3
E Iona i Lakea o Ninive
Muri a nitane BAKOVI DAGI i bele tabu ne Iona, i ta maea, O pesi rike, o sike lakea na tanga dagi hateka e Ninive, o vakalongo ria vona a ngava a habi vomu.
E Iona i longo mai a nitane BAKOVI DAGI, i vano, i lakea o Ninive. E Ninive a tanga dagi hateka, na parava i tolu bara o polo haluia. * Mat 12:41; Luk 11:32 Na mugana parava e Iona i laho dili na tanga dagi, i ta maea, Ge lobo a parava ge ravulu va, e Ninive ni gi ratapile. E huriki o Ninive ri longoa a nitana Vure, ri taki ri gi peremu na kinani, ri gi rea na matutuna kala, i tubu ne huriki a kakaina tanga, i puru ne huriki a matasia.
Na tahuna a ngava i bele na hariki ne Ninive, i pesi rike na gula-hariki vona, i kali vuroki a bagetua vona, i rea a matutuna kala, i made puru na habulo. Muri a hariki i habi a ngava i lakea ne huriki a Ninive, i ta maea, Iau a hariki turana e huriki a bolekori nau, mi vakuku mua vona a ngava dagi iea:
E huriki a bakovi, a kanirau, a kabuna sipsip, a bulmakau, nahea ri gi kani ri gi ninu. E huriki a bakovi turana a kanirau ri gi rea na matutuna kala. E huriki lobo ri gi gale tuhaka a Vure, ri gi pulo a vilo hale ne ria, turana a rongova ne ria. E rei ge lohoka vona? A Vure, ma ge pulo a niluhoi na rongova dagi vona, ge dodo hita, i uka ma si gi vurua.
10 Na tahuna a Vure i matai ria ri pulo a vilone ria na naro hale, lakea i dodo ria, i uka ma i ratapile ria ge manga a hini i taki muga.

*3:4: Mat 12:41; Luk 11:32