35
E Iakop i Hamule Lakea o Betel
* Vuh 28:11-17Muri a Vure i takia e Iakop, “O sike o Betel, o made vona, o kisia a dede-kedo nau na tabeke a bele vomu na tahuna o ha ne turamu e Esau.”
Lakea e Iakop i taki e huriki a kabu vona, i ranga e huriki ri turana, i ta maea, “Mu vuroki a maka vure taminga mu tahoka, mu kurudu pasi mua, mu rodo a varakia karaba. Mu valai, si gi lakea o Betel, ga haea vonga a dede-kedo na Vure, a vuhuna i kori iau na tahuna na vuranga, i laho turagu na maka robo a lakea vona.”
Lakea ri habi ne Iakop a maka vure taminga ne ria, turana a maka pato na talingane ria, i tanu ria na taruna kai a ok tabukoi o Sekem. Muri ri vano, lakea a Vure i rata e huriki a bakovi na maka tanga dagi tabukoi vonga ri mangenge, i uka ma ri valili ria.
E Iakop turane huriki a tara vona, ri bele o Lus, re Betel na robo ne huriki a Kenan. I kisia vonga a dede-kedo, i galea a hini ngi “A Vure ne Betel”, a vuhuna a Vure i bele vona vonga na tahuna i ha ne tukana. E Debora, a vora ngatavine ne Rebeka i mate vonga, lakea i tanua na taruna kai a ok na tabeke mule puru ne Betel. Ni gale liu a kai iea “A Kai ni Tangi.”
Muri ne Iakop i pe e Padan-Aram, a Vure i bele tabu vona i gamaia. 10  * Vuh 32:28Lakea a Vure i takia, “A ramu e Iakop, pali ngane i uka ma ni gi gale tabu ge Iakop, ni gi gale e Israel.”
Lakea i vunua e Israel.
11  * Vuh 17:4-8Muri a Vure i takia, i ta maea, “Iau a Vure Tuhaka, o vakabele e huriki a hamomu, ri gi vakavonu a malala. Ge ioe a vuhuna e huriki a kabu lobo. E huriki a hamomu ranga, ge ria a hariki. 12 Ra robo a habia ne Abraham rua e Isak, ngane a habia vomu. Muri ga habia ne huriki a hamomu.”
13 Muri a Vure i pea e Iakop na hini i ta turana vona, i sike.
14  * Vuh 28:18-19E Iakop i rua a kedo ga kilakila ni gi vakasiri a tabeke i ta turana Vure vona. Lakea i guru langa na kedo a naruna vain, a naruna oliv, ge vakasiri a nihabi vona na Vure. 15 E Iakop i vunua a tabeke i ta turana Vure vona a “Roho na Vure”.* A Roho na Vure, na nita Hibru e ‘Beth-El.’
E Resel e Isak Ru Mate
16 E Iakop turane huriki a tara vona ri pea e Betel, ri lakea na tanga dagi e Eprata. Ri tabukoi ni bele vonga, i pahea a koma i keri ni poda e Resel. 17 Na tahuna i hataki a nimadihi na nipoda, a ngatavine bolekori i takia, “Naha ni mangenge, bara o poda tabua a koma bakovi.”
18 Na tahuna e Resel i popote ge mate i vunua e tuna bakovi e Ben-Oni. ‘Benomi’ na nita Hibru e ‘tuna na nimadihi.’ Muri e tamana i vunu herea e Bensamin. ‘Bensamin’ na nita Hibru e ‘tuna na nitora nau.’ 19 E Resel i mate, ni tanu na dala lakea o Eprata, ngane ni gale e Betlehem. 20 E Iakop i rua a kilakilana polomeli na lovona. I mona a kilakilana i vakasiria a lovo ne Resel.
21 E Israel i laho lokovonga, i polotaroa a tanga e Eder, i haea a kape vona. 22  * Vuh 49:4Na tahuna e Israel i made vona a robo iea, lakea e Reuben i mahita turana e Bila, a ngatavine i parangi tabu vona e tamana. Lakea i vano a nita i bele ne Iakop vona ra naro hale i ratea e Reuben.
E Iakop i tahoka e tuna a bakovi ala ravulu a polona i rua. 23 E huriki e tune Lea a bakovi, a rane ria ra nga: e Reuben, a tabua ne Iakop, e Simion, e Levi, e Iuda, e Isikar, e Sebulun.
24 E tune Resel a bakovi a rane rua ra nga: e Iosep e Bensamin.
25 E tune Bila, a vorakato ne Resel, a bakovi a rane rua ra nga: e Dan e Naptali.
26 E tune Silpa, a vorakato ne Lea, a bakovi a rane rua ra nga: e Gad e Aser.
Re huriki a bakovi nga, e tune Iakop ni poda o Padan-Aram.
27  * Vuh 13:18E Iakop i bele taho e tamana na tanga e Mamare, i tabukoi na tanga dagi e Kiriat-Araba, re Hebron. E Abraham e Isak ru made vonga hosi. 28 E Isak i tahoka a pida i 180, 29 i gare liu, muri i mate. I vano i made turane huriki a viri vona ri mate pali. Muri e Esau rua e Iakop ru tanua.

*35:1: Vuh 28:11-17

*35:10: Vuh 32:28

*35:11: Vuh 17:4-8

*35:14: Vuh 28:18-19

*35:15: A Roho na Vure, na nita Hibru e ‘Beth-El.’

35:18: ‘Benomi’ na nita Hibru e ‘tuna na nimadihi.’

35:18: ‘Bensamin’ na nita Hibru e ‘tuna na nitora nau.’

*35:22: Vuh 49:4

*35:27: Vuh 13:18