49
E Iakop i Gamai e Tuna Mai
Muri e Iakop i gale palupu e huriki e tuna, i ta maea, “Mu valai ga taki mua vona a maki bara i bele ne mua muri ma.
“Mua o huriki e tune Iakop, iau e Israel e tamane mua, a ngaru mua mu gu vapopo,
mu gu longo a ngava ga taki mua vona:
“O Reuben, ioe a tabua nau.
A vakabele ioe na tahuna a riau, a tuhaka vona.
O tero o gao hateka ne huriki e tugu.
Pali ioe a raha. Ngane i uka ma go muga tabu,
a vuhuna o mahita turane girihigu tara,
o rata halea a kiri nau i katoki.
“O Simion o Levi muru kinana taku,
a bainat a lebo marua.
Iau i uka ma ga ta turane marua kapiloho.
Iau i uka ma ga made turane marua na vaponga,
a vuhuna na tahuna muru tahate, muru rabalaki a bakovi.
A bulmakau ranga muru ubiputu a vahane ria i manga a rihiva marua.
Ngane a ruduraha marua,
a vuhuna muru hini hatena.
E huriki a hamone marua bara ri made viliha turana a kabu ne Israel.
“O Iuda, e huriki a turamu bara ri kavurike rike a ramu.
Ioe bara o hori a lohone huriki a pile vomu.
E huriki a turamu bara ri lolu puru na matamu.
* Vuh 35:22; Gi 24:9; Kap 5:5O Iuda, ioe o manga a tuna laion,
i lakavu a kania, i hamule na murina,
i mahita i po a kanimatana.
I uka a viri ge kinikoi ia.
10 A kodo-hariki i tabuli na limamu,
bara o matakari vakaroro,
i harena na tahuna o bele na tanga e Silo,
o matakari e huriki ala kupo.
11 A Vuhuna Iuda, a maka kaina vain vona i kupo.
Bara o kolo tata a donki vomu na rahana,
o loi a varakia vomu na naruna.
12 A Vuhuna Bara o ninu hateka a vain, i vururu a matamu,
o ninu hateka a namona ruru, a ngimu bara i kea manga a ruruna bulmakau.
13 A Vuhuna “E Sebulun, bara i made tabukoi na dari,
a roa vona, bara i tahoka a bala kamumu na girimo ge pasi vona,
a robo vona bara i harena o Sidon.
14 A Vuhuna “E Isikar, i gao manga a donki,
pali i mahita turana a popou vona.
15 A Vuhuna Bara i masia a malala i kamumu,
i ngarua ge made vona.
Muri bara ia a vorakato,
i rata a leho dagi.
16 “E Dan, ia ra kabu,
bara i matakari e huriki a Israel.
17 E Dan, i manga a mata hale
i tabuli na dahana dala.
Na tahuna a hos i nunu valai,
bara i to tala, i kara tatea a vahana,
i boru a bakovi i made na hos.
18 O BAKOVI DAGI, a ngaru ioe go kori iau.
19 “E Gad, e huriki a panaho, bara ri valai ri vaubi turana,
pali bara i gege ria i lili mule ria.
20 “E Aser, a malala vona bara i vakabele a maki ni kani kamumu,
i kara ge kani a hariki.
21 “E Naptali, i manga a kinana dia i laho viliha,
i vakabele e tuna ri mata kamumu.
22 “E Iosep i manga a kai a vain
i pesi tabukoi na lomu, i kupo a kanena.
A rahana i kupo i rako rike na nure.
23 E huriki ri vaubi na kiniperi ri gao hateka,
bara ri valili ia ri vaubi turana.
24 Pali bara i nugu tata torea a kiniperi vona,
a vuhuna a limana i vaga hateka,
na nitora na Vure Tuhaka Hateka ne Iakop,
a Matakari, a Kedo ne Israel.
25 A Vure Tuhaka ne tamamu ge matakari ge gamai ioe.
Bara i rudu vilia vomu na hunu a vala,
i rata a naru ri gi bele kupo na malala;
i rata e huriki a ngatavine na kabu vomu ri vakabele a koma i kupo.
26 A Vuhuna Iau e tamamu a ngaru ioe,
ge maragisi vomu a maki lobo.
A maki kamumu a ngaru go bole bara i bele kupo
bara ri kavitagu a maka lolo.
Iosep, a maki lobo bara ri tabuli na limamu, a vuhuna ioe a bakovi dagi ne huriki e turamu lobo.
27 A Vuhuna “E Bensamin i manga a kaugara i rabalaki a kania.
Na hatelanga i kani a maki i rabalaki.
Na malunga i veru a maki i kani kaleva.”
E Iakop i Mate
28 Re huriki nga, a kabu i ravulu a polona i rua ne Israel. Ra maka ngava nga, e Iakop i taki virihi ria vona na tahuna i gamai takutaku ria. 29 Muri e Iakop i tarulu mule e huriki e tuna, i ta maea, “Iau a tabukoi ga mate. A ngaru mua mu gu tanu iau na dahana e huriki a gare nau, na babe na malala e Epron, a bakovi o Hiti. 30  * Vuh 23:3-20Ra babe iea i tabuli na malala e Makpela tabukoi o Mamare, na robo e Kenan. Ra babe iea turana a malala, e Abraham i kona ne Epron, a bakovi o Hiti. 31  * Vuh 25:9-10; 35:29E tamarane mua e Abraham e Sara, e tubune mua e Isak e Rebeka, e kinane mua e Lea ni tanu vonga. 32 Ra babe iea turana a malala, ni kona na kabu ne Hiti.”
33  * Apo 7:15Na tahuna e Iakop i tarulu lobo ria, i karuku lakea na kiri vona, i mahita puru. Muri i taravango a nilobona bangona i mate, i vano i made turana e huriki a viri vona ri mate pali.

*49:9: Vuh 35:22; Gi 24:9; Kap 5:5

*49:30: Vuh 23:3-20

*49:31: Vuh 25:9-10; 35:29

*49:33: Apo 7:15