23
E Sara i Mate
E Sara i tahoka a pida i 127, muri i mate na tanga e Kiriat-Araba, a rana tara e Hebron na robo e Kenan. Lakea e Abraham i dodo hatekea, i taringia.
Muri e Abraham i pesi rike na dahana podane girihina, i taki e huriki a kabu ne Hiti, i ta maea, * Apo 7:16; Hib 11:9,13 “Iau a mosi a made koea. Mu habi nau ranga malala ga kona, ga tanu e girihigu vona.”
Lakea e huriki a kabu ne Hiti ri koli mule, ri ta maea, “Bakovi dagi, o longo valai, ioe a kakaina tanga. O tanua e girihimu na tabeke o ngaru ni tanua vona. Mia takutaku, i uka ma mi gi vakatoku ioe vona a tabeke go tanu e girihimu vona.”
Lakea e Abraham i pesi rike i lolu puru mai e huriki a tahona malala, i kavurike ria, i ta maea, “Mua bara mu longo ga tanua koea e girihigu, pali a ngaru mua mu gu nanea e Epron e tune Sohar vona ra babe ni gale e Makpela, ra na harena malala vona. Mu takia ge habia nau ga kona talea vona, ga tanua vona e girihigu turane huriki ri gi mate muri ma.”
10 E Epron i made vonga turana e huriki a kabu vona a Hiti, lakea i takia e Abraham na matane huriki ri made vonga na poridala na tanga dagi, i ta maea, 11 “Bakovi dagi, i uka ma ge mavonga. O longo valai. Ga habia vomu a malala. A babe tara, i vona ra malala iea. A habi vomu na matane huriki a viri nau. O vano o tanua e girihimu.”
12 E Abraham i lolu puru mai e huriki a tahona malala i kavurike ria, 13 i takia e Epron na matane ria lobo, “O longo valai, ioe o ngaru, ga konea a malala iea. O longo mai iau, ga tanua vonga e girihigu.”
14 E Epron i koli mulea e Abraham i ta maea, 15 “Bakovi dagi, o longo valai, a mapana malala i 50 kilo silva. A maki tavula ne tarua. O vano o tanu kunanea e girihimu.”
16 E Abraham i longo maia a nita ne Epron, ra i takia na matana e huriki a kabu vona, lakea i habi vona a 50 kilo silva, i muri mai a mapana maki ni vangoli ni vahabi a maki na tahuna iea.
17 I mavonga, a robo ne Epron, o Makpela, i tabukoi o Mamare, turana a malala, a babe, a maka kai pololilo vona i bole lobo. 18 E huriki a kabu ne Hiti ri bele vona na tahuna iea ri lohoka vona a malala iea, ne vona e Abraham ngane. 19 Muri e Abraham i rua a podane girihina, e Sara, pololilo na babe na malala e Makpela, tabukoi o Mamare, re Hebron, na robo e Kenan. 20 Ra malala turana babe, a kabu ne Hiti i habia ne Abraham ge tanu a viri vona.

*23:4: Apo 7:16; Hib 11:9,13