2
Naha Ni Marikoi a Vure Ge Korimule Ioe
I mavonga, si gi luhoi kamumua a ngava si longoa pali, ma si gi lohopilea. * Gal 3:19A ta mavonga, a vuhuna a vinara na Vure, hosi e huriki a agelo na Vure ri habi ne huriki e tubune hita. A vinara nga ri muholi. E rei a viri i uka ma i longototo, i kamumu a Vure ge habi a nimadihi vona. * Hib 10:29; 12:25Pali a Velenga Kamumu, e Isu a Bakovi Dagi i habia ne hita. Muri e huriki ri longoa a ngavana ri taki hita vona a velenga iea i muholi. Pali si gi lohopilea a Velenga Kamumu iea, na Vure ge korimule hita, si gi ha navai? A Vure bara i vakamadihi hale hita. * Mrk 16:20; 1Ko 12:4,11A Vure tara, i ngaru ni vakasiri a Velenga Kamumu iea i muholi, lakea i rata a maka nivakasiri, a maki ni turutu vona. A Hanu Kiripiripi tara i habi tavula a maki ne huriki, na ningaru na Vure. Na naro iea kunana i vakasiri i muholi ra Velenga Kamumu ne Tuna.
A Vure i uka ma ge ru e huriki a agelo ri gi matakari a malala karaba, ra malala a ta ta vona ge valai. * Sng 8:4-6A ngava ni here puru hosi na Hinere, i ta maea,
“E rei a bakovi o luhoia?
I navai a hini o matakari kamumua a tuna bakovi?
O ru ia ge polotano taro ne huriki a agelo.
O ru langa ia, o vakabagetua a rana,
ge matakari a maki lobo o ratarike.” Na tahuna i ru a bakovi ge matakari a maki lobo, i uka tara maki ge longo kaburungia. A maki lobo. Pali mona i uka ma si matai a maki lobo ge polotano vona.
* Pili 2:8-9Pali si masia e Isu, ra muga a Vure i ratea i polotano popote ne huriki a agelo, ge mate na murine hita. Na naro iea, a Vure i rata kamumu hita. Ngane si masia e Isu, a Vure i vakabagetua, i kavurikea a rana, a vuhuna i bole a nimadihi na matenga.
10 A Vure i ratarike a maki lobo, i matakari a maki lobo. Lakea i kamumu a Vure i ratea e Isu i bole a nimadihi, ge malamala liu, ge korimule e huriki ala kupo, ge gale ria e huriki e tuna, ri gi made turana na bagetua vona. E Isu kunana a viri i korimule e huriki. 11  * Mat 25:40E Isu, ra i valai na Vure, ia a viri i rata e huriki ri malamala. Pali e huriki i rata ria ri malamala, ria ranga ri valai na Vure. I mavonga, e Isu i vivi ni gale ria e huriki e turana. 12  * Sng 22:22Lakea i ta maea,
“Iau ga vakalongo ne huriki a turagu a maki kamumu o rata.
Na tahuna ri vapopo ni kavurike ioe, ga kalolo a linge ni kavurike ioe.”
13  * Ais 8:17-18I ta rike tabu, i ta maea,
“Ga luhoi tora kunanea a Vure.”
A ngava i taki tabua i maea,
“O longo! Iau a made turana e huriki a bakovi a ngatavine a Vure i habi nau.
Ri manga e huriki e tugu.”
14  * 1Ion 3:8; Kap 12:10E Isu i bele manga kunana a bakovi, a vuhuna hita e huriki a Vure i gale hita e tuna a bakovi. I bele manga a bakovi, ge mate, ge ratapilea a viri i nugua a nitora na matenga, re Satan. 15 E Isu i mate, ge korimule hita, re hita si made manga a vorakato, a vuhuna si mangenge ni mate.
16 I muholi hateka, e Isu i ratea a leho iea, i uka ma ge korimule e huriki a agelo. I ratea a leho iea, ge korimule e huriki a hamone Abraham. 17 Na naro iea kunana e Isu i bele manga muholi e huriki e turana, ge ia a prister dagi na Vure, ge rata lobo a leho a Vure i habi vona, ge dodo hita e huriki a bakovi, a ngatavine, ge puga vuroki a naro hale ne hita. 18 I kara ia ge korimule hita e huriki si bole a nitoni, a vuhuna ia tara i bole a nimadihi hosi na tahuna ni toni.

*2:2: Gal 3:19

*2:3: Hib 10:29; 12:25

*2:4: Mrk 16:20; 1Ko 12:4,11

*2:6: Sng 8:4-6

*2:9: Pili 2:8-9

*2:11: Mat 25:40

*2:12: Sng 22:22

*2:13: Ais 8:17-18

*2:14: 1Ion 3:8; Kap 12:10