mirio. E huriki ri muri mai a ningaru hale na kakaine ria, bara ri vakabele a matenga. Pali e huriki ri ramai a ningaru na Hanu Kiripiripi, a Hanu Kiripiripi bara i habi ne ria a nimahuri vakaroro. Nahea ge malulu a tuhane hita ni rata a maka naro kamumu, a vuhuna bara si kinigao, bara si bole a mapane hita. 10 I mavonga, si gi rata kamumu e huriki lobo na tahuna si tahoka a gisi kamumu. Pali a maki dagi hateka, si gi tuhori e huriki ri luhoi torea a Vure.
E Paulus i Tarulu Puru e Huriki
11 Mu matai a hinere nau, a here na limagu, i dagi hateka. 12 Re huriki nga, ri ngaru ni tugu mua ni gi pala a kuline mua, a vuhuna ri ngaru e huriki a Iuda ranga ri gi vivi ne ria. Ri koi ni muri mai a ngava na kai tavalavala ne Kristo, a vuhuna ri koi e huriki ri gi vakamadihi ria. 13 Re huriki ni pala a kuline ria, i uka ma ri ramai a maka vinara lobo. Ri ngaru ni pala a kuline mua ri gi bibi rike mule a rane ria. 14 Pali iau i uka ma ga bibi rike mule a ragu. A maki a bibi rikea, a rane Isu Kristo a Bakovi Dagi ne hita, a vuhuna i mate na kai tavalavala. I rata mavonga, ngane i manga iau a mate, a vilo hale na malala i uka ma i matakari tabu iau. 15  * 2Ko 5:17; Gal 5:6Re huriki, ni pala a kuline ria, o i uka, a maki tavula. A maki i dagi hateka, ni bole a nimahuri karaba. 16 E huriki lobo ri muri mai a ngava iea, a Vure ge habi a nivalemu ne ria, ge dodo ria. E huriki nga, ria e huriki a Israel muholi na Vure.
17  * 2Ko 4:10I vakatubu ngane, nahea tara viri ge vakamarego iau, a vuhuna a harena lebo i tabuli na kuligu, a vuhuna a luhoi torea e Isu.
18 Mua e huriki a turagu, a Bakovi Dagi ne hita, e Isu Kristo ge rata kamumu a hanune mua. I muholi.

*6:1: Mat 18:15

*6:2: Rom 15:1

*6:5: Rom 14:12

*6:6: 1Ko 9:11,14

*6:7: Rom 8:13

*6:15: 2Ko 5:17; Gal 5:6

*6:17: 2Ko 4:10